މަސްޖިދުއް ނަބަވީގެ އިމާމު، ޑރ. ސަލާހުލް ބުދައިރު ރާއްޖެއަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު ފުރާވަޑައިގެންފިއެވެ.
ރާއްޖޭގެ އިސްލާމީ ޝަހުސިއްޔަތު ވަރުގަދަ ކުރުމަށް ރައީސް ޑރ. މުހައްމަދު މުއިއްޒުގެ ލަފަފުޅާއި އިރުޝާދުގެ ދަށުން އިސްލާމިކް މިނިސްޓްރީއިން ދެއްވި ދައުވަތަކާ ގުޅިގެން ޑރ. ސަލާހުލް ބުދައިރު ރާއްޖެ ވަޑައިގަތީ 21 އޭޕްރިލް ގައެވެ.
މި ދަތުރުފުޅުގެ ތެރޭގައި ޑރ. ސަލާހުލް ބުދައިރު ވަނީ ރައީސުލްޖުމްހޫރިއްޔާ ޑރ. މުއިއްޒުއާއި ބައްދަލުކުރައްވާފައެވެ. އަދި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދާއި މިނިސްޓްރީގެ އިސްވެރިންނާއި މުވައްޒަފުންނާވެސް ބައްދަލުކުރައްވާފައިވެއެވެ. މީގެ އިތުރުން އިސްލާމީ ފަތުވާދޭ އެންމެ މަތީ މަޖީލީހާއި ޒުވާން ޚަޠީބުންނާއި ޙާފިޡުންނާއި އިމާމުންނާއި ބައްދަލުކުރައްވާފައިވެއެވެ. ދިވެހިރާއްޖޭގެ ދީނީ ޢިލްމުވެރިންނާއި ބައްދަލުކުރެއްވުމުގެ އިތުރުން ކީރިތި ޤުރުއާނާއި ބެހޭ ޤައުމީ މަރުކަޒާއި އަމިއްލަ މުއައްސަސާތަކުގައި ޤުރުއާން ހިތުދަސްކުރާ ދަރިވަރުންނާއި ބައްދަލު ކުރައްވާފައިވާކަންވެސް ފާހަގަކޮށްލެވެއެވެ. އަދި ހަމަ އެހެންމެ ޑރ.ސަލާހުލް ބުދައިރުވަނީ ހުކުރު މިސްކިތަށް ވެސް ވަޑައިގެންފައެވެ.
ޑރ. ސަލާހުލް ބުދައިރުގެ މި ދަތުރުފުޅުގައި ބުދަދުވަހުގެރޭވަނީ ކިންގް ސަލްމާން މިސްކިތުގައި މަޣްރިބް ނަމާދާއި އިޝާ ނަމާދު އިމާމުވެ ކުރައްވާފައެވެ. އަދި.ބުރާސްފަތި ދުވަހުގެރޭ އިސްލާމީ މަރްކަޒުގައި އިޝާ ނަމާދުވެސް އިމާމުވެ ކުރައްވާފައިވެއެވެ. އެއަށް ފަހު ޙާއްޞަ އިސްލާމީ ދަރުހެއްވެސްވަނީ ދެއްވާފައެވެ. މީގެ އިތުރުން ހުކުރު ދުވަހު އިސްލާމީ މަރުކަޒުގައި އިމާމުވެ އިމާމު ޑރ. ޞަލާޙުލްބުދައިރުވަނީ ހުކުރު ކުރައްވާފައެވެ.
މި ދަތުރުފުޅުގެ އެންމެހާ ކަންތައްތަކެއް ކުރިއަށް ދިޔައީ ރައީސް ޑރ. މުޢިއްޒުގެ ލަފާފުޅާއި އިރުޝާދުގެ ދަށުންނެވެ.. މިއީ 40 އަހަރަށްފަހު، ޙަރަމްފުޅެއްގެ އިމާމެއް ރާއްޖެ ވަޑައިގެންނެވިފުރަތަމަ ފަހަރުކަން ފާހަގަކޮށްލެވެއެވެ.
