ރިޔާސީ އިންތިހާބުގެ ދެވަނަ ބުރު އުވާލައި ޕްރިފެރެންޝަލް ވޯޓިންއަށް ދިޔުމަށް ތާއިދު ކުރައްވާ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
އެކްސްގައި އެ މަނިކުފާނު ކުރެއްވި ޕޯސްޓެއްގައި ވިދާޅުވީ، ޕްރިފެރެންޝަލް ވޯޓާއާ އެކު ނަމަ އެއް ބުރުން ވޯޓުލާ ނިންމައި ސަރުކާރެއް އުފައްދާ އުސޫލަކީ ރަނގަޅު އުސޫލެއް ކަމަށް ދެކެވަޑައިގަންނަވާ ކަމަށެވެ.
މިދިޔަ ބުދަ ދުވަހު މުލިއާގޭގައި މަޖިލިސް މެމްބަރުންނާއި އެކު ބޭއްވި ބައްދަލުވުމެއްގައި ރައީސް މުއިއްޒު ވަނީ ރިޔާސީ އިންތިހާބުގެ ދެވަނަ ބުރު އުވާލުމަށާއި ރިޔާސީ އިންތިހާބާއި ރައްޔިތުންގެ މަޖިލިސް އިންތިހާބު އެއްކޮށްލުމަށް މި އަހަރު ފެންނަ ނުފެންނަ ވޯޓެއް ނެގުމަށް މަސައްކަތް ކުރަމުންދާ ކަމަށް ވިދާޅުވެފައެވެ. އަދި އާންމުންގެ ފެންނަ ނުފެންނަ ވޯޓާއި ރިޔާސީ އިންތިހާބު އެއްބުރުން ނިންމަން ބަދަލުކުރުމަށް މެމްބަރުންގެ އެއްބާރުލުން ދެއްވުމަށާއި މެމްބަރުން އެކަމަށް ތާއިދުކުރުމަށް ރައީސް މުއިއްޒު ވަނީ އެދިވަޑައިގެންފައެވެ
މިއާއި އެކު ސަރުކާރުގެ އިސްވެރިންނާއި ސަރުކާރަށް ތާއިދުކުރާ އެކްޓިވިސްޓުން ވަނީ ރިޔާސީ އިންތިހާބު އެއްބުރުން ނިންމުމަށް ސޯޝަލް މީޑިއާ ކެމްޕެއިންނެއްވެސް ފަށާފައެވެ.
ރިޔާސީ އިންތިހާބު ބާއްވާ ގޮތް ބަދަލުކުރުމާ ގުޅޭ ގޮތުން ރައީސް މުއިއްޒު ކުރިން ވިދާޅުވެފައިވާ ގޮތުގައި، އެ މަނިކުފާނުގެ އަމިއްލަފުޅު ވިސްނުމަކީ ރިޔާސީ އިންތިހާބުގައި ދެވަނަ ބުރަށް ނުގޮސް ފުރަތަމަ ބުރާ ހިސާބުން ބޭފުޅަކު ކަނޑައެޅުމެވެ. އެހެންވެ، ޕްރިފަރެންޝަލް ނިޒާމަކަށް އަމަލުކުރަން މިހާރު ވެސް އެޓާނީ ޖެނެރަލް އޮފީހުން އަންނަނީ ދިރާސާތައް ކުރަމުން ކަމަށް މިދިޔަ އަހަރުގެ ނޮވެމްބަރު މަހު ރައީސް ވިދާޅުވި އެވެ.
އެ މަނިކުފާނު ވިދާޅުވިގޮތުގައި އޭރުން ހަރަދު ވެސް ކުޑަކުރެވޭނެ އެވެ. ރައީސް މުއިއްޒު ވިދާޅުވީ، އެފަދަ ބައެއް މުހިންމު ކަންކަން ތައާރަފު ކުރުމަށްޓަކައި ރައްޔިތުންގެ ގާތު އަހައިގެން ނިންމުމަކީ ކުރަން ޖެހޭނެ ކަމެއް ކަމަށެވެ.
މިކަމާއި ގުޅިގެން ކުރީގެ ރައީސް މުހައްމަދު ނަޝީދު އެކްސްގައި ކުރެއްވި ޕޯސްޓެއްގައި ވަނީ އެއްބުރުން ރިޔާސީ އިންތިހާބު ނިންމަން ތާއިދުކުރައްވާކަމަށް ހާމަކުރައްވާފައެވެ. އަދި އެ އުސޫލަކީ ރަނގަޅު އުސޫލެއްކަމަށްވެސް ރައީސް ނަޝީދު ވިދާޅުވިއެވެ.
ޕްރެފަރެންޝަލް ނިޒާމެއްގައި ވޯޓު ދޭން ޖެހޭނީ ކުރިމަތިލާ ކެންޑިޑޭޓުން ރޭޓްކޮށްގެންނެވެ. އެއީ އެންމެ ބޮޑަށް ކަމުދާ ކެންޑިޑޭޓަށް ’އެކެއް’، ދެވަނައަށް ކަމުދާ ކެންޑިޑޭޓަކަށް ’ދޭއް’، މިފަދަ ގޮތަކަށެވެ. ރާއްޖޭގައި މިހާރު ވޯޓުލާ ނިޒާމާ ހިލާފަށް، ވޯޓު ކަރުދާހުގައި ކެންޑިޑޭޓާ ދިމާލަށް އޮންނަ ގޮޅީގައި ޖަހާނީ ނަންބަރެވެ
50 ޕަސެންޓަށް ވުރެ ގިނަ މީހުން އެއް ކެންޑިޑޭޓަކަށް ’އެކެއް’ގެ ރޭންކު ދީފިނަމަ އެ ކެންޑިޑޭޓަކު އިންތިހާބު ކާމިޔާބުކުރީއެވެ. ނޫން ނަމަ ދެން އެންމެ މަދުން ވޯޓު ލިބުނު ކެންޑިޑޭޓުންނަށް ބަލައި، މަދުން ވޯޓު ލިބުނު ކެންޑިޑޭޓުން އުނިކޮށް، އުނިކުރި ކެންޑިޑޭޓުންނަށް ލިބުނު ވޯޓުތަކުގައި ހިމެނޭ ދެން އޮތް ނަންބަރުގެ ވޯޓުތައް ގުނައި ކުރިން ލިބުނު ވޯޓުތަކަށް އެއްކުރަމުން ދާނެއެވެ.
ޕްރިފަރެންޝަލް ވޯޓިން ނިޒާމަކަށް ދާން ތާއީދުކުރާ ފަރާތްތަކުން ގަބޫލުކުރާ ގޮތުގައި، އެ ބަދަލާ އެކު ރިޔާސީ އިންތިހާބުގެ ދެ ބުރަށް މިލިއަނުން ކުރާ ހަރަދުތައް ސަލާމަތްވެ، މެޖޯރިޓީ ތާއީދު އޮތީ ކޮން ކެންޑިޑޭޓަކަށްކަން އެނގިގެންދާނެ އެވެ.
ރިޔާސީ އިންތިހާބުގެ ދެވަނަ ބުރު އުވާލުމުގެ ވިސްނުން ރައީސް މުއިއްޒު ފުރަތަމަ ހާމަކުރެއްވީ މިދިޔަ އަހަރުގެ ޖުމްހޫރީ ދުވަހުގެ ޖަލްސާގައެވެ
އޭރު ރައީސް ވިދާޅުވެފައިވަނީ މިއީ އެޓަރނީ ޖެނެރަލާ ހަވާލުކޮށްގެން ދިރާސާ ކުރަމުންދާ ކަމެއް ކަމަށާއި ރައްޔިތުން އެގޮތަށް ދެކޭނަމަ 2028 ގެ އިންތިހާބު ކުރިއަށް ގެންދާނީ އެއްބުރަށް ކަމަށެވެ.
ރާއްޖޭގައި ރިޔާސީ އިންތިހާބު ބާއްވަން ފެށިފަހުން ފުރަތަމަ ބުރުގައި 50 ޕަސަންޓަށްވުރެ މަތިން އެއްވެސް ކެންޑިޑޭޓަކަށް ވޯޓު ލިބިފައެއް ނުވެއެވެ
ހަތަރު އިންތިހާބުގައިވެސް ވެރިކަން ލިބުނީ ދެވަނަ ބުރަކަށް ގޮސް ކޯލިޝަން ހަދައިގެންނެވެ.
