ރައްޔިތުންނަށް ތަފާތު ޚިދުމަތް ދިނުމަށްޓަކައި ސަރުކާރުގެ ކުންފުނިތައް އުފައްދާ ހިންގަމުން ގެންދެއެވެ. މިގޮތުން ކާބޯތަކެތީގެ ޔަޤީންކަން ދިނުމަށާއި ކަރަންޓާއި ފެން ފަދަ ޟަރޫރީ ބޭނުންތަކަށް ރައްޔިތުންނަށް ފޯރު ކޮށްދިނުމަށް އުފައްދާފައިވާ ކުންފުނިތަކުގެ އިތުރުން، ބޯހިޔާވަހިކަން ރައްޔިތުންނަށް ފޯރުކޮށްދިނުމަށް އުފައްދާފައިވާ ކުންފުނިތައް ހުރިކަން ފާހަގަ ކޮށްލެވެ. މިފަދަ ކޮންމެ ކުންފުންޏަކުން ރައްޔިތުންނަށް ދޭ ޚިދުމަތަށްވުރެ ރައްޔިތުން އަޑު އިވި ސިއްސައިގެން ދަނީ އެފަދަ ކުންފުނިތަކުން ކޮށްފައިވާ ވަށްކަންތަކާއި ހިންގާފައިވާ ކޮރަޕްޝަންގެ ވާހަކަ ތަކެވެ.
ސަރުކާރުގެ ކުންފުނިތަކުގެ ކޮރަޕްޝަނާއި ވައްކަމާއި ޏާޒާއިޒު ފައިދާތަކަކީ، މި ދިވެހި ޤައުމުގެ އައު ވާހަކައެއް ނޫނެވެ. ދިވެހި މަސްކުންފުނި ވިޔަސް މަގު ހަދާ ތަރައްޤީ ކުރާ ކުންފުނި ކަމަށްވިޔަސް ، ދިވެހި ލޭ ނާރު ކަމަށްވާ ފަތުރުވެރިކަން އިސްތިހާރު ކުރަން އުފެއްދި ކުންފުނިވެސް މިހަޑި ހުތުރު ނަމުން ސަލާމަތް ވެފައެއް ނެތެވެ. ބޯހިޔާ ވަހި ކަމަކީ މިއަދު ދިވެހިންގެ ގިނަ ރައްޔިތުންގެ ވިންދާ ކުޅެފައިވާ ޤައުމީ މައްސަލައެކެވެ. މިއަދު އެކުންފުނިންވެސް މިއިވިގެން މިދިޔައީ ކޮރަޕްޝަނުގެ ވާހަކައެވެ. ނުހައްޤުން ބިންތަކެއް ދިން ވާހަކައެވެ. މިއީ ވަކި ސަރުކާރަކަށް ވަކި ޒަމާނަކަށް އޮތް ކަމެއް ނޫނެވެ. މިދިޔަ 50އަހަރުގެ މާޒީގައި ސަރުކާރުގެ ކުންފުނިތަކުގެ ކޮރަޕްޝަނާއި ފަސާދައިން ސަލާމަތް ވެފައި ވާކަމަކަށް ނުދެންނެވޭނެއެވެ. ނަޒާހާތްތެރި ކަމުގެ އަހުދު ކަށަވަރު ކުރެއްވުމަށްފަހު ކުންފުނިތަކަށް ހިންގުމަށް ޙަވާލު ކުރާ ފަރާތްތަކުގެ ބިތު ފަންގި ދުވަސްކޮޅަކުން ނަގާ ބަލާއިރު ފެންނަނީ ބޮޑުތަނުން މުއްސަދި ވެފައިވާތަނެވެ. ކުންފުނިތަކުގެ ތިޖޫރި ފަޅަމުން ދާއިރުވެސް އެތިޖޫރީތަކުގައި ލާނެ މޮޅު ތަޅެއް ވަނީ ނުލިބިއެވެ. ވީމާ ކުންފުނިތައް އުފެދި ހިންގަމުން ގެންދަނީ ހަރުދަނާ އުޞޫލެއް ނެތީ ކަމަށް ނުވަތަ ކާނެ މީހަކު ކާން ދޫކޮށްލަން އޮންނަނީ ކަމަށް ބައެއް މީހުން ދެކެއެވެ. ބަލާނެ މީހަކު ނުހުންނަ ގޮތަކަށެވެ.
ކުންފުނިތަކުގެ ވަޒީފާއަށް މީހުން ނެގުމުގައިވެސް “ ހަމައެއް ލަމައެއް“ އޮތް ކަމަކަށް ނުފެނެއެވެ. އެކަމުގައި އޮތީ ބޭނުން މީހަކަށް ވަޒީފާ ދީ ހަމަ ޖެއްސުމެވެ. އިންތިޚާބެއް ކުރިމަތި ވެއްޖެނަމަ ފެނިވަޑައިގެންފިނަމަ ރަށެއްގެ ހުރިހާ ރައްޔިތުންނަކީ ކުންފުނީގެ މުއައްޒަފުންނަށް ހެދުމަށް ހުރަހެއް ނެތެވެ. ގިނަ ކުންފުނިތަކުގައި ވިޔަފާރި ކުންފުނީގެ ސިފަ ގެއްލި ވޯޓް ހޯދުމަށް ޖަހަން އޮންނަ “ ބޯޅަ“ އަކަށް ކުންފުނިތައް އޮންނަނީ ވެފައެވެ. ކޮންމެ އައު ސަރުކާރެއް އުފެދިގެން ދިއުމާއެކު އެސަރުކާރެއް ހިމެނޭ ޕާޓީގެ ކުދިންކޮޅު ދުއްވައި ގަންނަނީ ކުންފުނިތަކުން ކޮންމެވެސް ރަގަޅު ވަޒީފާއެއް ހޯދުމަށެވެ. އެކުދިން ހިތް ރުއްސުމަށްޓަކައި ކޮންމެވެސް ނަމެއްގައި ވަޒީފާއެއް ހަމަ ޖައްސައި ދެއެވެ. އެއީ ކުންފުންޏަށް މާލީ ގޮތުން ކިތަންމެ ބޮޑު ގެއްލުމެއް ލިބުނު ނަމަވެސް ސިޔާސީ ގޮތުން އެއީ ކުރަން ޖެހޭ ކަމެއްވިއްޔާ ކުރަންވީއެވެ. މިއީ ވަކި މިއަދު އިއްޔެއަކު ކަން އޮތް ގޮތެއް ނޫނެވެ. މަލަކަށް ބުނާނެ މަލެއް ނެތެވެ. ރައްތިތުން ކުރަން ޖެހޭ ކަމަކީ ފަސްއަހަރުން ފަސްއަހަރުން ވޯޓުލުމެވެ. މިކަންކަމުގެ ސަބަބުން ސަރުކާރުތަކަށް ހުތުރު ނަން ލިބިފައެވެ. ކުންފުނިތަކުގެ ސަބަބުން ސަރުކާރުގެ މޫނުމަތި ހުތުރު ވެގެން ދެއެވެ. ނުފިލާ ހަޑި ލައްގަޑެއް ޖެހެއެވެ. ދެއްވާ ވަޒީފާއަކުން ލިބޭ ވޯޓަށް ވުރެ ގިނަ ވޯޓް ގެއްލިގެން ދަނީ މިފަދަ ކަންކަމުގެ ސަބަބުންނެވެ.
