މިނިވަންކަމަށް 60އަހަރު ފުރުން ފާހަގަ ކުރުމުގެ ގޮތުން ކަނޑައަޅުއްވާފައިވާ ލޯގޯ ސަރުކާރުގެ އިދާރާތަކުން ބޭނުން ކުރެއްވުމަށް އަންގަވައިފިއެވެ. މިކަންއަންގަވާފައި ވަނީ ރައީސުލްޖުމްހޫރިއްޔާ އޮފީހުން ނެރުއްވާފައިވާ ދެންނެވުމެއްގައެވެ. އެދެންނެވުމަގައި ވިދާޅުވެފައި ވަނީ މި އަހަރަކީ، ރާއްޖޭގެ މިނިވަންކަމަށް 60 އަހަރު ފުރޭ އަހަރު ކަމަށް ވުމާއެކު، މި އަހަރުގެ މިނިވަން ދުވަހާ ގުޅިގެން ބޭނުންކުރައްވާނެ ލޯގޯއެއް ކަނޑައަޅުއްވައިފައިވާ ކަމަށާއި، އެ ލޯގޯ މި އަހަރުގެ ޖުލައި 26 ން ފެށިގެން 2026 ޖުލައި 25ވަނަ ދުވަހުގެ ނިޔަލަށް، ސަރުކާރުގެ އިދާރާތަކުން ފޮނުއްވާ ސިޓީތަކާއި ލިޔުންތަކުގައި ޖެއްސެވުމަށް ރައީސުލްޖުމްހޫރިއްޔާ ނިންމަވަފައި ކަމުގައެވެ ވީމާ، މި އަހަރުގެ ޖުލައި މަހުގެ 26ވަނަ ދުވަހުން ފެށިގެން، 2026ވަނަ އަހަރުގެ ޖުލައި 25ވަނަ ދުވަހުގެ ނިޔަލަށް، ސަރުކާރުގެ އިދާރާތަކުން ފޮނުއްވާ ސިޓީތަކާއި ލިޔުންތަކުގައި މި ލޯގޯ ޖެއްސެވުމަށްޓަކައި، އެކަމާބެހޭ މައުލޫމާތު މިނިސްޓްރީ އޮފް ދިވެހި ލެންގުއޭޖް، ކަލްޗަރ އެންޑް ހެރިޓޭޖުން ސަރުކާރު އޮފީސްތަކަށް ދެއްވާނެ ކަމަށާއި، އެ މައުލޫމާތު ލިބިވަޑައިގަތުމުން، ލޯގޯ ޖައްސަވަމުން ގެންދެވުމަށް ހަމަ ޖައްސަވާފައިވަ ކަމަށް ރައީސް އޮފީހުގެ ދެންނެވެމުގައި ވިދާޅުވެފައި ވެއެވެ.
މިއަހަރަކީ ރާއްޖެއަށް މިނިވަންކަމަށް 60އަހަރު ފުރޭ އަހަރެވެ. ރާއްޖެއަށް މިނިވަންކަން ލިބުނީ 1965ވަނަ އަހަރުގެ ޖުލައި 26ވަނަ ދުވަހެވެ. މިއަހަރުގެ މިނިވަން ދުވަސް ކުލަގަދަ ގޮތެއްގައި ފާހަގަ ކުރެއްވުމަށް ސަރުކާރުން ނިންމާފައި ވެއެވެ.
