މެލޭޝިއާގެ ކުރީގެ ބޮޑުވަޒީރު، ހިޒް އެކްސެލެންސީ ޢަބްދުﷲ އަޙްމަދު ބަދަވީ އަވަހާރަވުމާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަޢުޒިޔާ ވިދާޅުވެއްޖެއެވެ.
މެލޭޝިއާގެ ބޮޑުވަޒީރު، ހިޒް އެކްސެލެންސީ އަންވަރު އިބްރާހީމަށް ރައީސް ފޮނުއްވި މެސެޖުގައި ވަނީ، މަރުޙޫމް ޢަބްދުﷲ އަޙްމަދު ބަދަވީ އަވަހާރަވި ޚަބަރު އެއްސެވީ ފުން ހިތާމައާއެކު ކަމުގައި ވިދާޅުވެ، އެމަނިކުފާނަކީ އާންމު ޚިދުމަތާއި ޤައުމުގެ ކުރިއެރުމަށް ހަޔާތުގެ ބޮޑު ބައެއް ޚާއްޞަކުރެއްވި، ދައުލަތުގެ ޝަރަފުވެރި ބޭފުޅެއްގެ ގޮތުގައި ފާހަގަކުރައްވައިފައެވެ.
މީގެ އިތުރުން، މަރުޙޫމް ޢަބްދުﷲ އަޙްމަދު ބަދަވީ ވަނީ މެލޭޝިއާގެ އިޤުތިޞާދީ ތަރައްޤީއަށް މުހިއްމު މަސައްކަތްތަކެއް ކޮށްދެއްވާފައި ކަމަށް ވިދާޅުވެ ރައީސް ވަނީ، މެދުމިނާއި، ޤައުމީ އެއްބައިވަންތަކަމާއި ހެޔޮ ވެރިކަން ކުރިއެރުވުމަށް މަރުޙޫމް ބަދަވީ ކުރެއްވި މަސައްކަތްތައްވެސް ފާހަގަކުރައްވައިފައެވެ.
ރައީސުލްޖުމްހޫރިއްޔާގެ މެސެޖު ނިންމަވާލައްވާފައިވަނީ، ފުން ހިތާމައިގެ މިދަނޑިވަޅުގައި މަރުޙޫމް އަބްދުالله އަޙްމަދު ބަދާވީގެ ޢާއިލާއަށާއި މެލޭޝިއާގެ ސަރުކާރާއި، ރައްޔިތުންނަށް ތައުޒިޔާ ވިދާޅުވެ، ޙަމްދަރުދީ ފޮނުއްވަމުންނެވެ.
މަރުޙޫމް އަބްދުالله އަޙްމަދު ބަދާވީއަކީ 2003 ވަނަ އަހަރުން 2009 ވަނަ އަހަރަށް ޚިދުމަތް ކުރެއްވި، މެލޭޝިއާގެ 5 ވަނަ ބޮޑުވަޒީރެވެ. މަރުޙޫމް އަބްދުالله އަޙްމަދު ބަދާވީގެ ބޮޑުވަޒީރުކަމުގައި އަމާޒު ހިއްޕެވީ އިސްލާމީ އުސްލޫބު ފަތުރުއްވައި، މެލޭޝިއާގެ އިޤްތިޞާދަށް ކުރިއެރުން ހޯއްދަވައިދެއްވައި، ޤައުމީ އެއްބައިވަންތަކަން ޤާއިމުކުރެއްވުމަށެވެ.
ޢަބްދުﷲ އަޙްމަދު ބަދަވީ އަވަހާރަވީ ހޯމަދުވަހުގެރޭ 7:10 ހާއިރު ވެރިރަށް ކުއަލަލަމްޕޯރުގެ ނޭޝަނަލް ހާރޓް އިންސްޓިޓިއުޓްގައި ކަމަށް ޢަބްދުﷲ އަޙްމަދު ބަދަވީގެ ކޮއްކޮ އަދި ކުރީގެ ހެލްތް މިނިސްޓަރ ޚައިރީ ޖަމާލުއްދީން އިންސްޓަގްރާމް ޕޯސްޓެއްގައި ވިދާޅުވެފައިވާއިރު އަވަހާރަވި ސަބަބެއް ހާމަކުރައްވާފައެއްނުވެއެވެ.
