ރާއްޖޭގައި ބިދޭސީން މައްސަލަ އަކީ އަބަދުވެސް ވަރަށް ބޮޑުވެފައިވާ މައްސަލައެއް ކަމަށާއި މިކަން ހައްލުކުރުމަށް މީގެ ކުރިން މާ އެދެވޭ މަސައްކަތްތަކެއް ކުރެވިފައި ނުވާކަމަށް އެމްއެންޕީގެ ނައިބު ރައީސް ހުސެއިން އިސްމާއީލް ވިދާޅުވެއްޖެއެވެ.
އާދިއްދަ ދުވަހުގެ ރޭ ”އެންޓީވީ“ އިން ގެނެސްދިން ”ދެކޭގޮތް“ ޕްރޮގްރާމުގައި ވާހަކަދައްކަވަމުން ހުސެއިން އިސްމާއީލް ވިދާޅުވީ ބިދޭސީންގެ މައްސަލަ ހައްލުކުރުމަށް މީގެ ކުރިން މާ އެދެވޭ މަސައްކަތް ތަކެއް ކުރެވިފައި ނުވާކަމަށާއި ކުރެވިފައި ހުރީ ހަމަ އެކަނި ޕަބްލިކަށް ދައްކާލުމުގެ ގޮތުން ހައްލުކުރާ ކަމަށް ބުނެ ދެކެވިފައިވާ ވާހަތަކެއް ކަމަށެވެ.
ހުސެން ވިދާޅުވީ އޭރު އެންމެ ގިނައިން ބިދޭސީންގެ މައްސަލަ ހައްލުކުރާކަމަށް ވާހަތައް ދެކެވިފައި ވަނީ ހަމަ އެކަނި އިންތިޚާބުތަކުގައި ކަމަށާއި އެގޮތުން ކޮންމެ އިންތިޚާބަކާއި ދިމާކޮށް ވަރަށް ބޮޑަށް މިފަދަ މައްސަލަތަކުގެ ވާހަތައް ދައްކާކަމަށެވެ. ނަމަވެސް އެވާހަކަތަކަށް އަމަލީ ސިފައެއް ނާންކަމަށް އޭނާ ވިދާޅުވިއެވެ.
”ކުރީގަ އެބަހުރި މަސައްކަތަކެއް ކުރެވިފަ. އެކަމަކު ވަރަށް ލައިޓްކޮށް ކުރެވިފަ ހުރީ. ބުނެވިދާނެ ހަމަ އެކަނި ޕަބްލިކަށް ދައްކާލުމުގެ ގޮތައް ތިމަންނަމެން އެ މަސައްސަލަ ހައްލުކުރަމޭ، އެބަ ހައްލުކުރަމޭ. އަދި ޚާއްސަކޮށް ކޮންމެ އިންތިޚާބަކާއި ކައިރިވުމުންވެސް ބޭނުންކުރާ ހަތިޔާރެއްގެ ގޮތުގަ ނޫނީ އެ ދައްކާ ވާހަކައެއްގެ ގޮތުގަ ބިދޭސީންގެ މައްސަލަ ހައްލުކުރާ ވާހަ ދައްކާ.“ ހުސެއިން ވިދާޅުވިއެވެ.
ހުސެއިން އިތުރަށް ވިދާޅުވީ ބިދޭސީންގެ މައްސަލަ ބޮޑުވެ، މިހާތަނަށް ދިޔަ އިރުވެސް ހައްލެއް ނުލިބި އޮތީ އެކަމުގައި ކޮރަޕްޝަނުގެ އަމަލުތަކެއް ވެސް އެކުލެވޭތީ ކަމަށާއި އަދި އެކަން ހައްލުކުރަން ސަރުކާރުތަކުން އެހާ ބޮޑު އަހައްމިޔަތުކަމެއް ކުރިން ދެވިފަ ނުވާތީކަމަށެވެ.
