އަހަރަމެން ވަޠަނެއްގެ ގޮތުގައި އެއްބައިވަންތަކޮށް އެކައްޗެއްގެ ގޮތުގައި ހިފަހައްޓައިދިން އެއްޗަކީ އަހަރެންމެގެ ޤަބޫލު ކުރާ ސުންނަތް ޖަމާޢަތުގެ އަޤީދާ ކަމުގައި މިއަދުގެ ހުކުރު ޚުތުބާގައި ވިދާޅުވެއްޖެއެވެ. “ ޞަޙާބީންނާ އަޙުލުބައިތުންނަށް ލޯބިކުރުމާއި، އެބޭކަލުންގެ މަޤާމު “ މި މަޢުޟޫއުއަށް އިއްވި ޚުޠުބާގައި ވިދާޅުވީ، އަހަރަމެން ސުންނަތް ޖަމާޢަތުގެ އަޤީދާއިން ފައިތިލަ ކައްސާލައިފިނަމަ، އަހަރަމެންގެ ތެރޭގައި ބައިބައިވުމާއި، ތަޅާފޮޅުން ފިތުނަ އުފެދޭނެ ކަމަށެވެ. އަހަރަމެން ބައިބައި ކުރުމަށް ނުކުންނަ އެއްވެސް ފަރާތަކަށް ފުރުޞަތު ނުދިނުމަށް ހުޠުބާގައި ގޮވާލެއްވިއެވެ.
މިއަދު ރާއްޖޭގެ ހުރިހާ ރަށެއްގައި ކުރި ހުކުރު ނަމާދުގެ ޚުޠުބާގައި ވިދާޅުވީ ދިވެހި އިސްލާމީ ކިއްލާއަށް އެއްހާސް އަހަރު ވާން ކައިރިވެފައިވާ ކަމަށާއި، މިލޮބުވެތި ވަޠަން އިސްލާމް ވުމަށްފަހު މިހާ ހިސާބަށް އައިސްފައި ވަނީ ސުންނީ މުސްލިމު ޤައުމެއްގެ ގޮތުގައި ކަމަށެވެ. ހުޠުބާގައި ވިދާޅުވީ “ އަހަރެމެން ނަބިއްޔާ ޞައްލަﷲ އަލައިހި ވަސައްލަމައަށް ފަހު ، އެންމެ މަތިވެރި ކުރާ ބަޔަކީ އެކަލޭގެފާނުގެ ލޮބުވެތި އާލު ބައިތުންނާއި ޞަޙާބީންނެވެ. އަހަރަމެންނަށް އެންމެ ލޯބި ކުރަނީ ނަބިއްޔާއަށް ފަހު އެބޭކަލުންނަށެވެ. މިވޭތެވެ ދިޔަ ޒަމާންތަކުގައި އަހަރަމެންގެ ޢިލްމުވެރިން މަތިވެރިވެގެންވާ އާލުބައިތުންނާ މާތް ޞަހާބިންނާއި ތާބިޢީންނަށް ބަދުބަސްބުނެ އިސްލާމީ ތާރީޚުގައި ހިނގާފައި ހުރި ފިތުނަތަކުގެ ވާހަކަތައް ދައްކާ ފަތުރައި އެބޭކަލުންނަށް ކުޑައިމީސްކޮށް ހަދާފައެއް ނުވެއެވެ. އަހަރަމެން ވާން ޖެހޭނީ އެބޭކަލުން މާތްކޮށް އެބޭކަލުންދެކެ ލޯބިވާ އެބޭލަކުން ދެއްކެވި ރިވެތި ނަމޫނާގައި ހިފައި އެބޭކަލުންނަށް ފުރައްސާރަކުރާ މީހުންގެ ކިބައިން ބަރިއްއަ ވެގެންވާ ބަޔަކު ކަމުގައެވެ.“
މިއަދުގެ ހުކުރު ޚުޠުބާގައި ވިދާޅުވީ، މާތް ރަސޫލާގެ ޞަހާބީންނާއި އާލުބައިތުން މަތިވެރި ކުރަން ޖެހޭނެ ކަމަށާއި އެބޭކަލުންނަށް އިހުތިރާމްކޮށް އެބޭކަލުންނާއި މެދު ހިތްސާފު ކުރަން ޖެހޭނެ ކަމަށެވެ.
