މިއަހަރު ރަމަޟާން މަހު، ރާއްޖޭގެ މިސްކިތްތަކުގައި ޙިފްޛުކޮށް ތަރާވީޙް ނަމާދު އިމާމުވެ ކުރެއްވުމަށް، ރާއްޖެއިން ބޭރުގެ ހާފިޒުން އަދި ޤާރީން ގެނައުމަށް މިނިސްޓްރީ އޮފް އިސްލާމިކް އެފެއާޒްއިން ހުއްދަ ދެއްވާފައިވާ ފަރާތްތަކަށް، ސްޕެސަލް ވިޒާގެ ފުރުޞުތު ދޫކުރުމަށް މޯލްޑިވްސް އިމިގްރޭޝަން ހުޅުވާލައިފިއެވެ. އިމެގްރޭޝަން ކުރައްވާފައިވާ އިއުލާންގައި ވަނީ ހާފިޒުން އަދި ޤާރީންގެ ވީޒާއަށް އެދި ހުށަހެޅުއްވުމުން، ކަނޑައެޅިފައިވާ ޝަރުޠުތައް ފުރިހަމަވެ، އެޕްރޫވަލް ލިބިވަޑައިގަންނަވާ ފަރާތްތަކަށް، ރާއްޖެ އަންނަ ދުވަހުން ފެށިގެން 45 (ސާޅީސް ފަހެއް) ދުވަހުގެ ’ސްޕެޝަލް ވީޒާ‘ ދޫކުރުމަށް ހަމަ ޖެހިފައި ވާކަމަށެވެ.
އެހެންކަމުން، 1446 ވަނަ އަހަރުގެ ރަމަޟާން މަހު، ދިވެހިރާއްޖޭގެ މިސްކިތްތަކުގައި ޤުރުއާން ޙިފްޛުކޮށް ތަރާވީޙް ނަމާދު އިމާމުވެ ކުރެއްވުމަށް، ރާއްޖެއިން ބޭރުގެ ޙާފިޡުންނާއި ޤާރީން ގެނައުމަށް ޝައުޤުވެރިވެ ވަޑައިގަންނަވާ ފަރާތްތަކުން، މޯލްޑިވްސް އިމިގްރޭޝަންގެ އޮންލައިން ޕޯޓަލް imuga.immigration.gov.mv މެދުވެރިކޮށް ’ސްޕެޝަލް ވީޒާއަށް އެދި “IM22”ފޯމް ހުށަހެޅުއްވުމަށް އިއުލާންގައި ވެއެވެ. އަދި މިގޮތުން ހުށަހަޅުއްވާ އެޕްލިކޭޝަންތަކަށް ވީޒާ ދޫކުރުމާއިމެދު ނިންމާގޮތުގެ މައުލޫމާތު އެޕްލިކޭޝަން ހުށަހަޅުއްވާ ތާރީޚުން ފެށިގެން 7 (ހަތެއް) ދުވަހުގެ ތެރޭގައި (ސަރުކާރު ބަންދު ދުވަސްތަކާއި ރަސްމީ ބަންދުދުވަސްތައް ނުހިމެނޭގޮތަށް) ’އިމުގާ‘ ޕޯޓަލްއިން އަދާހަމަކުރެވޭނެ ކަމަށްވެސް އިއުލާންގައިވެއެވެ. ވިސާއަށް އެދި ހުށައަޅުއްވާއިރު އިސްލާމިކް މިނިސްޓްރީން ދެއްވާ ހުއްދަ އާއި އެކު ވިސާއަށް ބޭނުންވާ އެންމެހައި ލިޔެކިޔުންތައް ފުރިހަމަ ކޮށް ހުށައަޅުމަށް އިމިގްރޭޝަން އެދިފައި ވެއެވެ.
މިއަހަރު ރާއްޖެއިން ބޭރުން ގެންނަ ހާފިޒުން ގެނައުމަށްޓަކައި އިސްލާމިކް މިނިސްޓްރީގެ ހުއްދަ އެދި ހުށައެޅުމުގެ ފުރުޞަތު އަންނަ ފެބްރުއަރީ މަހުގެ 16ވަނަ ދުވަހުގެ ނިޔަލަށް އެމިނިސްޓްރީން ހުޅުވާލާފައި ވެއެވެ. ކޮންމެ އަހަރެއްގެ ރަމްޟާން މަހުވެސް ހިފްޠުކޮށް ތަރާވީޙް ނަމާދު ކުރުމަށް ރާއްޖެއިން ބޭރުގެ ހާފިޒުން ރާއްޖެއަށް ގެންނަކަން ފާހަގަ ކުރެވެއެވެ.
