މިއަހަރުގެ އޯސްޓްމަހުގެ ދިވެހިރާއްޖޭގެ އިސްލާމިކް ޔުނިވަރސިޓީން (އައިޔޫ އެމް) ފަށާ ކޯސްތައް އިޢުލާންކޮށްފިއެވެ.
މިއަހަރުގެ އޮގަސްޓް އިންޓޭކަށް އައިޔޫއެމްއިން އިއުލާނުކޮށްފައިވާ ވަނީ 69 ކޯހެކެވެ. އެ ކޯސްތަކުގެ ތެރޭގައި، ޕީއެޗްޑީ ލެވެލްގެ 3 ކޯހަކާއި، މާސްޓާރސް ލެވެލްގެ 18 ކޯހަކާއި، ޕޯސްޓްގްރެޖުއޭޓް ޑިޕްލޮމާ 1 ކޯހާއި، ބެޗްލަރސް ލެވެލްގެ 15 ކޯހަކާއި، އެސޯސިއޭޓް ޑިގްރީ 2 ކޯހެއް އަދި ޑިޕްލޮމާގެ 11 ކޯހެއްގެ އިތުރުން ސެޓްފިކެޓް ލެވެލްގެ 19 ކޯހެއް ހިމެނެއެވެ. މި ސެމިސްޓަރގައި މުޅިން އަލަށް ފެށުމަށް ހަމަޖެހިފައިވަނީ މާސްޓާރސް އޮފް ޓީޗިންގް އިން ހަޔަރ އެޑިއުކޭޝަން އަދި 10 ޤިރާއަތުން އީޖާޒާ ދިނުމުގެ ކޯހެވެ.
އޮގަސްޓް މަހު ފެށުމަށް ހަމަ ޖެހިފައިވާ ކޯސްތައް ބެހިފައިވާ މައިގަނޑު ދާއިރާތަކުގެ ތެރޭގައި ޤުރްއާނާއި ހަދީޘް، ޝަރީޢާ އެންޑް ލޯ، ފިޤްހް، އިސްލާމިކް ސްޓަޑީސް، އިމާމްޝިޕް، ލޭންގުއެޖް، އެޑިޔުކޭޝަން، ފައިނޭންސް، އެކައުންޓިންގް، ލީޑަރޝިޕް އެންޑް އެޑްމިނިސްޓްރޭޝަން މެނޭޖްމެންޓް އަދި ޖަރނަލިޒަމްގެ އެކި ކޯސްތައް ހިމެނެއެވެ.
އަލަށް ފަށާ ކޯސްތަކާ ބެހޭ ގޮތުން މައުލޫމާތު ދެއްވުމަށް އިސްލާމިކް ޔުނިވަރސިޓީ ބޭއްވި ބައްދަލުވުމުގައި ޔުނިވަރސިޓީގެ ވައިސް ޗާންސެލަރ ޑރ. ޢަލީ ޒާހިރު ވިދާޅުވީ، ”ޔުނިވަރސިޓީން އަބަދުވެސް މަސައްކަތް ކުރަނީ، ޔުނިވަރސިޓީންދޭ ތަޢުލީމު އިތުރަށް ފުޅާކުރުމަށާއި، ދޭ ޚިދުމަތްތައް އިތުރަށް ފުޅާކޮށް ފަހިކޮށްދިނުމަށް، އަދި ޔުނިވަރސިޓީގެ މާޙައުލަކީ ދަރިވަރުންނަށް އެކަށީގެންވާ ކިޔެވުމަށް ލޯބިޖެހޭ އަދި ކުދިން އުޅޭ ހިތްވާކަހަލަ މާޙައުލަކަށް ބަދަލުކުރެވޭތޯ“. އެވެ.
މިއަހަރުގެ އޮގަސްޓް އިންޓޭކްގެ އައި.ޔޫ.އެމްގެ ކޯސްތައް، މާލޭ ސިޓީގެ އިތުރުން، ރ.އުގޫފާރު، ޅ.ނައިފަރު، ލ.ފޮނަދޫ، ގދ.ތިނަދޫ، ފުވައްމުލައް ސިޓީގެ އިތުރުން އައްޑޫސިޓީ މީދޫގައި ޤާއިމުކޮށްފައިވާ އެ ޔުނިވާސިޓީގެ ލާރނިންގ ސެންޓަރުގައި ކުރިއަށްގެންދިއުމަށް ވަނީ ހަމަޖެހިފައެވެ. އަދި ދިވެހިރާއްޖޭގެ އިސްލާމީ ޔުނިވަރސިޓީއާއި އެ ޔުނިވަރސިޓީގެ ލާރނިންގ ސެންޓަރތަކުގައި ހިންގާ ޑިގްރީ ފެންވަރުގެ ހުރިހާ ކޯސްތަކަކީވެސް ސަރުކާރުގެ ހިލޭ ޑިގްރީ ޕްރޮގްރާމުގެ ތެރެއިން ޓިއުޝަން ފީ ހިލޭ ކޯސްތަކެކެވެ.
މިއަހަރުގެ އޮގަސްޓް އިންޓޭކުގެ ކޯސްތަކަށް ޝަޢުގުވެރިވާ ފަރާތްތަކުން އެޕްލިކޭޝަން ހުށަހެޅުމުގެ ސުންގަޑިއަކީ 15 ޖުލައި 2025 ވާ އަންގާރަ ދުވަހުގެ މެންދުރު 13:00އެވެ.
