ސަޢުދީ ޢަރަބިއްޔާގެ މިނިސްޓަރ އޮފް ޙައްޖު އެންޑް އުމްރާ ޑރ ތައުފީޤު ރަބީޢާ އާ އިސްލާމީ ކަންތައްތަކާބެހޭ މިނިސްޓަރ ޑރ. މުޙައްމަދު ޝަހީމް ޢަލީ ސަޢީދު މިއަދު ބައްދަލު ކުރައްވައިފިއެވެ.
މިބައްދަލުވުން ކުރައްވާފައިވަނީ މިނިސްޓަރ ޑރ. ޝަހީމް މިހާރު ސަޢުދީ އަށް ކުރައްވަމުންގެންދާވާ ރަސްމީ ދަތުރުފުޅުގައެވެ.
އިސްލާމީކަންތައްތަކާބެހޭ ވުޒާރައިން ބުނީ، ބޭއްވި މި ބައްދަލުވުމުގައި މިނިސްޓަރ ޑރ. ޝަހީމް ވަނީ ޙައްޖާއި ޢުމްރާގެ ޚިދުމަތުގެ ފެންވަރު ރަނގަޅުކުރުމަށާއި ދެ ޙަރަމްފުޅަށް ޚިދުމަތްކުރުމުގައި ސަޢުދީ ޢަރަބިއްޔާގެ ރަސްގެފާނު ސަލްމާން ބިން ޢަބްދުލްޢަޒީޒު ކުރައްވަމުން ގެންދަވާ މަސައްކަތްޕުޅަށް ޝުކުރު އަދާކުރެއްވާފައެވެ.
މިބައްދަލުވުމުގައި ދުނިޔޭގެ ކަންކޮޅުތަކުން އަންނަ ޙައްޖުވެރިންނަށް ކަންކަން ފަސޭހަކޮށްދެއްވުމަށް ވަލީ އަޙުދު މުޙައްމަދު ބިން ސަލްމާން ކުރައްވާ މަސައްކަތްޕުޅުތައް ފާހަގަކުރައްވައި އެކަމަށްވެސް ޑރ ޝަހީމް ޝުކުރު އަދާކުރެއްވިއެވެ. މީގެ އިތުރުން، ޑރ، ދިވެހިރާއްޖޭގެ ޙައްޖުވެރިންނަށް ދިމާވާ ދަތިތައް ޙައްލު ކުރެއްވުމަށް ސައޫއީ ޢަރަބިއްޔާގެ މިނިސްޓްރީއޮފް ޙައްޖު އެންޑް އުމްރާއިން އަބަދުވެސް ދެއްވާއެހީތެރިކަން މިނިސްޓަރ ޑރ ޝަހީމް ފާހަގަކުރެއްވިއެވެ.
ސަޢުދީ ޢަރަބިއްޔާއާއެކު އޮންނަ އަޚުވަންތަ ގުޅުން އިތުރަށް ވަރުގަދަ ކުރުމަކީ ރައީސް ޑރ. މުޙައްމަދު މުޢިއްޒު ވަރަށް ބޮޑު އަހަމިއްޔަތުކަމެއް ދެއްވާ ކަމެއްކަމަށާއި، މި ގުޅުން އަބަދުވެސް ވަރުގަދަ ކަމާއެކު ދެމިއޮންނާނެކަމެވެ.
މިނިސްޓަރ ޑރ ޝަހީމްގެ ވާހަކަފުޅުގައި ކޮންމެ އަހަރަކުވެސް ބާއްވަމުން އަންނަ ހައްޖު މައުރަޒަކީ ހައްޖު މެނޭޖްމަންޓަށް ޒަމާނީ ވިސްނުން ގެނުވައިދިން ޙަރަކާތެއްކަމާއި މިދިޔައަހަރުން ފެށިގެން ރާއްޖޭގައި ވެސް ޙައްޖާއި ޢުމްރާއަށް ޚާއްޞަ ކޮންފަރެންސެއް ބާއްވަން ފަށާފައިވާ ކަން ފާހަގަކުރެއްވިއެވެ.
ސަޢޫދީ ޢަރަބިއްޔާގެ ޙައްޖު މިނިސްޓަރުގެ ވާހަކަފުޅުގައި ރާއްޖެއިން ޙައްޖުގެ ކަންކަމުގައިބަހައްޓާ މުހިންމުކަން ފާހަގަކުރެއްވިއެވެ. މިނިސްޓަރ ޝަހީމްވަނީ ޑރ ތައުފީޤު ރާއްޖެވަޑައިގެންނެވުމަށް ދަޢުވަތު ދެއްވާފައެވެ.
