އަޅުގަނޑުމެންނަށް ﷲ ސުބްޙާނަހޫ ވަތަޢާލާ ތަނަވަސްކަން ދެއްވާފައިވަނީނަމަ އެތަނަވަސްކަމުގެ ބޭނުން ހެޔޮގޮތުގައި ހިފުމާއިއެކު އެއިން ޒަކާތް ނެރެން ޖެހޭކަމަށް އިސްލާމީ ކަންތައްތަކާ ބެހޭ ވަޒީރު ޑރ. ޝަޙީމް ވިދާޅުވެއްޖެއެވެ.
ކޮންމެ އަހަރެއްގެ ރަމަޟާންމަހުގައި ބާއްވަމުން އަންނަ އިޙްޔާ ފޯރަމްތަކުގެ ތެރެއިން މިއަހަރުގެ ފޯރަމް ފެށްޓެވުމުގެ ގޮތުން ތަޤްރީރު ކުރެއްވީ އިސްލާމީ ކަންތައްތަކާ ބެހޭ ވަޒީރު ޑރ. ޝަޙީމެވެ. 1446 ވަނަ އަހަރުގެ ރަމަޟާންމަހުގެ އެންމެ ފުރަތަމަ އިޙްޔާ ފޯރާމް ޚާއްސަކޮށްފައިވަނީ ”ހެޔޮ ގޮތުގައި މުދާ ހޯދުމާއި ބޭނުން ކުރުން“ މި މަޢުޟޫއަށެވެ.
ކީރިތި ޤުރުއާނުގެ ބަސްފުޅުތަކުންނާއި ރަސޫލާގެ ސުންނަތުން ދަލީލު ނަންގަވާ ވަޒީރު ވަނީ މި މަޢުޟޫއަށް ފުޅާ ދާއިރާއެއްގައި ވާހަކަފުޅު ދައްކަވާފައެވެ. މިގޮތުން ޒަކާތާއި ބެހޭގޮތުން ވާހަކަދައްކަވުން ވަޒީރު ވިދާޅުވީ މުދަލުގައިވާ އެންމެ ބޮޑު ޙައްޤަކީ ﷲ ސުބްޙާނަހޫ ވަތަޢާލާގެ ޙައްޤުކަމަށެވެ. އަދި މުދަލުގެ މައްޗަށް ﷲ ސުބްޙާނަހޫ ވަތަޢާލާ ރުކުނެއް ކަނޑަ އަޅުއްވާފައިވާ ކަމަށާއި މިގޮތުން ޒަކާތަކީ އިސްލާމްދީނުގެ ރުކުނެއްކަމަށް ވަޒީރު ވިދާޅުވިއެވެ.
”މުދަލުގައި ވާ އެންމެ ބޮޑު ޙައްޤަކީ ﷲގެ ޙައްޤު. މުދަލުގެ މައްޗަށް ﷲ އިސްލާމްދީނުގެ ރުކުނެއް ކަނޑައަޅުއްވާފައިވޭ. އެއީ ޒަކާތް ދިނުން.“ ވަޒީރު ޑރ. ޝަޙީމް ވިދާޅުވިއެވެ.
މުދަލު ޒަކާތާއި ފިތުރު ޒަކާތުގެ މައްޗަށް އަލިއަޅުއްވާލާ ވާހަކަ ދައްކަވަމުން ވަޒީރު ވިދާޅުވީ މުދަލު ޒަކާތާއި ފިތުރު ޒަކާތަކީ ދެއެއްޗެއް ކަމަށެވެ.
އަދި ވަރަށް ގިނަ މީހުން މުދަލު ޒަކާތާއި ފިތުރު ޒަކާތާއި ބެހޭ ގޮތުން ސުވާލު ކުރައްވާކަމަށް ވަޒީރު ވިދާޅުވިއެވެ. މިގޮތުން ބައެއް މީހުންނަށް ހީވެފައި އޮންނަނީ ފިތުރު ޒަކާތް ދެއްކީމައި މުދަލުން ޒަކާތް ނެރެވުނީކަމަށް ވަޒީރު ވިދާޅުވިއެވެ. އެކަމަކު ޙަޤީގަތަކީ އެއީ ނޫން ކަމަށާއި މިގޮތުން މުދަލުގެ ޒަކާތް ނެރުމަކީ ވަކިކަމެއް ކަމަށާއި އަދި ފިތުރު ޒަކާތަކީ ވަކި ކަމެއްކަން ވަޒީރު ވިދާޅުވިއެވެ. މިކަން އޮޅުން ފިލުއްވައިދެއްވަމުން ވަޒީރު އިތުރަށް ވިދާޅުވީ ފިތުރު ޒަކާތަކީ ރަމަޟާންމަހާއި ގުޅިގެން ނެރެންޖެހޭ ޒަކާތެއް ކަމުގައެވެ. އަދި ޢީދު ނަމާދުގެ ކުރިން ފިތުރު ޒަކާތް ދައްކަންޖެހޭނެކަން ވަޒީރު ފާހަގަކުރެއްވިއެވެ. މީގެ ބަދަލުގައި. މުދަލު ޒަކާތަކީ އޭގައި ކަނޑަ އެޅިފައިވާ މިންވަރާއި ވާޖިބުތަކުގެ މަތިން ނިސާބު ހަމަވެއްޖެ ކަމުގައިވަނީނަމަ އަދި ޝަރުތުތަކަށް ފެތޭނަމަ ނެރެންޖެހޭ އެއްޗެއްކަމަށް ވަޒީރު ވިދާޅުވިއެވެ.
މީގެ އިތުރުންވެސް މިރޭގެ މަޢުޟޫގައި ތަޤްރީރު ކުރައްވަމުން ވަޒީރުވަނީ ވިޔަފާރީގައި މަކަރު ހެދުމާއި , ރިބާކެއުމާއި, ރިޝްވަތު ދިނުމާއި އަމާނާތްތަކަށް ޙިޔާނާތްތެރިވުމާއި ވައްކަން ކުރުމާއި އަދި އަމުދުން ދައުލަތުގެ މުދަލުން ވައްކަންކުރުމާއި މިކަންކަމަކީ މާތް ﷲ ކަނޑައެޅިގެން ޙަރާމްކުރައްވާފައިވާ ކަންތައްތައްކަމަށް ވިދާޅުވެފައެވެ. އަދި މިކަންކަމުން މުޖުތަމަޢު ސަލާމަތް ކުރެވިއްޖެ ކަމަށްވަނީނަމަ އަޅުގަނޑުމެންގެ މުޖުތަމަޢުއަކީ ބާއްޖަވެރި މުޖުތަމަޢުއަކަށްވާނޭ ކަމުގައި މިރޭގެ ތަޤުރީރުގައި ވަޒީރު ވިދާޅުވިއެވެ.
