އިޤްތިޞާދީ ހަރަކާތްތައް އިތުރުކޮށް، ވިޔަފާރިތަކަށް ފުރުސަތު ފަހިކޮށްދިނުމުގެ މަޤްޞަދުގައި ތިލަދުންމަތީ ދެކުނުބުރީ ނައިވާދޫން އެކިއެކި ބޭނުންތަކަށް ކުއްޔަށް ދޫކުރާ 35 ބިމަށް ބީލަން ރަޖިސްޓްރީ ވުމަށާއި ބީލަން ހުށައެޅުމަށް އިތުރު ފުރުޞަތު ނާވައިދޫ ކައުންސިލް އިދާރާއިން ދީފިއެވެ. މި ބިންތައް ހިމެނެނީ އަންނަނިވި ބާވަތްތަކުގެ ތެރޭގައެވެ:
- ލައިޓް އިންޑަސްޓްރިއަލް
- ދަނޑުވެރިކަމަށް ދޫކުރާ ބިންތައް
- ކޮމާޝިއަލް ބޭނުންތަކަށް ދޫކުރާ ބިން
- ޑައިވް ސެންޓަރ
- ވޯޓަރ ސްޕޯޓްސް
- ސްލިޕްވޭ ހެދުމަށް
- މަސްކެއްކުމާއި، ލޮނުމަސް އެޅުމާއި، ހުއިފިލަނޑާގެ މަސައްކަތް ކުރުމަށް ދޫކުރާ ބިންތައް
- ދިރޭތަކެތި ގެންގުޅުމަށް ދޫކުރެވޭ ބިންތައް
މިބިންތަކުގެ ބީލަމުގައި ބައިވެރިވާން ބޭނުންވާ ފަރާތްތަކުން މިމަހުގެ 23ވަނަ ދުވަހުގެ ކުރީން ކަނޑައެޅިފައިވާ ލިންކް މެދުވެރިކޮށް ރަޖިސްޓަރީ ވާންޖެހޭނެއެވެ. އަދި ރަޖިސްޓްރީ ވި ފަރާތްތަކަށް މިމަހުގެ 24ވަނަ ދުވަހު 11.15ގައި އޮންލައިން ކޮށް ބައްދަލުވުމެއް ބާއްވާނެ ކަމަށް އެއިދާރާއިން ކޮށްފައިވާ އިއުލާންގައި ވެއެވެ. ބީލަން ހުށައަޅަން ޖެހެނީ މިމަހުގެ 30ވަނަ ދުވަހުގެ 11.15ށް ނާވައިދޫ ކައުންސިލް އިދާރާއަށެވެ. ބީލަން ފޮތުގެ އަގަކީ 200/-ރުފިޔާއެވެ.
