ރާއްޖޭގެ ރިސޯޓެއްގައި ޗުއްޓީ ހޭދަކުރުމަށް އައިސް އުޅުނު ޖަޕާނުގެ ޤާނޫނު ހަދާ މަޖިލީހުގެ މަޖިލިސް މެންބަރަކު ނިޔާވެއްޖެއެވެ.
ފުލުހުން ވިދާޅުވި ގޮތުގައި ޅ. އަތޮޅުގެ ރިސޯޓެއްގައި އުމުރުން 70 އަހަރުގެ ޖަޕާނުގެ ޓޫރިސްޓަކު ސްނޯކްލިންއަށް ގޮސް އުޅެނިކޮށް މޫދުގައި މަރުވެފައި އޮއްވާ ފެނުނު މައްސަލައެއް އިއްޔެގެ ހެނދުނު 8:33 ހާއިރުވަނީ ފުލުހުންނަށް ރިޕޯޓުކޮށްފައެވެ.
އެ މައްސަލަ ތަހުޤީގު ކުރަމުންދާ ކަމަށް ބުނި ނަމަވެސް، އެ މައްސަލައާ ގުޅޭ އިތުރު ތަފުސީލެއް ފުލުހުން އަދި ނުދެއެވެ. ޖަޕާނުގެ ނޫހެއްގައިވާ ގޮތުން، ރާއްޖޭގައި ނިޔާވެފައި ވަނީ ވެރިކަން ކުރާ ލިބެރަލް ޑިމޮކްރެޓިކް ޕާޓީގެ ސެނެޓަރެއް ކަމަށްވާ ޓޮޝިޔުކީ އަޑަޗީ، އެވެ .
އެލްޑީޕީގެ މަސްދަރުތަކާ ހަވާލާދީ އެ ނޫހުގައިވަނީ، އަޑަޗީ ނިޔާވީ ކަނޑުމަތީގެ ހާދިސާއެއްގައި ކަމަށް އެނގިފައިވާ ކަމަށް ރިޕޯޓުކޮށްފައެވެ.
ޖަޕާނުގެ އެހެން ނޫހެއްގައި ވަނީ، އަޑަޗީ މިމަހުގެ 25އިން އަންނަ މަހުގެ ހަ ވަނަ ދުވަހާ ހަމައަށް ރާއްޖެ ވަޑައިގަންނަވާނެކަން ހައުސް އޮފް ކައުންސިލާސްގެ ސެކްރެޓޭރިއޭޓަށް އަންގަވައިފައިވެއެވެ.
ޖަޕާނުގެ ޤާނޫނު ހަދާ މަޖިލީހުގެ މަތީގެ ކަމަށްވާ ހައުސް އޮފް ކައުންސިލާސްއަށް އަޑަޗީ އިންތިޚާބުވީ 2016ގައެވެ. އަދި ނިޔާވިއިރު، ފުރުއްވަމުން ގެންދެވީ އެ މަޖިލީހުގައި ދެވަނަ ދައުރެވެ.
މި ހާދިސާއާ ގުޅޭގޮތުން އަދި ޖަޕާނާއި ރާއްޖޭގެ ސަރުކާރުގެ ބަހެއް މިހާތަނަށް ލިބިފައެއް ނުވެއެވެ.
