ކަރަންޓު ކެނޑޭ މައްސަލައިގައި އައްޑޫ ރައްޔިތުން މުޒާހަރާކޮށްފި

އައްޑޫއަށް ދިމާވެފައިވާ ކަރަންޓު ކެނޑުމުގެ މައްސަލަ ހައްލުނުވެ އައްޑޫ ސިޓީގެ ރައްޔިތުން ފެނަކަ އޮފީސް ދޮށުގައި އިޙްތިޖާޖުކޮށްފިއެވެ.

ހިތަދޫ ފެނަކަ އޮފީސް ދޮށުގައި މިއަދު ހަވީރު ކުރަން ފެށި އިހުތިޖާޖުގެ ބައިވެރިން ވަނީ ކަރުދާސް ގަނޑުތަކުގައި އެ މީހުންގެ ކަންބޮޑުވުންތައް ލިޔެ، ޝުއޫރު ފާޅުކޮށްފައެވެ.

އެ ގޮތުން އިރުއިރުކޮޅުން ކަރަންޓު ކެނޑޭތީ ރައްޔިތުން ބޭނުންކުރަމުންދާ ފްރިޖާއި އޭސީފަދަ ކަރަންޓު ސާމާނު ހަލާކުވަމުންދާ ކަމަށް ބުނެފައިވާއިރު، އަނެއްބައި ރައްޔިތުންވަނީ ފެނަކައާއި ސަރުކާރުގެ ވެރިން ދޮގު ހަދަމުންދާ ކަމަށް ތުހުމަތުކޮށްފައެވެ.

އައްޑޫ ސިޓީގެ ގުޅިފައިވާ ރަށްތަކަށް ދިމާވެފައިވާ ކަރަންޓު ކެނޑުމުގެ މައްސަލަ ހައްލުކުރުމަށް 1.8 މެގަވޯޓުގެ ޖެނަރޭޓަރު ސެޓެއް އިންސްޓޯލްކުރީ މިދިޔަ މަހުގެ 21ވަނަ ދުވަހެވެ. އެހެން ނަމަވެސް، އަނެއްކާ ވެސް އައްޑޫން ކަރަންޓު ކެނޑުމުގެ މައްސަލަ ވަނީ ދިމާވާން ފަށައިފައެވެ.

ކަރަންޓު ކެނޑޭ މައްސަލަ ބޮޑުވެ، އެ ސިޓީގެ ރައްޔިތުން އިހުތިޖާޖަށް ނިކުތުން ނޫން ގޮތެއް ނެތް ކަމަށް އައްޑޫގެ މޭޔަރު، އަލީ ނިޒާރު ވިދާޅުވެފައިވަނިކޮށް، މިދިޔަ ބުދަ ދުވަހުގެ ރޭ ފެނަކައިގެ މެނޭޖިން ޑިރެކްޓަރު މުހައްމަދު ނަޖާހާއި ޑެޕިއުޓީ މެނޭޖިން ޑިރެކްޓަރު މުހައްމަދު އާރިފްވަނީ އައްޑޫ ސިޓީއަށް ވަޑައިގެންފައިވާކަން ފާހަގަކޮށްލެވެއެވެ.

އާއެކު އައްޑޫގެ ރައްޔިތުން ވަނީ އެއާޕޯޓު ދޮށަށް އެއްވެ، އެ މައްސަލައިގައި އަޑު އުފުލާފައެވެ. ރައްޔިތުން ވަނީ އަވަސް އަވަހަށް ކަރަންޓު ކެނޑޭ މައްސަލަ ހައްލުނުވާތީ އެކަމުގެ ކަންބޮޑުވުން ފާޅުކޮށް، އެ މައްސަލަ ހައްލުވާނީ ކޮން އިރަކުންތޯވެސް ސުވާލުކޮށްފައެވެ. އަދި، އައްޑޫއަށް ވަރަށް އަވަހަށް ގެންނާނެ ކަމަށް ބުނި އިންޖީނު ނުވަތަ ޖަނަރޭޓަރު ކޮބައިތޯ މުޒާހަރައިގެ ބައިވެރިން ސުވާލުކޮށްފައިވެއެވެ.

އަންނަ ހަފުތާގައި އެ ސިޓީއަށް 1.8 މެގަވޯޓުގެ ޖަނެރޭޓަރެއް ފޮނުވަން މަސައްކަތް ކުރަމުން އަންނަ ކަމަށް ފެނަކައިން ބުވެފައިވާއިރު އައްޑޫ ސިޓީ ކައުންސިލާއި އެ ސިޓީއަށް ނިސްބަތްވެ ވަޑައިގަންނަވާ މަޖިލިސް މެންބަރުން ވެސް ދަނީ މި މައްސަލައިގައި ކަންބޮޑުވުން ފާޅުކޮށް، ފެނަކައިގެ އިހުމާލު އޮތްކަމުގެ ތުހުމަތު ކުރައްވަމުންނެވެ. އައްޑޫއިން ކަރަންޓު ކެނޑޭ މައްސަލައިގައި އިދިކޮޅު އެމް.ޑީ.ޕީ އިން ވެސް ވަނީ މި ރަމަޒާން މަސް ފެށުމުގެ ކުރިން އައްޑޫގެ ރައްޔިތުންނަށް ދިމާވެފައިވާ ކަރަންޓުގެ މައްސަލަ ހައްލުކޮށްދިނުމަށް ގޮވާލާފަކަން ފާހަގަކުރެވެއެވެ.