އއ. ރަސްދޫގައި ކޮޓަރިއެއް ރޯވެ ހިނގި އަލިފާނުގެ ހާދިސާގައި ފިހުނުު ދެމަފިރިންގެ އާއިލާއާ ނައިބު ރައީސް ހުސައިން މުހައްމަދު ލަތީފް ބުދަދުވަހު ބައްދަލުކުރައްވައިފިއެވެ.
ނައިބު ރައީސް ހުސައިން މުހައްމަދު ލަތީފް އައިޖީއެމްއެޗަށް ވަޑައިގެން އާއިލާއާ ބައްދަލުކުރައްވާ މަންޒަރު ފެންނަ ފޮޓޯތަކެއް ސަރުކާރުގެ ބައެއް ބޭފުޅުން ސޯޝަލް މީޑިއާގައި ވަނީ ޕޯސްޓްކުރައްވައިފައެވެ.
ދެމަފިރިންގެ ހާލު ވަރަށް ސީރިއަސް އެވެ. އުމުރުން 31 އަހަރުގެ ދެ މީހުނަށް ފަރުވާ ދެމުން ދަނީ ވެންޓިލޭޓަރުގައި ކަމަށް އައިޖީއެމްްއެޗުން އަންގާރަ ދުވަހު ބުނެފައިވެއެވެ. އައިޖީއެމްއެޗުން މަޢުލޫމާތު ދެއްވާފައިވާ ގޮތުގައި، މި ދެމީހުންގެ ގައިގެ ވަރަށް ބޮޑު ބައެއް ވަނީ ފިހިފައެވެ. އަދި އެމީހުންގެ ހާލަތު ވަރަށް ސީރިއަސްކަމަށާއި، ސަލާމަތްވާނެ ކަމުގެ އުންމީދު ކުޑަކަމަށްވެސް ބުނެފައިވެއެވެ.
އަލިފާނުގެ ހާދިސާ ހިނގަން މެދުވެރިވި ސަބަބެއް މިހާތަނަށް އެނގިފައިނުވާއިރު، ފުލުހުން ގެންދަނީ މައްސަލަ ތަހުޤީގު ކުރަމުންނެވެ.
