މިލަދުންމަޑުލު ދެކުނުބުރީ ފޮއްދޫ ކައުންސިލުން އިންތިޒާމްކޮށްގެން މިއަހަރު ރަމްޟާން މަހު ބޭއްވި ދީނީ ސުވާލު މުބާރާތުން އެއްވަނަ އެރަށު ނިޝާން ޙައްވާ ނަފްޙާ ހޯދައިފިއެވެ. ރައްޔިތުންގެ މެދުގައި ދީނީ ހޭލުންތެރިކަން އިތުރު ކުރުމުގެ މަޤްޞަދުގައި ފޮއްދޫ ކައުންސިލުން އިންތިޒާމްކޮށްގެން ދީނީ ސުވާލު މުބާރާތެއް ކޮންމެ އަހަރެއްގެ ރަމްޟާން މަހު ބާއްވަމުން ގެންދެއެވެ. މިއީ މިގޮތުން ބޭއްވުނު 2ވަނަ މުބާރާތެވެ. މިއަހަރުގެ މުބާރާތުން 2ވަނަ ހޯދާ ފައިވަނީ އެރަށު ގަހާ އާއިޝަތު އަފާއެވެ. ތިންވަނަ ހޯދާފައި ވަނީ އެރަށު ބަހާރުގޭ އައިޝަތު ލަޔާލު މުޙަންމަދެވެ. މިމުބާރާތުން އެއްވަނަ އަންނަ ފަރާތަކަށް ފޮއްދޫ ކައުންސިލުން ކަނޑައަޅާފައިވަނީ ޢުމުރާ ދަތުރެކެވެ.
މުބާރާތުގެ އިނާމު ޙަވާލު ކޮށްދެއްވާފައި ވަނީ، އެކަމަށްޓަކައި ފޮއްދޫ ޕްރީސްކޫލްގައި ބޭއްވުނު ޚާއްސަ ހަފްލާއެއްގައެވެ. މިޙަފްލާ ޝަރަފްވެރި ކޮށްދެއްވާފައި ވަނީ ފޮއްދޫ ކައުންސިލްގެ ރައީސް މުޙަންމަދު މޫސާއެވެ. މިހަފްލާގައި ދީނީ ސުވާލު މުބާރާތުގެ ވަނަވަނަ އައި ފަރާތްތަކަށް އިނާމު ދިނުމުގެ އިތުރުން މިއަހަރު ބޭއްވުނު ބޭއްވުނު ފޮއްދޫ ކައުންސިލްގެ 6ވަނަ ގުރުއާން މުބާރާތުން ވަނަ ހޯދި ފަރާތްތަކަށް އިނާމު ދިނުމާއި ޤުރުއާން ބޭހޭ މަރުކަޒާއި ގުޅިގެން ބޭއްވި ޖަމާއަތްތެރިން ތަމްރީން ކުރުމުގެ ޕްރޮގްރާމުން ފާސްވި ފަރާތްތަކަށް ސެޓިފިކެޓް ދިނުން އޮތެވެ. މިފަރާތްތަކަށް އިނާމާއި ސެޓިފިކެޓް ހަވާލުކޮށްދެއްވީ ފޮއްދޫ ކައުންސިލްގެ ރައީސް އާއި ނާއިބް ރައީސް އާއި މެމްބަރުން ކައުންސިލްގެ އިސްވެރިންނާއި، އތމ ކޮމެޓީގެ މެމްބަރުންނާއި އަދި ފޮއްދޫގެ ސަރުކާރުގެ އިދާރާތަކުގެ ވެރިންނެވެ.
