މިނިސްޓްރީ އޮފް ހެލްތާއި މާލޭ ސިޓީ ގްރޫޕް އޮފް ހޮސްޕިޓަލްސް އިން ޞިއްޙީ މަސައްކަތްތެރިން ލައްވާ ރަސްމީ މަސައްކަތު ގަޑީގެ އިތުރަށް ކުރުވާ މަސައްކަތަށް އިތުރުގަޑީގެ ފައިސާ ހަމައަށް ނުދޭ މައްސަލައިގައި މޯލްޑިވްސް ހެލްތް ޕްރްފެޝަނަލްސް ޔޫނިއަން (އެމް.އެޗްޕީޔޫ) އިން އަނެއްކާވެސް ކަންބޮޑުވުން ފާޅުކޮށްފިއެވެ.
މިގޮތުން އެމްއެޗްޕީޔޫއިން ހޮނިހިރު ދުވަހު ވަނީ ކަންބޮޑުވުން ފާޅުކޮށް އެކްސްގައި ޕޯސްޓެއް ކޮށްފައެވެ. އަދި މިއާއެކު އެ ޔޫނިއަނުން ނެރެފައިވާ ނޫސްބަޔާންވެސް ވަނީ ޙިއްސާކޮށްފައެވެ.
އެމްއެޗްޕީޔޫއިން ހޮނިހިރު ދުވަހު ނެރުނު ނޫސް ބަޔާނުގައި މިކަމަށް އަލިއަޅުވާލައި މިމައްސަލަ މީގެ ކުރިން ފާޅުކުރުމުން 20 މާރޗް 2025 ގައި ސަރުކާރުން ދައުލަތުގެ ޕޭ ފްރޭމް ވޯރކްގެ މިންގަނޑުތަކުގެ 7ވަނަ އިޞްލާޙު ގެޒެޓުކޮށް ޢަމަލުކުރަން ފަށާފައިވާކަމަށް ބުނެފައެވެ. އެހެންނަމަވެސް މި އިޞްލާޙުން އަދި ކަމާގުޅޭ މުޢައްސަސާތަކުންވެސް މިއިޞްލާޙު މާނަ ކުރަމުންދާގޮތުން ރަސްމީ ބަންދު ދުވަސްތަކުގައްޔާއި އެހެނިހެން ދުވަސްތަކުގައިވެސް ރަސްމީ ގަޑީގެ އިތުރުން ޞިއްޙީ މަސައްކަތްތެރީން ލައްވާ ކުރުވާ މަސައްކަތަށް ލިބެންޖެހޭ ހަމަ އުޖޫރައަށް ފުރިހަމަ ޙައްލެއް ނުލިބޭކަން އެ ޔޫނިއަންއިން ފާޅުކޮށްފަވެއެވެ.
އެހެންކަމުން ވަޒީފާއާއިބެހޭ ޤާނޫނުގެ 38 ވަނަ މާއްދާއަށް ރިއާޔަތްކޮށް އެމާއްދާގައިވާގޮތުގެ މަތީން ޢަމަލުކުރުމަށް ކަމާގުޅުންހުރި ހުރިހާ ޢިދާރާއަކަށް އަނެއްކާވެސް ތަކުރާރުކޮށް އެ ޔޫނިއަނުންވަނީ ގޮވާލާފައެވެ.
މީގެ އިތުރުންވެސް 30 ނޮވެމްބަރ 2023 ގައި ސިވިލް ސާރވިސްއިން ނެރިފައިވާ ސާރކިއުލާއަކަށް ރިޢާޔަތްކޮށް އެމްއެޗްޕީޔޫއިން ވަނީ އިދާރާތަކުން ޞިއްޙީ މަސައްކައްތެރީން ލައްވާ އެ ސާރކިއުލާގައި ބަޔާންކޮށްފައިވާ މިންގަނޑުތަކާއި ޙިލާފަށް ޢަމަލުކުރަމުން ދާތީވެ އެކަމާއިވެސް ނުހަނު ކަންބޮޑުވާކަން ފާޅުކޮށްފައެވެ.
ޞިއްޙީ ޙީދުމަތްތެރީން ލައްވާ މަޖުބޫރުން ކުރުވާ މަސައްކަތްކުރުން ހުއްޓުވާލައި ދަޢުލަތުގެ ޕޭ ފްރޭމްވޯރކް ގައި އިތުރު ގަޑީގެ ފައިސާ ދިނުމުގައި މިހާރު ކަނޑައަޅާފިއަިވާ 10 އިން ސައްތައިގެ ކެޕް އުވާލުމަށާއި ޞިއްޙީ މަސައްކަތްތެރީން ލައްވާ ހުކުރު ދުވަސްތަކާއި ސަރުކާރު ބަންދު ދުވަސް ތަކާއި އަދި މީގެ އިތުރުން ރައީސުލްޖުމްހޫރިއްޔާގެ އޮފީހުން ސަރުކާރު ބަންދު ދުވަހެއްގެ ގޮތުގައި ކަނޑައަޅާ ދުވަސްތަކުގައި މުވައްޒަފުން ލައްވާ މަސައްކަތް ކުރުވަނީނަމަ އިތުރުގަޑި އަދި ބަންދު ދުވަހުގެ އެލަވަންސްއަށްވާ ފައިސާ ވީ އެންމެ އަވަހަކަށް ދިނުމަށް އެ ޔޫނިއަނުންވަނީ ގޮވާލާފައެވެ.
އަދި މީގެ އިތުރުން, 1 މެއި 2023 އިން ފެށިގެން ހިނގާދިޔަ މުއްދަތުގައި ޞިއްޙީ މަސައްކަތްތެރިން ލައްވާ އިތުރުގަޑީގައި ނުދީ މަޖުބޫރުން ކުރުވާފައިވާ މަސައްކަތަށްވާ ފައިސާ އެފަރާތްތަކަށް ވީއެންމެ އަވަހަކަށް ދިނުމަށް ސަރުކާރަށް ތަކުރާރުކޮށް މޯލްޑިވްސް ހެލްތް ޕްރްފެޝަނަލްސް ޔޫނިއަން (އެމް.އެޗްޕީޔޫ) އިން ވަނީ ގޮވާލާފައެވެ.
ގްރޭޓަރ މާލެ ގްރޫޕް އޮފް ހޮސްޕިޓަލްސް އަދި މިނިސްޓްރީ އޮފް ހެލްތްގެ ދަށުގައިވާ ހުރިހާ ހެލްތް ކެއަރ ފެސިލިޓީސްގައި މަސައްކަތްކުރާ މަސައްކަތްތެރިންގެ ތެރެއިން ޞިއްޙީ ދާއިރާގެ ދޭ ފްރޭމްވޯކަށް ޙިޖުރަކޮށްފައިވާ މަސައްކަތްތެރިން ލައްވާ އިތުރު ގަޑީގައި މަސައްކަތްކުރުވާ އެ ގަޑީގެ ފައިސާ ހަމައަށް ނުދީ މަަސައްކަތްކުރުވަމުންގެންދާތީ އެކަމަކީ އެ ޔުނިއަނުން ނުހަނު ކަންބޮޑުވާ ކަމެއް ކަމަށް ފާހަގަކޮށް އެ ޔޫނިއަންއިން 28 ފެބްރުއަރީގައި ވެސް ބަޔާނެއްނެރެ މިކަމުގެ ކަންބޮޑުވުން ފާޅުކޮށްފައިވާކަން ފާހަގަކޮށްލެވެއެވެ.
