ރައީސް ޔާމީނާ ދެކޮޅަށް ކުރީ ސަރުކާރުގެ ދުވަސްވަރު ކޯޓަށް ހުށަހެޅި ރ. ފުއްގިރި ކުއްޔަށް ދޫކުރުމުގައި ރިޝްވަތު ޤަބޫލު ކުރައްވައި، މަނީ ލޯންޑާކުރި ކަމަށް ތުޙުމަތު ކުރެވޭ މައްސަލައިގެ އަޑު އެހުމެއް ތާވަލުކޮށްފި އެވެ.
ރ. ފުއްގިރި ކުއްޔަށް ދޫކުރުމުގައި ރިޝްވަތު ޤަބޫލު ކުރައްވައި، މަނީ ލޯންޑާކުރެއްވިކަމަށް ކުރީގެ ރައީސް އަބްދުﷲ ޔާމީންގެ މައްޗަށް ތުހުމަތުވާ މައްސަލައިގެ އަޑުއެހުމެއް ކްރިމިނަލް ކޯޓުގައި ތާވަލުކޮށްފައިވަނީ އޭޕްރީލް މަހުގެ 28 ވަނަ ދުވަހުގެ ހެނދުނު 9:00 ގައެވެ.
އާރަށް ކުއްޔަށް ދޫކުރުމުގައި ހިންގި ކަމަށް ބުނާ ޙިޔާނާތުގެ މައްސަލައިގައި ކްރިމިނަލް ކޯޓުން ރައީސް ޔާމީންގެ މައްޗަށް 11 އަހަރުގެ ޖަލު ހުކުމެއް 2022، ގައި ވަނީ އިއްވާފައެވެ. އޭގެ ފަހުން ރައީސް ޔާމީން މިނިވަންވެވަޑައިގަތީ 2024 ވަނަ އަހަރުގެ އޭޕްރިލް މަހުގެ ތެރޭގައެވެ
އެމްއެމްޕީއާރު މެދުވެރިކޮށް ފުއްގިރި ކުއްޔަށް ދޫކުރި މައްސަލާގައި ރިޝްވަތުގެ ގޮތުގައި އެއް މިލިއަން ޑޮލަރު ޤަބޫލު ކުރައްވައި، އެ ފައިސާ ލޯންޑާ ކުރެއްވި ކަމަށް ބުނެ ރައީސް ޔާމީންގެ މައްޗަށް ދަޢުވާ ކުރާއިރު، ރައީސް ޔާމީންގެ އިތުރުން އެ މައްސަލާގައި ސަން ކޮންސްޓްރަކްޝަން ކުންފުންޏާއި ސަން އިންވެސްޓްމަންޓްގެ މައްޗަށް ވެސް މަނީ ލޯންޑްރިންގެ ދައުވާކުރެއެވެ.
ގިނަ ދުވަސްތަކަކަށް ފަހު، ރައީސް ޔާމީންގެ މައްސަލަ އަލުން ތާވަލުކޮށްފައިވާއިރު ރައީސް ޔާމީން މިނިވަން ކުރުމަކީ ރައީސް ޑރ. މުއިއްޒުގެ ރިޔާސީ ވައުދުފުޅެއްކަން ފާހަގަކޮށްލެވެއެވެ.
