ޑިސެމްބަރު މަހުގެ 12 ވަނަ ދުވަހު މ. ގްރީން ބިލްޑިންގްގައި ހިނގި އަލިފާނުގެ ޙާދިސާގެ ތަހުޤީޤު ޓީމާ ގުޅުނު އިންޑިއާގެ ތަޖުރިބާކާރުންގެ ޙާއްސަ ޓީމު ފުރައިފިއެވެ. މިޓީމު ފުރާފައިވަނީ 22 ޑިސެންބަރު 2024 ވަނަ ދުވަހުއެވެ. އަލިފާނުގެ ޙާދިސާއާ ގުޅިގެން ކުރެވެމުންދާ ތަހުޤީގުގައި އެހީތެރިވުމަށް އިންޑިއާގެ ތަޖުރިބާކާރުންގެ ޚާއްސަ ޓީމެއް ދިވެހި ފުލުހުންނާއެކު ހަރަކާތްތެރިވާން ފެށީ މި މަހުގެ 20 ވަނަ ދުވަހުން ފެށިގެންނެވެ.
އިންޑިއާގެ ތަޖުރިބާކާރުންގެ ޓީމުން ވަނީ ޙާދިސާ ހިނގި ތަން ބަލައި، ތަހުޤީޤު ފުރިހަމަ ކުރުމަށް ބޭނުންވާ އެންމެހައި ކަންކަން ދިރާސާކޮށްފަ ކަމަށް ފުލުހުން ވިދާޅުވެއެވެ . މީގެ އިތުރުން، ޙާދިސާއާ ގުޅޭ ފޮޓޯ، ވީޑިއޯ އަދި ސީސީޓީވީ ފުޓޭޖްގެ އިތުރުން ޙާދިސާއާ ގުޅުންހުރި މުހިއްމު މަޢުލޫމާތުތައް ޓީމާ ހިއްސާކުރެވިފައިވާނެކަމަށް ފުލުހުން ވިދާޅުވިއެވެ. އަދި ފޯރުކޮށްދެވުނު މަޢުލޫމާތުތަކާއި ތަކެތި ދިރާސާކުރުމަށްފަހު، އެ ޓީމުގެ ހޯދުންތައް ދިވެހި ފުލުހުންގެ ޚިދުމަތާ ހިއްސާކުރުމަށް ހަމަޖެހިފައިވާކަމަށްވެސް ފުލުހުން ވިދާޅުވިއެވެ. ފުލުހުން ވިދާޅުވީ އިންޑިއާގެ ޓީމު ފުރިނަމަވެސް ތަހުޤީގަށް ބޭނުންވާ ފަންނީ އެހީތެރިކަން ފުލުހުންނަށް ލިބެމުންދާނެ ކަމަށެވެ.
ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ އާއި އެންވަޔަރުމަންޓް މިނިސްޓްރީގައި އަލިފާނުގެ ޙާދިސާ ހިނގާފައިވަނީ މި މަހުގެ 12 ވަނަ ދުވަހުގެ ހެނދުނު 6:30 ހާއިރުއެެވެ. އެ ޙާދިސާގައި ތިން މިނިސްޓްރީ ވަނީ އެއްކޮށް އަނދައި ހުލިވެފައެވެ.
ތިން މިނިސްޓްރީއެއް އަނދައި ހުލިވެފައިވާއިރު، މިޙާދިސާ ހިނގައިދިޔަ ސަބަބު މިހާތަނަށް ދެނެގަނެވިފައެއް ނުވެއެވެ. އަލިފާނުގެ ޙާދިސާގެ ސަބަބުން އެ އިމާރާތްތަކުގައި ހުރި މުޙިއްމު ބައެއް ލިޔުންތައްވަނީ ގެއްލިފައެވެ. އަލިފާނުގެ ޙާދިސާއާ ގުޅިގެން ފުލުހުން ކުރިއަށްގެންދާ ތަހުޤީގުގައި އާންމުންގެ އެހީތެރިކަމަށްވެސް ވަނީ މީގެ ކުރިން އެދިވަޑައިގެންފައެވެ. އެގޮތުން އަލިފާނުގެ ޙާދިސާގެ ތަހުޤީގަށް ބޭނުންކުރެވިދާނެ އެއްވެސް މަޢުލޫމާތެއް ލިބިފައިވާނަމަ އެކަން މޭޖަރ ކްރައިމް އިންވެސްޓިގޭޝަނާ ހިއްސާކުރުމަށް ދިވެހި ފުލުހުންގެ ޚިދުމަތުންވަނީ އެދިވަޑައިގެންފައެވެ.
