މާލޭގެ އިމާރާތަކުން ވެއްޓުނު ހައްވާ ޔުމްނު ރަޝީދަށް އިންސާފު ހޯދައިދޭން ގޮވާލައި ޒުވާނުން ކުރަމުން ގެންދާ ސިލްސިލާ މުޒާހަރާ ގެ ތެރެއިން ރޭގައި ބޭއްވި މުޒާހަރާގައި ފުލުހުން ބާރުގެ ބޭނުންކޮށްގެން ރޫޅާލައި، ދެ މީހަކު ހައްޔަރުކޮށްފި އެވެ.
މިދިޔަ މަހުގެ 18 ވަނަ ދުވަހުގެ ރޭ މާލޭގެ އިމާރާތަކުން ޖެހިގެން ހުރި ގުދަނެއްގެ ފުރާޅު މައްޗަށް ވެއްޓި، އަނިޔާތަކެއް ލިބުނު ޔުމްނުގެ މައްސަލާގައި ޒުވާނުން މުޒާހަރާ ފެށީ ފުލުހުންގެ ތަހުގީގުގައި ގޯސްތަކެއް ހަދާފައި ކަމަށް ބުނެ އެވެ.
އެ މައްސަލާގައި އިންސާފު ހޯދައިދޭން ގޮވާލައި ފެށި މުޒާހަރާތަކަށް ފުލުހުން ކުރިން ފުރުސަތު ދިން ނަމަވެސް ރޭގައި 12 ޖަހަން އުޅެނިކޮށް ފުލުހުން ވަނީ މުޒާހަރާ ރޫޅާލައި ދެ މީހަކު ހައްޔަރުކޮށްފަ އެވެ.
މުޒާހަރާ ރޫޅާލުމުގައި ފުލުހުންނާއި މުޒާހަރާގެ ބައިވެރިންނާ ދެމެދު ކުރިމަތިލުންތަކެއް ވެސް ހިނގި އެވެ. އަދި މުޒާހަރާ ރޫޅާލުމަށްޓަކައި ފުލުހުން ޕެޕާސްޕްރޭ ވެސް ބޭނުންކުރި އެވެ.
ރޭގެ އަށެއް ޖެހިއިރު ފެށި މުޒާހަރާ ކުރިއަށް ގެންދިޔައިރު، ފެނުނު އެއްކަމަކީ މަގުގެ މެދުގައި ޓީޓީ މޭޒެއް ބަހައްޓައިގެން ޓީޓީ ކުޅެމުން ދިޔަ ތަނެވެ. އަދި ކެރަމް ފަދަ ކުޅިވަރުތައް ވެސް މުޒާހަރާ ކުރިއަށް ގެންދިޔައިރު ކުޅެމުން ދިޔަ އެވެ. ވަކި ހިސާބަކުން ބާރަށް ލަވަ ޖަހަމުން ދިޔަ މަންޒަރު ވެސް ފެނުނެވެ. އޭގެ އިރުކޮޅެއް ފަހުން ދެން ފެނުނީ މުޒާހަރާ ރޫޅާލަން ފުލުހުން ނުކުތް ތަނެވެ.
ޔުމްނުގެ މައްސަލާގައި ފުލުހުންނަށް އަމާޒުވި ތުހުމަތުތަކާ ގުޅިގެން އެކަން ބެލުމަށް ރައީސް ޑރ. މުހައްމަދު މުއިއްޒު ވަނީ ރިޔާސީ ކޮމިޝަނެއް އުފައްދަވާފައި ވެއެވެ.
