ޕީއެސްއެމުން ގެނެސްދިން އިނގިރޭސި ހަބަރުގެ ސެގްމަންޓެއްގައި ބޭއަދަބީ މަންޒަރެއް ހިމެނިފައިވާތީ އެ ކުންފުނިން މާފަށް އެދިއްޖެއެވެ.
ޕީއެސްއެމުން ނެރުނު ބަޔާނެއްގައި ބުނީ މިދިޔަ އަންގާރަ ދުވަހުގެރޭ 7:00 ގައި ގެނެސްދިން އިނގިރޭސި ބަހުގެ ސެގްމަންޓުގައި ބޭއަދަބީ މަންޒަރެއް ހިމެނިފައިވާ އިރު، މިކަމަކީ ކުންފުނީގެ ކޮންޓެންޓް ޕޮލިސީ އާއި އޮޑިޓޯރިއަލް ޕޮލިސީ އާ ހިލާފު ސީރިއަސް މައްސަލައެއް ކަމަށެވެ.
އެހެންކަމުން މިކަމުގައި ޝާމިލްވާ ފަރާތްތަކާ މެދުގައި ކުންފުނީގެ ފަރާތުން އަޅަން ޖެހޭ އެންމެ ހަރުކަށި ފިޔަވަޅު އަޅާނެ ކަމަށް ވެސް އެ ބަޔާނުގައިވެއެވެ.
މި މައްސަލައިގައި ކަން ހިނގައިދިޔަ ގޮތް ބެލުމަށް ފަހު އިހުމާލުވި ދެ މުވައްޒަފަކު ސަސްޕެންޑްކޮށް އެ މުވައްޒަފުންގެ މައްސަލަ ކުންފުނީގެ ކަމާބެހޭ ކޮމިޓީއަށް ފޮނުވާފައިވާ ކަމަށް ވެސް ޕީއެސްއެމްގެ ބަޔާނުގައިވެއެވެ.
ޕީއެސްއެމްގެ ބަޔާނުގައި ބުނީ ކުންފުނީގެ އެކިއެކި ޑިޕާޓްމަންޓުތަކުގައި މިހާރު އަމަލުކުރަމުންދާ އެސްއޯޕީތައް އިސްލާހުކޮށް، މިފަދަ ކަންކަން ތަކުރާރު ނުވާނެ ގޮތްތަކަށް ކުންފުނީގެ އޮޕަރޭޝަނަލް ކަންކަން ތަރުތީބު ކުރެވެމުންދާ ކަމަށެވެ.
ލައިވް އިވެންޓެއްގައި ކީރިތި ޤުރުއާންގެ އާޔަތެއް ބައެއް ކެނޑިގެން ގެނެސްދެވިފައިވާތީ މީގެ ކުރިންވެސް ވަނީ ރައްޔިތުންގެ ކިބައިން މައާފަށް އެދިފައިވާކަން ފާހަގަ ކޮށްލެވެއެވެ.
