ރޭގަނޑުގެ ނިއްޖަކީ ނަފްސާނީ ޖިސްމާނީ ދުޅަހެޔޮ ކަމަށް ނުހަނު ބޭނުންތެރި ކަމެކެވެ. ހަމަ ނިދި ނުލިބުމުގެ ސަބަބުން ތަފާތު ބަލިތައް ޖެހުމަށް މަގު ފަހިވެގެން ދާކަމަށް ހޯދުންތަކުން ދައްކައެވެ. މިއަދު ސޯސަލް މީޑިއާ އަކީ ޒުވާނުން ރޭގަނޑުގެ ނިދިން މަހުރޫމް ކުރުވާ އެއް ސަބަބެވެ. ނިދަން އޮށޯތުމަށް ފަހު ފޯނު ނުވަތަ ޓެބްލެޓް ބޭނުން ކުރުމުގެ ސަބަބުން ރޭގަނޑުގެ ނިދިން މަހުރޫމް ކޮށްލައެވެ. ފިލްމު ބެލުމާއި ފޭސް ބުކް އާއި ޓިކްޓޮކް ފަދަ ޕްލެޓްފޯމުގެ އަވާގައި ޖެހި މިއަދު ގިނަ ބަޔަކު ރޭގަނޑުގެ އަރާމު ނިދި މަހުރޫމް ކޮށްލުމަކީ އާދައަކަށް ވެއްޖެއެވެ. މިކަމުގެ ސަބަބުން ހެދުނު ނުތެދުވުމުގެ އާދަވެ އެގޮތަށް މުޅި ދިރިއުޅުން ބައްޓަން ވެއެވެ. އެކަމުގެ ސަބަބުން އޮފީހަށް ސަލާމް ބުނުން އާދަވެ، ދަރިވަރުން ކިޔެވުމަށް ހުރަސް އެޅޭގޮތް ވެއެވެ. ތިމާ އަދާކުރަން ޖެހޭ މަސްއޫލިއްޔަތުތަކަށް ފަރުވާ ކުޑަ ކުރެވެއެވެ.
ވީމާ ނިދަން އޮށޯތުމަށް ފަހުން ފޯނާ ޓެބްލެޓް ފަދަ ތަކެއްޗާ ދުރުވާން ޖެހެއެވެ. ނިދާގަޑީގައި ފޯނާ ދުރުވުމާ ގުޅޭ ގޮތުން ސެން ފްރެންސިސްކޯގެ ޔުނިވާސިޓީ އޮފް ކެލިފޯނިއާގެ ކުޑަކުދިންގެ އެސޯސިއޭޓް ޕްރޮފެސަރު ލީޑް އޮތޯރ ޖޭސަން ނަގަޓާ ވިދާޅުވާ ގޮތުގައި ނިދާ ގަޑީގައި ފޯނު ސައިންލެޓް މޯޑުގައި ބެހެއްޓި ނަމަވެސް ނޮޓިފިކޭޝަންތައް އޮންކޮށް ބަހައްޓާނަމަވެސް ނިދުމަށް ހުރަސް އެޅޭނެއެވެ. ނިދާ ކޮޓަރީގައި ފޯނު އޮންކޮށްގެން ނިދާނަމަ، ނިދަން އުދަގޫ ވުމުގެ ނުރައްކާ 25އިންސައްތަ އިތުރު ވާކަމަށް އޭނާ ފާހަގަ ކުރެއެވެ.
ވީމާ އޭނާ ލަފާ ދެނީ ނިދަން އޮށޯތުމުގެ ކުރީން ފޯނު ނިއްވާލުން ނުވަތަ ނިދާ ކޮޓަރިން ބޭރުގައި ފޯނު ބޭއްވުން މުހިއްމު ކަމެއް ކަމަށެވެ. އަދި ނިދުމުގެ ކުރިން ސޯޝަލް މީޑިއާ ބޭނުންކުރުމާއި، އިންޓަނެޓްގައި ޗެޓްކުރުމާއި، ވީޑިއޯ ގޭމް ކުޅުމާއި، އިންޓަނެޓް ބްރައުޒްކުރުމާއި، ނިދުމުގެ ކުރިން އެނދުގައި އޮވެ ފިލްމު، ވީޑިއޯ ނުވަތަ ޓީވީ ޝޯތައް ބަލާ ނުވަތަ ސްޓްރީމްކުރުން ފަދަ ކަންކަމަކީ ނިދި މަދުވުމާ ގުޅުން ހުރި ކަންކަމުގައި އޭނާ ފާހަގަ ކުރެއެވެ. މިއަދު ބައެއް މީހުންގެ އާދައަކީ ނިދަން އޮށޯތުމަށް ފަހު މިފަދަ ތަކެތި ބޭނުން ކޮށް ތިމާ ބޮލަށް ބަރުވެ އުދަގޫ ވާގޮތް ވުމުން މިފަދަ ތަކެތި ބޭނުން ކުރުން ހުއްޓާލުމެވެ. ނަމަވެސް ޑޮކްޓަރުން ލަފާ ދެނީ ނިދަން ހަމަ ޖައްސާފައިވާ ގަޑި ޖެހުމުގެ ކުރިން ފޯނު ނިއްވާލުމެވެ. ކޮޓަރީގައި ޓީވީ ނުވަތަ ކޮމްޕިއުޓަ ހުރި ނަމަ ނިއްވާލުމެވެ. ނިދުމަށް އޭގެ ވަގުތު ދިނުމެވެ.
އަޅުގަނޑުމެންގެ މާތްވެގެންވާ ދީން އަމުރު ކުރަނީ އަވަހަށް ނިދާ އަވަހަށް ހޭލުމަށެވެ. ރޭގަނޑުގެ އަރާމު ނިންޖަކަށް ފަހު ފަތިހުގެ ބަރަކާތާއި އެކު މަސައްކަތަށް ނުކުތުމަށެވެ.
