ރައްޔިތުން ފަހުރުވެރިވާނެ ފަހި އުޖާލާ ދުވަސްތަކެއް ހޯދައިދޭނަން: ރައީސް

ދިވެހި ރައްޔިތުން ފަހުރުވެރިވާނޭފަދަ އުފާވެރިދުވަސްތަކެއް ހޯދައިދެއްވާނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅޫވެއްޖެއެވެ.

ރައީސް ޑރ.މުއިއްޒު މިފަދައިން ވިދާޅުވެފައިވަނީ، ނޮވެމްބަރު މަހުގެ 11 ވަނަ ދުވަހު ފާހަގަކުރަމުންގެންދާ ދިވެހިރާއްޖޭގެ ޖުމްހޫރީދުވަހުގެ މުނާސަބަތުގައި އެކްސްގައި ކުރެއްވި ޕޯސްޓެއްގައެވެ.

މި ޕޯސްޓްގައި ރައީސް ވިދާޅުވީ ދިވެހީންގެ ރާއްޖެ ދިވެހީންނަށް ހޯދައިދީ، ރައްޔިތުން އެދޭ އަމާޒުތައް ޙާޞިލްކޮށް ދިނުމަށް މި ސަރުކާރުން ފެށި ދަތުރުގައި ކުރިއަށް ދާނީ މާތްﷲގެ ޙަޟްރަތުން ވާގި އެދިތިބެ، އިޚްލާޞްތެރިކަމާއެކުގައިކަމަށެވެ.

ދިވެހިރައްޔިތުންގެ ބަދަހިކަމާއި އެއްބާރުލެއްވުމަށް ފަށްފަށުން ޝުކުރު ދަންނަވަމުން ރައީސް ވިދާޅުވީ، ދިވެހި ރައްޔިތުން ފަޚުރުވެރިވާނޭ ތަމައްދުނާއި ތަރައްޤީގެ އުޖާލާ ދުވަސްތަކެއް މި ޤައުމަށް އިރާދަކުރެއްވިއްޔާ ހޯދައިދޭނެކަމުގެ ފުރިހަމަ ޔަޤީންކަން އަރުވާކަމަށެވެ.

މި ޕޯސްޓްގައި ރައީސް ވަނީ ޖުމްހޫރީ ދުވަހުގެ އިޚްލާޞްތެރި ތަހުނިޔާއާއި ހެޔޮއެދުންތައް ދިވެހި ރައްޔިތުންނަށް އަރިސްކުަރއްވާފައެވެ.

ދިވެހިރާއްޖޭގައި ޖުމްހޫރީ ދުވަހުގެ ގޮތުގައި ފާހަގަކުރަނީ ކޮންމެ ނޮވެމްބަރުމަހެއްގެވެސް 11 ވަނަ ދުވަހެވެ. މިދުވަސް ފާހަގަކުރަނީ ރާއްޖޭގައި ދެވަނަ ޖުމްހޫރިއްޔަތެއް ގާއިމްކުރެވުނު ދުވަހަށް ނިސްބަތްކޮށެވެ.