ފުލުހުން އިސްނަގައިގެން ސްވިމިންގ އެސޯސިއޭޝަން އޮފް މޯލްޑިވްސް އާއި ގުޅިގެން ކުރިއަށް ގެންދާ ފަތާލާމުގެ 6 ވަނަ ޕްރޮގްރާމް ނިންމުމުގެ ނިންމުގެ ރަސްމިއްޔާތު ބާއްވައިފިއެވެ.
މިމަހުގެ 17 ވަނަ ދުވަހުގެ ހަވީރު ލ. އަތޮޅު ތައުލީމީ މަރުކަޒުގައި ބޭއްވި ރަސްމިއްޔާތު ޝަރަފްވެރިކޮށްދެއްވާފައިވަނީ ހައްދުއްމަތީ އަތޮޅު ކައުންސިލްގެ ރައީސް އިސްމާޢީލް ޢަލީއެވެ.
ފުލުހުން ބުނީ، ލ. އަތޮޅުގެ ހުރިހާ ސްކޫލެއްގައި ތަޢުލީމު ހާސިލްކުރަމުންދާ ހުރިހާ ދަރިވަރުންނަށް ފަތަން ދަސްކޮށްދިނުމަށްޓަކައި ލ. އަތޮޅުގައި މަސައްކަތްކުރާ ފުލުހުން އިސްނަގައިގެން ހިންގާ ޕްރޮގްރާމެއްކަމަށެވެ.
ފަތާލާމުގެ 6 ވަނަ ޕްރޮގްރާމް ކުރިއަށް ގެންގޮސްފައިވަނީ މިއަހަރުގެ ނޮވެމްބަރު މަހުގެ 24 އިން ޑިސެންބަރު މަހުގެ 14 ވަނަ ދުވަހުގެ ނިޔަލަށެވެ. މި ޕްރޮގްރާމުގައި ކުލާސްތައް ކުރިއަށް ގެންގޮސްދީފައިވަނީ ލ. އަތޮޅު ޕޮލިސްގައި މަސައްކަތްކުރާ ފުލުހުންގެ ތެރެއިން ސްވިމިންގ އެސޯސިއޭޝަންގެ ސެޓިފައިޑް އިންސްޓްރަކުންނެވެ. މި ޕްރޮގްރާމްގައި 410 ކުދިން ބައިވެރިވެ 363 ދަރިވަރުން ފަތަން ދަސްކޮށްފައިވެއެވެ.
ފުލުހުން އިސްނަގައިގެން ސްވިމިންގ އެސޯސިއޭޝަން އޮފް މޯލްޑިވްސް އާ ގުޅިގެން ކުރިއަށް ގެންދާ ފަތާލާމު ޕްރޮގްރާމުގައި މިހާތަނަށް ލ. އަތޮޅުގެ 8 ސްކޫލަކުން ގާތްގަނޑަކަށް 1419 ދަރިވަރުންނަށް ވަނީ ފަތަން ދަސްކޮށްދީފައިވެއެވެ. އެ ސްކޫލްތަކަކީ އިހައްދޫ ސްކޫލް، ހަމަދު ބިން ޚަލީފާ އާލްޘާނީ ސްކޫލް، މާވަށު ސްކޫލް، އިސްދޫ ސްކޫލް އަދި ކަލައިދޫ ސްކޫލް، ލ އަތޮޅު މަދަރުސާ، ދަނބިދޫ ސްކޫލް އަދި ލ އަތޮޅު ތައުލީމީ މަރުކަޒެވެ.
