މަޝްހޫރު ދީނީ އިލްމުވެރިޔާ ޝެއިހް އިބްރާހިމް ފަރީދު އަހްމަދު ކުއްލި ގޮތަކަށް އަވަހާރަވި ޚަބަރު ކޮންމެ ދިވެއްސަކުވެސް އަޑު އެހީ ކުއްލި ހައިރާން ކަމާއި އެކު ކަން ޔަޤީނެވެ. މަރަކީ ހަމަ ކޮންމެ މީހަކާ ކުރިމަތިލާނެ ކަމެއް ކަމަށާއި އެކަމަށް ތައްޔާރު ވުމަށް ޝައިޚްގެ ޝައުޤުވެރި ތަޤްރީރު ތަކުން ހަދާންކޮށް ދެއްވަމުން ގެންދަވާފައި ވެއެވެ.
ނަމާދަށް ފަރުވާތެރިވުމަށް ޝައިޚް ފަރީދު ދެއްވާފައި ގިނަ ނަސޭޙަތާއި އިރުޝާދުތަކަކީ ދިވެހިންގެ ކަންފަތްތަކުގައި ހަރުލާފައި ހުންނާނެ ނަސޭޙަތްތަކެކެވެ. މީގެ އިތުރުންވެސް ޝައިޚް ފަރީދު އެކި މައުޟޫޢުތަކަށް ދެއްވާފައިވާ ވައުޟުތަކުގެ ސަބަބުން ދިވެހި އެތައް ރައްޔިތުންނަކަށް ހެޔޮ އަސަރުކޮށްފައި ވާނެ ކަން ކަށަވަރެވެ. އެކަން މިއަދު ދިވެހިންގެ ޝުޢޫރުތަކުން ހާމަ ވެއެވެ.
ޝައިޚްފަރީދު އަވަހާރަވުމާއި ގުޅިގެން ރައީސް ޑރ. މުހައްމަދު މުއިއްޒު ވިދާޅުވީ އިސްލާމް ދީނުގެ ކަންކަން އޮޅުންފިލުއްވައި ދެއްވައި، ހެޔޮ ކަންކަމަށް ނަސޭހަތް ދެއްވުމުގައި ހުރިހާ ވަގުތެއް ހޭދަކުރައްވަމުން ގެންދެވި ދީނީ އިލްމުވެރިޔާ މަރްހޫމް އިބްރާހީމް ފަރީދަކީ، ހުލްގު ހެޔޮ، އަޅުވެރިއެއް ކަމަށެވެ. ދީނީ ކަންކަމަށް މަގު ދެއްކެވުމުގައި އަދާކުރެއްވި ހީވާގި އަދި ހިތްވަރުގަދަ ދައުރުގެ ހަނދާންތަކަށް ނިމުމެއް ނެތްކަމަށް ވެސް ރައީސް ވިދާޅުވިއެވެ.
”މަރްހޫމް އިބްރާހީމް ފަރީދު އިސްލާމް ދީނަށްޓަކައި ކޮށްދެއްވި އިހްސާންތެރި މަސައްކަތްޕުޅުތަކުގެ ދަރުމައާއި ޘަވާބު، އެންމެ ހެޔޮ ގޮތުގައި މާތްﷲ ދެއްވާށި. ސުވަރުގޭގެ ދާއިމީ ނިއުމަތުގައި ލަހައްޓަވާ، އާއިލާއަށް ކެތްތެރިކަން މިންވަރު ކުރައްވާށި. އާމީން“ ރައީސް ވިދާޅުވިއެވެ.
އަދި އިސްލާމީ ކަންތައްތަކާއި ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވީ ވަކިވެގެން ދިޔައީ ގާތް އަހެއް ކަމަށެވެ. އަދި ޝެއިހް ވަކިވެދިއުމަކީ އިސްލާމީ ހިދުމަތަށް ލިބިގެން ދިޔަ ދެރައެއް ކަމަށާއި ފަރީދަކީ އިސްލާމީ މަސައްކަތުގައި ފާހަގަކޮށްލެވިފައިވާ އުސްތާޛެއް ކަމަށް ވެސް މިނިސްޓަރ ޝަހީމު ވިދާޅުވެފައި ވެއެވެ.
ދެހާސްވަނަ އަހަރުން ފެށިގެން ޝައިޚް ފަރީދަކީ ދީނީ ދަރުހާއި ނަސޭހަތް ދެއްވުމުގައި ދިވެހިންނަށް އެންމެ ފަރިތަ އެންމެ މަޤްބޫލް އެއް ނަމެވެ. ދީނީ ހޭލުންތެރިކަމުގެ އެންމެ ބޮޑު ހިއްސާދާރަކީ ޝައިޚް ފަރީދެވެ. އޭނާގެ ދަރުސްތަކަށް މީހުން ޖަމާވަނީ ދެއްވާ ނަސޭހަތާއި ވިދާޅުވެ ދެއްވާ އިބުރަތްތެރި ވާހަކަތަކުގެ ޝައުގުވެރިކަމުންނެވެ. ދީނާ ގުޅޭ ވާހަކަތައް މިސާލުތަކާ އެކު މީހުންގެ ސިކުނޑި އަށް ވައްދައިދެނީ އަޑުއަހާ ހިތްވާ ގޮތަކަށެވެ. ރާއްޖެ އިސްލާހީ ހަރަކާތްތަތައް ފެށުނުފަހުން ދިވެހިން ދަންނަ އެންމެ އިތުބާރު ކުރާ އެއް ނަމަކަށް ވެގެން ދިޔައީ ޝައިޚް ފަރީދު ކަމާއި މެދު ޝައްކެއްނެތެވެ. ޝައިޚް ފަރީދުގެ ސަބަބުން އެތައް ޒުވާނުން ނެތް ހެޔޮ މަގު ފެނިފައި ވާނެ ކަން ޔަޤީނެވެ.
ޝައިޚް އިބްރާހިމް ފަރީދު އަވަހާރަވުމާއި ގުޅިގެން އިސްލާމީކަންތައްތަކާ ބެހޭ ވުޒާރާއިން ނެރެފައިވާ ބަޔާނުގައި ވިދާޅުވެފައި ވަނީ “ ފަޟީލަތުއްޝައިޚް އިބްރާހީމް ފަރީދު އަވަހާރަވުމަކީ އިސްލާމީ ދަޢުވަތަށް ލިބިގެން ދިޔަ ވަރަށް ބޮޑު ގެއްލުމެކެވެ. ފަޟީލަތުއްޝައިޚު އިބްރާހީމް ފަރީދަކީ އިސްލާމީ ދަޢުވަތުގެ މައިދާނުގައި ފާހަގަކޮށްލެވިފައިވާ ޢިލްމުވެރިއެކެވެ. ނުހަނު ޚިދުމަތްތެރި ހިތްވަރު ގަދަ ޝަޚްޞިއްޔަތެކެވެ. ދަޢުވަތުގެ މައިދާނުގައި ވަރަށް ބޮޑު ޤުރުބާނީތަކެއްވެ ވަޑައިގެންނެވި ބޭފުޅެކެވެ.“
އެމަނިކުފާނު މިދިޔަ ހޯމަ ދުވަހު އަވަހާރަ ވުމުގެ ޚަބަރާއި އެކު ސޯސަލް މީޑިއާގައި އެމަނިކުފާނުގެ ޒިކްރާ އެކި ފަރާތްތަކުން އައުކޮށްފައި ވެއެވެ. ދީނީ ޢިލްމުވެރިންނާއި އެކިފިކުރުގެ ސިޔާސީ ބޭފުޅުންނާއި އާއްމު ރައްޔިތުންގެ ޝުއޫރުތަކެވެ. އެ ބޭފުޅުންގެ ޝުޢޫރުތަކަށް ބަލާއިރު ފެނިގެން ދަނީ ޝައިޚް ފަރީދުގެ ޚިދުމަތްތަކަކީ ދިވެހި ޖައްވުން ފަނޑުވުމެއް ނެތް ހަދާންތަކެއް ކަމެވެ. އަގު ނުކުރެވޭ ފަދަ މަސައްކަތްޕުޅުތަކެއް ޝައިޚް ކުރައްވާފައި ވާކަމެވެ. މަރަކީ ހަމަ ކޮންމެ މީހަކާ ކުރިމަތިލާނެ ކަމެއް ކަމަށާއި މަރަށް ތައްޔާރު ވުމަށް ޝައިޚްގެ ތަޤްރީރުތަކުން ހަދާން ކޮށްދެއްވަމުން ދިޔައެވެ. މިއަދު އަޅުގަނޑުމެންނާ ފަޟީލަތުއްޝައިޚް އިބްރާހީމް ފަރީދު އަބަދުގެ އަބަދަށް ވަކިގެން ހިގައްޖެއެވެ. އަޅުގަނޑުމެންނަށް އޮތީ އެމަނިކުފާނުގެ ދަރުސްތަކުގައި ހިފައިގެން އެދުވަހަށް ތައްޔާރުވުމެވެ. އެމަނިކުފާނުގެ ކުރެއްވި މަސައްކަތްޕުޅަށް ހެޔޮ ޖަޒާ ދެއްވުމަށް އެދި ދުޢާ ކުރުމެވެ. ޝައިޚް ފަރީދުގެ ފުރާނައަށް ސުވަރުގޭގެ ދާއިމީ ނިޢުމަތް މިންވަރު ކުރައްވާށި. އާމީން!
