ދުނިޔޭގެ ބައެއް ޤައުމުތައް ލާމަރުކަޒީ ނިޒާމަށް ހިންގަމުން ގެންދާތާ އަހަރުތަކެއް ވީނަމަވެސް ރާއްޖޭގައި ރަސްމީކޮން މިނިޒާމު ފެށުނީ 2008ވަނަ އަހަރު ޢަމަލު ކުރަން ފެށި ޤާނޫނު އަސާސީ އަށް ފަހުގައެވެ. ރަށާއި އަތޮޅުގެ ކަންކަން ނިންމުގެ ބާރާ ބަސް ބުނުމު ފުރިހަމަ އިޚްތިޔާރު ރައްޔިތުން އިންތިޚާބު ކުރާ ބަޔަކަށް ލިބިގެން ދިޔައީ “ ފެހި“ ޤާނޫނު އަސާސީއަށް އަމަލު ކުރަން ފެށުނު ފަހުންނެވެ.
ލާމަރުކަޒު މިބަސް ދިވެހި ބަހުގެ ރަދީފުގައި ވަނީ، ”ކަންކަންނިންމުމާއި ރޭވުމާއި ހިންގުމުގެ މަސައްކަތްތައް ތަންފީޒީ އިދާރާތަކުން ބެލެހެއްޓުން“ ކަމަށެވެ. ވީމާ، ރަށްރަށުގެ އިދާރީ އޮފީސްތަކަކީ އެރަށެއްގައި ކަންކަން ހިންގާ ތަންފީޒު ކުރަން ޖެހޭ އިދާރާ ކަމަށްވީ ހިނދު ރައްޔިތުންނަށް ދޭން ޖެހޭ ޚިދުމަތްތައް މަރުކަޒުކޮށް މައި ސަރުކާރުން އެންގެވީމަ ނޫނީ ރަށުގެ އެއްވެސް ކަމެއް ނުކުރެވޭ ގޮތަށް އޮތް އޮތުން ބަދަލުކޮށް ރަށުގެކަންކަން ރަށުން ނިންމާ ރައްޔިތުންނާ ގާތުން ޚިދުމަތް ދިނުމަކީ މިއަދު ދިވެހިން ބަލައިގެންފާ ނިޒާމެކެވެ. ވެރި މީހާ ނުވަތަ މައި ސަރުކާރުން އެންގެވިމާ ނޫނީ ކުޑަކުދީންގެ ޕާކެއްވެސް ނުހެދޭ ނިޒާމު މިވަނީ އުވާލާފައެވެ. މިއަދު ލާމަރުކަޒީ އުޞޫލުން ހިންގުމުގެ ނިޒާމް ރާއްޖޭގައި ޤާއިމްވެފައި ވާއިރު ސިޔާސީ ޕާޓީތަކާއި ސިޔާސީ މައިދާނުގައި މަސައްކަތް ކުރައްވާ ބައެއް ފަރާތްތަކުން ލާމަރުކަޒީ ނިޒާމަކީ އެބޭފުޅުން ގެނެސް ދެއްވި ނިޒާމެއް ކަމުގައި ރައްޔިތުންނަށް ވިސްނައި ދެއްވުމުގެ މަސައްކަތް ކުރައްވައެވެ. ކޮންމެ ސިޔާސީ ޕާޓީއަކުން ވެސް މަސައްކަތް ކުރައްވަނީ އެޕާޓީ އަކީ ލާމަރުކަޒީ ނިޒާމަށް އެންމެ ފަރިތަ ކައުންސިލްތަކަށް އާރާއި ބާރު ދިނުމަށް އެންމެ ބޮޑަށް މަސައްކަތް ކުރާ ޕާޓީ ކަމަށް ދައުވާ ކުރެއްވުމަށެވެ. ލާމަރުކަޒީ ނިޒާމު ރާއްޖެއަށް ގެނެސް ދިނުމަށް މަސައްކަތް ކުރީ ތިމަންމެން ކަމަށް ކޮންމެ ޕާޓީއަކުންވެސް ފާހަގަ ކުރެއެވެ. އަދި އިދިކޮޅު އަނެއް ޕާޓީ އަކީ އެނިޒާމަށް ބީރައްޓެހި ކައުންސިލްތަކަށް ބާރު ދިނުމަށް ނުރުހޭ ޕާޓީ ކަމަށް ރައްޔިތުންނަށް ވިސްނައި ދެވޭތޯ ގަދައަށް ހިތްވަރު ކުރެއެވެ. އެކި އިންތިޚާބުތަކަށް ސިޔާސީ ޕާޓީތަކުން ”ވިއްކަވާ“ އެއްޗެއްގެ ކަމުގައި މިއަދު ލާމަރުކަޒީ ނިޒާމު ވުމުން ދޭހަވެގެން ދަނީ މިއަދު ރައްޔިތުން އެނިޒާމު ބަލައިގެންފައި ވާކަމެވެ. އަތޮޅުތައް ހިންގުމަށް ރައްޔިތުން ރުހެނީ ލާމަރުކަޒީ ނިޒާމު ކަމަށް ޤަބޫލު ކުރެވެއެވެ. މިއަދު މިދެކޭ ލާމަރުކަޒީ ނިޒާމަކީ އެއްދުވަހަކުން ދެދުވަހަކުން ދިވެހިން ބަލައިގެން ނިޒާމެއް ނޫނެވެ. 1980 އަދި 1990ގެ އަހަރުތަކުގައި ސަރުކާރުން ބާއްވަމުން ގެންދެވި އަތޮޅު ވެރިންގެ ބައްދަލުވުން ތަކުގައި އަތޮޅު ތެރޭގައި ރައްޔިތުންނަށް ބޭނުންވާ ޚިދުމަތް ލާމަރުކަޒީ ކޮށް ދިނުމުގެ މަޝްވަރާތައް ކުރައްވާފައިވާ ކަން އަތޮޅުވެރިންގެ ބައްދަލުވުން ތަކުގެ ރިޕޯޓުތަކުން ފެނެއެވެ. މަރުކަޒީ ގޮތް ދޫކޮށްލާ މިއަދު މިދެކޭ ލާމަރުކަޒީ އުޞޫލުން އަތޮޅުތަކާއި ރަށްތައް ހިންގަން ފެށުން ވީ އަތޮޅު ތެރޭގެ ރަށްރަށް ހިންގުމަށް ގެނެވުނު އިންގިލާބީ ބޮޑު ބަދަލެއް ކަމުގައި ނޫނީ ނުވެއެވެ.
ދިވެހި ރާއްޖެ މިއަދު ދަތުރުކޮށްފައި ޑިމޮކްރަސީ އާއި ހެޔޮ ވެރިކަމަކީ ރައްޔިތުން ގެނައި ނިޒާމެކެވެ. އެކަމަކީ އެތައް ބައެއްގެ ވިސްނުމާއި މަސައްކަތެވެ. މިއަދު ރަށްރަށުގެ ކައުންސިލްތައް އުފެދި ހިގަން ފެށިތާ ދުވަސްތަކެއް ވެއްޖެއެވެ. ރަށްރަށުގެ ކައުންސިލްތަކަށް ކައުންސިލަރުން އިންތިޚާބު ކުރަނީ ރައްޔިތުންގެ ވޯޓުންނެވެ. ރަށާއި އަތޮޅުގެ ވެރިކަމުގައި ތިބީ ރައްޔިތުން ހޮވާފައިވާ ތިބި ބައެކެވެ. މިއަދު ލާމަރުކަޒީ ނިޒާމަކީ ކޮންމެ މީހެއްގެ ދަރިއަކަށްވިޔަސް ރައްޔިތުން މިދަނީ މިނިޒާމަށް ފައްކާވުމުންނެވެ. ފުރިހަމަ ވުމަށް ވަގުތު ބޭނުން ވާނެއެވެ.
