ރައްޔިތުންގެ މަޖިލީހުގެ ވައިކަރަދޫ ދާއިރާގެ މަޖިލިސް މެންބަރު ހުސެއިން ޒިޔާދަށް ހަމަލާދީފިއެވެ.
ޖަނާޒާއެއްގައި ބައިވެރިވުމަށް ސަހަރާއަށް ގޮސް ހުއްޓާ ޒިޔާދުގެ ބުރަކަށީގައި އުމުރުން ދުވަސްވީ މީހަކު ވަނީ އަތުން ޖަހާ ހަމަލާދީފައެވެ.
ޒިޔާދު ވިދާޅުވީ، ހަމަލާދިން މީހާއަކީ ކާކުކަން ނޭނގޭ ކަމަށެވެ. ޙަމަލާދިން ވަގުތު މެމްބަރާއި ދިމާލަށް މާލޭގައި ތިހެން ނޫޅެވޭނެ ކަމަށާއި ރަށަށްގޮސް ފުއްޕާފައި އުޅެން އެކަހަލަ އެއްޗެއް ބުނިކަމަށް މެމްބަރު ޒިޔާދު ވިދާޅުވިއެވެ. ޒިޔާދު ވިދާޅުވީ އެމީހާ ކީއެއްޗެއް މާބޮޑަކަށް ސާފު ނުވާކަމަށެވެ.
ހަމަލާދިން މީހާއަކީ އުމުރުން ދުވަސްވީ މީހެއް ކަމަށްވާތީވެ، އެ މައްސަލަ ފުލުހުންނަށް ހުށަހަޅާފައި ނުވާ ކަމަށް ހުސެން ޒިޔާދު ވިދާޅުވިއެވެ. އަދި އެ މީހާއަކީ އާއްމުކޮށް ވެސް އެގޮތަށް ރުޅިގަދަވާ މީހެއްކަމަށް ފަހުން މަޢުލޫމާތު ލިބުނު ކަމަށްވެސް ޒިޔާދު ވިދާޅުވެފައެވެ.
މި ޙާދިޞާއާ ގުޅިގެން ބައެއް ފަރާތްތަކުން ވަނީ ކަންބޮޑުވުން ފާޅުކޮށް، އެކަން ކުށްވެރިކޮށްފައެވެ. އަދި މަޖިލިސް މެންބަރަކަށް މިފަދަ ޙަމަލާއެއް ދިނުމަކީ ކަންބޮޑުވާންޖެހޭ ކަމެއް ކަމަށް ބައެއް ފަރާތްތަކުން ފާހަގަކުރިއެވެ.
