ސަރުކާރުގެ ރަސްމީ ލިޔެކިޔުމާއި، ޑޭޓާބޭސްތަކުން މައުލޫމާތު ވަގަށް ނަގައިގެން ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ މެމްބަޝިޕް އިތުރުކުރުމަށް، ފޯމު އެކިއެކި މީހުންގެ ނަމުގައި ވަގަށް ފުރާފައިވާ ކަމަށް ތުހުމަތުކުރެވޭ މައްސަލަ ތަހުގީގު ކޮށްދިނުމަށް ދަ ޑިމޮކްރެޓްސް އިން މިއަދު ދިވެހި ފުލުހުންގެ ޚިދުމަތަށް ހުށަހަޅައިފިއެވެ.
މައްސަލަ ފުލުހުންނަށް ހުށަހަޅާނެކަން ހާމަކޮށްފައިވަނީ، މިއަދު އެޕާޓީން އެކްސް ގައިކޮށްފައި ޕޯސްޓެއްގައެވެ. ޑިމޮކްރެޓްސް އިން ކުރިޕޯސްޓުގައި ބުނީ ރައްޔިތުންގެ ޒާތީ މަޢުލޫމާތުން ވައްކަންކޮށް، ވަގު ފޯމު ފުރައިގެން ޕީޢެންސީގެ ދަފްތަރުގައި ޖައްސާފައިވާ މައްސަލައިގައި ޖިނާއީ ތަޙުޤީޤެއް ހިންގުމަށް މިއަދު 11:00 ގައި ފުލުހުންނަށް ހުށަހަޅާނެ ކަމަށެވެ.
މިކަމާއި ގުޅިން މީގެކުރިން ޑިމޮކްރެޓްސް އިން ނެރުނު ބަޔާނެއްގައި ބުނީ ސަރުކާރުގެ ރަސްމީ ލިޔެކިޔުމާއި، ޑޭޓާބޭސްތަކުން މަޢުލޫމާތު ވަގަށް ނަގައިގެން ޕީއެންސީގެ މެންބަރޝިޕް ފޯމު އެކިއެކި މީހުންގެ ނަމުގައި ވަގަށް ފުރާފައިވަނީ ދާޚިލީ ވަޒީރު އިސްވެ ހުންނަވައި، އެ ވުޒާރާ ހިންގާ އޮފީހުގެ ތެރޭގައި ކަމަށެވެ.
ޑިމޮކްރެޓްސްއިން ބުނީ ދައުލަތުން މުސާރަ ލިބޭ ސިޔާސީ މުވައްޒަފުން، ސަރުކާރުގެ ރަސްމީ މަސައްކަތު ގަޑީގައި، ދާޚިލީ ވުޒާރާގެ ދަށުން ހިންގާ ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން (ޑީއެންއާރް) ގައި ހުރި އާންމު ރައްޔިތުންގެ ޒާތީ މައުލޫމާތު ވަގަށް ނަގައިގެން އަމިއްލަ ޒާތީ ސިޔާސީ މަންފާއަށް ބޭނުންކުރުމަކީ ފައިސާތަކެއް ވަގަށް ނެގުމަށްވުރެ، މި ޒަމާނަށް ބަލާއިރު ނުރައްކާތެރިކަން ބޮޑު ޚިނާތެއްކަމުގައި އެ ޕާޓީން ދެކޭ ކަމަށެވެ. އަދި މިއީ މަކަރާއި ހީލަތަކަށް ފުދޭ ވިޔާނުދާ ކަމެއްގެ އިތުރުން، އައިޑެންޓިޓީ ފޯޖުކުރުމާއި ސައްހަނޫން ލިޔެކިޔުން ދައުލަތުގެ އިދާރާއަކަށް ގަސްދުގައި އޮޅުވާލައިގެން ހުށަހެޅުން ހިމެނޭ ޖިނާއީ ކުށެއްކަން ވެސް ޑިމޮކްރެޓްސްގެ ބަޔާނުގައި ފާހަގަކޮށްފައިވެއެވެ.
މި މައްސަލައާ ގުޅިގެން ދާޚިލީ ވަޒީރުގެ މަޤާމުގައި ހުންނެވި ޢަލީ އިޙްސާން އިސްތިޢުފާ ދިނުމަށް ދަ ޑިމޮކްރެޓްސް އިން ވަނީ މީގެ ކުރިން ވަނީ ގޮވާލައިފައެވެ.
މިއަދު މައްސަލަ ފުލުހުންގެ ޚިދުމަތްތައް ހުށަހެޅުމުގައި އެޕާޓީގެ ލީޑަރޝިޕްގެ އިސްބޭފުޅުންނާއި ގިނަ އަދަދެއްގެ ސަޕޯޓަރުން ވަނީ ބައިވެރިވެފައިވެއެވެ.
