ސައިބަރ ސޭފްޓީ އެވެއާނަސް ޕްރޮގްރާމެއް ދ. އަތޮޅުގައި ކުރިއަށް ގެންގޮސްފިއެވެ.
ސައިބަރ ކްރައިމް ސެންޓަރާއި ދ. އަތޮޅު ފުލުހުން ގުޅިގެން މިމަހުގެ 14ވަނަ ދުވަހުން ފެށިގެން މިމަހުގެ 17ވަނަ ދުވަހުގެ ނިޔަލަށް މި ޕްރޮގްރާމް ކުރިއަށް ގެންގޮސްފައިވަނީ ކުޑަހުވަދޫ، މީދޫ، ބަނޑިދޫ، ހުޅުދެލި އަދި މާއެނބޫދޫގައެވެ.
މި ޕްރޮގްރާމުގެ ދަށުން މަޢުލޫމާތު ދީފައިވަނީ އެ ރަށްރަށުގެ ސްކޫލް ދަރިވަރުންނާއި ބެލެނިވެރިންގެ އިތުުރުން ފުލުހުންނަށެވެ. ދަރިވަރުންނަށް މަޢުލޫމާތު ދިނުމަށް ކުރިއަށް ގެންދިޔަ ސެޝަންތަކުގައި، ސައިބަރ ކުށްތަކުގެ ޝިކާރައަކަށް ވިޔަ ނުދިނުމަށްޓަކައި އަޅަންޖެހޭ މުޙިއްމު ފިޔަވަޅުތަކާ ބެހޭ މަޢުލޫމާތު ދީފައިވެއެވެ. މީގެ ތެރޭގައި، އޮންލައިން ގޭމްތަކުގައި ދުރުހެލިވާންވީ އަމަލުތަކާއި، ސޯޝަލް މީޑިއާގައި ދަރިވަރުންކުރާ ހަރަކާތްތައް ބެލެނިވެރިންނާ ހިއްސާކުރުމުގެ މުޙިއްމުކަން ފާހަގަކޮށްފައިވެއެވެ.
މި ސެޝަންތަކުގައި، މީދޫ އަދި މާއެނބޫދޫ ސްކޫލުގެ ގްރޭޑް 7 އިން 10 އަށް ތައުލީމު ހާސިލުކުރަމުންދާ ދަރިވަރުންނާއި، ހުޅުދެލި އަދި ބަނޑިދޫ ސްކޫލުގެ ގްރޭޑް 6 އިން 10އަށް ތަޢުލީމު ޙާޞިލުކުރަމުންދާ ދަރިވަރުންގެ އިތުރުން ދ. އަތޮޅު ތަޢުލީމީ މަރުކަޒުގެ ގްރޭޑް 4 އިން 12 އަށް ތަޢުލީމު ޙާޞިލުކުރަމުންދާ ދަރިވަރުންނަށް މަޢުލޫމާތު ދީފައިވެއެވެ.
ބެލެނިވެރިންނަށް ކުރިއަށް ގެންދިޔަ ސެޝަންތަކުގައި، ދަރިވަރުންގެ ފޯނު ބޭނުންކުރާ ގޮތް މޮނީޓާކުރުމުގެ އުކުޅުތަކާއި، ދަރިންގެ ފޯނު ޗެކްކުރުމުގެ މުޙިއްމުކަން އޮޅުންފިލުވައިދީފައިވެވެ. އަދި އިންޓަނެޓް ރައްކާތެރިކަމާއެކު ބޭނުންކުރާނެ ގޮތާއި، ސެކިއުރިޓީއާ ގުޅޭ މުޙިއްމު ފިޔަވަޅުތައް ވެސް ހިއްސާކޮށްފައިވެއެވެ. ޙާއްޞަކޮށް ސޯޝަލް މީޑިއާ އެޕްލިކޭޝަންތަކާއި އީމެއިލްގައި ޓޫ-ފެކްޓަރ އޮތެންޓިކޭޝަން ސެޓިންގ ހަދާނެ ގޮތް ދަސްކޮށްދީފައިވެއެވެ. މި ސެޝަންތަކަށް ބެލެނިވެރިންގެ ފަރާތުން ފުރިހަމަ އެއްބާރުލުން ލިބިފައިވާކަން ފާހަގަކުރެވެއެވެ.
ފުލުހުންނަށް މަޢުލޫމާތު ދިނުމަށް ކުރިއަށް ގެންދިޔަ ސެޝަންތަކުގައި، ސައިބަރ ކުށްތަކަށް ހޭލުންތެރިކުރުވައި، އެކަމާ ގުޅޭ ފުރިހަމަ މައުލޫމާތު ފޯރުކޮށްދީފައިވެއެވެ. އަދި ފުލުހުންނަކީ ސައިބަރ ހަމަލާތަކުގެ އަމާޒަކަށް ވެފައިވާ ބަޔަކަށްވުމާއެކު، މިފަދަ ކުށްތައް ހުއްޓުވުމަށް އެޅިދާނެ ފިޔަވަޅުތަކާއި، ޢާއްމުކޮށް ދިމާވާ ސައިބަރ ބައެއް ހަމަލާތަކާ ބެހޭ މަޢުލޫމާތު ޙިއްޞާކޮށްފައިވެއެވެ. އަދި ސައިބަރ ސަލާމަތްތެރިކަމާ ގުޅޭގޮތުން ޢާއްމުންނަށް ދޭންޖެހޭ މަޢުލޫމާތުގެ އިތުރުން، ސައިބަރ ކްރައިމް ސެންޓަރުން ކުރަމުންދާ މަސައްކަތްތަކާއި، މިކަމުގައި ހުރި ގޮންޖެހުންތަކުގެ މަޢުލޫމާތު ވެސް ޙިއްޞާކޮށްފައިވެއެވެ.
