ވެރިކަންކުރާ މައި ޕާޓީ ޕީއެންސީގެ މެމްބަޝިޕް އިތުރުކުރުމަށްޓަކައި ސޮއި ފޯޖުކޮށް ވަގަށް ފައިސާ ބަހަން ނުޖެހޭނެ ކަމަށާއި އެއީ ތާއީދު ނެތް ލީޑަރުންގެ ޕާޓީތަކުން ކުރަންޖެހޭ ކަންތައްތައް ކަމަށް ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއާޕާސަން އަބްދުއްރަހީމް އަބްދުﷲ މިރޭ ވިދާޅުވެއްޖެއެވެ.
އިދިކޮޅު އެމްޑީން ކުރި ތުހުމަތުތަކަށް ރައްދުދެއްވާ މަޖިލިސް ރައީސް އަންބުއްރަހީމް ވިދާޅުވީ ޕީއެންސީގެ މެމްބަޝިޕް އިތުރުކުރުމަށްޓަކައި ސޮއި ފޯޖުކޮށް ވަގަށް ފައިސާ ބަހަން ނުޖެހޭނެ ކަމަށާއި އެއީ ތާއީދު ނެތް ލީޑަރުންގެ ޕާޓީތަކުން ކުރަންޖެހޭ ކަންތައްތަކެއް ކަމަށެވެ.
ޕީއެންސީގެ އޮފީހުގައި އާދިއްތަ ދުވަހުގެ ރޭ އޮތް ފޯމު ހަވާލުކުރުމުގެ ރަސްމިއްޔާތުގައި ވާހަކަފުޅު ދައްކަވަމުން އަބްދުއްރަހީމް ވަނީ އެ ތުހުމަތުތަކަށް ދޮގުކުރައްވާ އެ ވާހަކަތަކަށް ރައްދު ދެއްވާފައެވެ.
އަބްދުއްރަހީމް ވިދާޅުވީ ޕާޓީއަށް މީޙުން އިތުރުކުރުމަށް ސޮއި ފޯޖް ކުރަނީ ރައްޔިތުން ބަލައިނުގަންނަ ސިޔާސީ ލީޑަރުން ޕާޓީ ހެދީމަ އެ ޕާޓީތަކުން ކަމަށާއި އެހެން ނަމަވެސް ރައްޔިތުން ބަލައިގަންނަ އަދި ރައްޔިތޔުންގެ ތާއީދާއި ރައްޔިތުންގެ ލޯތްބާއި އިހުތިރާމް އޮންނަ ވެރީންގެ ޕާޓީތަކަށް މެމްބަރުން ވައްދަން އެފަދަ ވިޔާނުދާ ކަންކަން ކުރަން ނުޖެހޭނޭކަމަށެވެ.
އަބްދުއްރަހީމް ވިދާޅުވީ އެކަން ވަރަށް ރަނގަޅަށް އެނގޭ ކަމަށާއި ޕީއެންސީ އޮފީހުން ކޮންމެ ރެއަކު ވެސް އެތައް ސަތޭކަ ފޯމަކާ ހަވާލުވަމުންދާ ކަމަށާއި އެއީ މަޖުބޫރުކޮށްގެން ފުރާ ފޯމެއް ނޫން ކަމަށެވެ.
ހަމައެއާއެކު ސަރުކާރުގެ އޮފީސްތަކުން ޕާޓީއަށް ފޯމު ފުރާ ވާހަކައާއި، ކުންފުނިތަކުން ޕާޓީއަށް ފޯމު ފުރާކަމަށް ބުނެ ދައްކާ ވާހަކަތައް އިވިވަޑައިގަންނަވާކަން ފާހަގަކުރައްވާ އެމަނިކުފާނު ވިދާޅުވީ ސަރުކާރުގެ ވަޒީރުކަމުގައާއި ކުންފުނިތަކުގެ މެނޭޖިން ޑިރެކްޓަރު (އެމްޑީ) ކަމުގައި ތިއްބަވާނީ ޕީއެންސީގެ މެންބަރުން ކަމަށެވެ. އެހެންކަމުން ޕީއެންސީ ބޮޑުކުރުމަކީ އެ މެންބަރުންގެ ޒިންމާއެއް ކަމަށް އެމަނިކުފާނު ވިދާޅުވިއެވެ.
ޕިއެންސީގެ ރައީސް، ރައީސުލްޖުމްޙޫރިއްޔާ ޑރ. މުހައްމަދު މުއިއްޒު ވެރިކަމަށް ވަޑައިގެންނެވިއިރު ޕީއެންސީގައި ތިބި މެންބަރުންގެ އަދަދަކީ 3،022 ނަމަވެސް، އެމަނިކުފާނުގެ ވެރިކަމަށް އެއް އަހަރު ނުފުރެނީސް މިހާރު ރާއްޖޭގައި އޮތް އެންމެ މެންބަރުން ގިނަ ޕާޓީއަކީ ޕީއެންސީ ކަމަށް އަބްދުއްރަހީމް ވިދާޅުވިއެވެ.
ހަމައެއާއެކު ޕާޓީއަށް މެންބަރުން ވެއްދުމަކީ ވަރަށް ބުރަ މަސައްކަތެއް ކަމަށާއި އެކަން އެނގޭނީ އެކަން ތަޖުރިބާ ކޮށްފައި ތިބޭ މީހުންނަށް ކަމަށް އެމަނިކުފާނު ވިދާޅުވިއެވެ.
ޕީއެންސީން ގެންދަނީ މި އަހަރުގެ ނޮވެމްބަރު ނިމުމުގެ ކުރިން 75،000 މެންބަރުން އެ ޕާޓީއަށް ހަމަކުރުމުގެ މަސައްކަތް ކުރަމުންނެވެ. އެގޮތުން، މިހާތަނަށް 65،000އަށްވުރެ ގިނަ މެންބަރުން ހަމަކުރެވިއްޖެ ކަމަށް އެ ޕާޓީގެ ޕާލިމެންޓްރީ ގްރޫޕްގެ ލީޑަރު އަދި ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު އިބްރާހީމް ފަލާހު އިއްޔެ ވަނީ ވިދާޅުވެފައެވެ.
