މަޖިލީހުގައި ކުރިއަށްދިޔަ ޖަލްސާގައި އެމްޑީޕީގެ ތިން މެމްބަރަކު ތަޅުމުން ބޭރުކޮށްލައިފިއެވެ.
މަޖިލިހުގެ ރިޔާސަތުގައި އިންނެވި މަޖިލިހުގެ ރައީސް އަބްދުއްރަހީމް އަބްދުﷲ، ނަން އިއްވެވީ ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމާއި ވައިކަރަދޫ ދާއިރާގެ މެމްބަރު ހުސެއިން ޒިޔާދާއި ކެންދޫ ދާއިރާގެ މެމްބަރު މައުރޫފް ޒަކީގެ ނަމެވެ. މިއަދު އެ މެމްބަރުންނަށް ތަކުރާރުކޮށް ނަސޭހަތްތެރިވުމަށް ފަހު، އަބްދުއްރަހީމް ވަނީ ނަން އިއްވައިފައެވެ. ތިން މެމްބަރުން ވެސް ނެރެން ޖެހުނީ ސެކިއުރިޓީންގެ އެހީގައެވެ.
އިއްޔެގެ ޖަލްސާގައި ވެސް މީކާއިލްގެ ނަން އިއްވައި މަޖިލިހުގެ ތަޅުމުން މަޖިލީހުގެ ތަޅުމުން އޭނާ ނެރިފަވެއެވެ. އެކަމާއި ގުޅިގެން މީކާއިލް އެކްސްގައި ކޮށްފައިވާ ޕޯސްޓެއްގައި ބުނެފައިވަނީ އެއީ ތާރީހުގައިވެސް ނިޒާމީ ނުކުތާ ނަންގަވައިގެން ނަންއިއްވައި މެމްބަރަކު މަޖިލީހުން ބޭރުކުރި ފުރަތަމަ ފަހަރު ކަމަށެވެ.
މަޖިލިހުގެ ތަޅުން ހޫނުވީ ސުޕްރީމް ކޯޓުގެ ފަނޑިޔާރުންގެ އަދަދު މަދު ކުރުމަށް ހޮޅުދޫ ދާއިރާގެ ޕީއެންސީ މެމްބަރު އަބްދުއްސައްތާރު މުހައްމަދު ހުށަހެޅުއްވި ބިލް ކޮމިޓީން ފާސްކޮށް، ރިޕޯޓު ހުށަހެޅުމަށް ފަހުގައި އެ ރިޕޯޓަށް ބަހުސް ހިނގަމުން ދިޔަ ދަނޑިވަޅުގައެވެ. އެމްޑީޕީގެ މެމްބަރުން ހިތްހަމަޖެހިވަޑައިނުގަތީ އެ ބިލް ފާސް ކުރަން އުޅޭތީއެވެ.
އެމްޑީޕީގެ މެންބަރުން ވަނީ ހިތްހަމަނުޖެހުން ފާޅުކޮށް އިދާރީ މޭޒާ ކައިރިވެ އެތަނުގެ ތަކެއްޗަށް ގެއްލުން ދިނުމަށް މަސައްކަތްކޮށްފައެވެ. އެގޮތަށް ކަންތައް ނުކުރެއްވުމަށް ރިޔާސަތުގައި އިންނެވި އަބްދުއްރަހީމް ނަސޭހަތްތެރިވެވަޑައިގަތެވެ. ނަމަވެސް އެ މެމްބަރުން ވަނީ މަޖިލިހުގައި އަޑުގަދަ ކުރައްވައިފައެވެ.
ސުޕްރީމް ކޯޓުގެ ފަނޑިޔާރުންގެ ބެންޗްގެ އަދަދު ހަތަކުން ފަހަކަށް މަދުކުރަން ޤާނޫނަށް އިސްލާހު ގެނައުމުގެ ބިލުގައި ބަޔާންކޮށްފައިވާ ގޮތުން، ފަނޑިޔާރުން ވަކިކުރެވޭނީ ޖުޑީޝަލް ސަރވިސް ކޮމިޝަނުން ހުށަހަޅައި، މަޖިލީހުގެ 2/3 އަޣުލަބިއްޔަތުން ފާސްވުމުންނެވެ. އަދި ޖޭއެސްސީން ވަކިކުރާ ފަނޑިޔާރުންގެ ނަންތައް ބިލަށް ޢަމަލުކުރަން ފަށާތާ ފަސް ދުވަހުގެ ތެރޭގައި މަޖިލީހަށް ހުށަހަޅަންޖެހެއެވެ. މަޖިލީހުން ހަތް ދުވަހުގެ ތެރޭގައި މިކަމާމެދު ގޮތެއް ނިންމަންޖެހޭނެއެވެ.
ފެހި ގާނޫނުއަސާސީގެ ދަށުން އެކުލަވާލެވުނު އިންތިގާލީ ސުޕްރީމް ކޯޓުގައި ފަސް ފަނޑިޔާރުން ތިއްބެވިއެވެ. 2010 ގައި ހަތް ފަނޑިޔާރުންގެ މައްޗަށް ދާއިމީ ކޯޓެއް އުފެދުނެވެ. 2014 ގައި އަދަދު ފަހަކަށް މަދުކުރެވުނު ނަމަވެސް، 2019 ގައި އަނެއްކާވެސް ހަތަކަށް އިތުރުކުރެވުނެވެ.
މިހާރު ސުޕްރީމް ކޯޓުގައި ތިއްބެވީ އުއްތަމަ ފަނޑިޔާރު އަހްމަދު މުއުތަސިމް އަދުނާންއާއި އިތުރު ހަ ފަނޑިޔާރުންނެވެ. މި ބިލު ފާސްވެއްޖެނަމަ، ސުޕްރީމް ކޯޓުގެ އޮނިގަނޑަށް ބޮޑު ބަދަލެއް އަންނާނެއެވެ.
