ހދ. އަތޮޅު ކައުންސިލްގެ މެމްބަރުންނާއި އިސް މުއައްޒަފުން ހިމެނޭ ގޮތުން ޖުމުލަ20 މުއައްޒަފުން މިދިޔަ އަހަރުގެ އޮކްޓޯބަރުގައި ތައިލޭންޑުގެ ބެންކޮކަށް ކުރި ދަތުރާއި ގުޅިގެން އޮޑިޓް އޮފީހުން އާންމުކޮށްފައިވާ ރިޕޯޓަކީ އޮޑިޓުގެ ޒިންމާގެ ބޭރުން އިދާރީ ދާއިރާގެ ރައްޔިތުންނާއި ލޯކަލް ކައުންސިލްތަކުގެ މެދުގައި ރައްޔިތުންގެ މެދުގައި ނުތަނަވަސްކަން އުފެދޭ މޭރުމަކުން އާންމުކޮށްފައިވާ ދޮގު ރިޕޯޓެއް ކަމަށް އެ ކައުންސިލުން ބުނެފިއެވެ. މިކަމާއި ގުޅިގެން ކައުންސިލުން ނެރުނު ބަޔާނުގައި ބުނީ، އެ ދަތުރާއި ގުޅިގެން އޮޑިޓް އޮފީހުން އާންމުކޮށްފައިވާ ރިޕޯޓަކީ ފިނޭންސްގެ މާލިއްޔަތާއި ބެހޭ ސާކިއުލާއާއި ހިލާފަށް ތައްޔާރުކޮށްފައިވާ ”އޮޑިޓަރ ޖެނެރަލްގެ މަސްއޫލިއްޔަތާއި“ ހިލާފަށް ލިޔެފައިވާ ރިޕޯޓެއް ކަމަށެވެ.
އެކައުންސިލުން ކައުންސިލްގެ މެމްބަރުން ބެންކޮކަށް ކުރި ދަތުރު ކޮށްފައިވަނީ މިދިޔަ އަހަރުގެ އޮކްޓޯބަރު މަހުގެ 9 އިން 18 އަށެވެ. މި ދަތުރާއި ގުޅިގެން އޮޑިޓް އޮފީހުން ނެރުނު ރިޕޯޓްގައި ބުނީ، އެ ދަތުރު ކޮށްފައިވަނީ ކައުންސިލުގެ ބަޖެޓުން 952،885 ރުފިޔާ ހަރަދުކޮށްގެން ކަމަށެވެ. އަދި އެ ދަތުރަކީ ތަޖުރިބާ އާއި ތަމްރީނު ހޯދުމަށް ކުރި ދަތުރެއް ކަމަށް ވެސް ވަނީ ބުނެފައެވެ.
”މި ރިޕޯޓް އާންމުކޮށްފައިވަނީ މި ތަމްރީނު ޕްރޮގްރާމާބެހޭ މައުލޫމާތުތަކާއި މި ދަތުރުގެ ޔައުމިއްޔާ އާއި އެހެނިހެން ޑޮކިއުމެންޓްތަކާއި ފޮޓޯތަކާއި އަދި މި ރިޕޯޓަށް މެނޭޖްމެންޓުން ދީފައިވާ ކޮމެންޓްތަކަށް ރިއާޔަތް ކުރުމެއް ނެތި. އަދި އޮޑިޓު އޮފީހުގެ މި ރިޕޯޓަކީ އޮޑިޓުގެ ޒިންމާގެ ބޭރުން އިދާރީ ދާއިރާގެ ރައްޔިތުންނާއި ލޯކަލް ކައުންސިލްތަކުގެ މެދުގައި ނުތަނަވަންކަން އުފެދޭ މޭރުމަކުން އާންމުކޮށްފައިވާ ރިޕޯޓެއްކަން އާންމު ރައްޔިތުންނާއި އަދި މީޑިއާތަކުގެ ސަމާލުކަމަށްޓަކައި ދަންނަވަން“ ބަޔާނުގައި ބުނެފައިވެއެވެ.
އަދި ފިނޭންސް މިނިސްޓްރީގެ ހުއްދަ ނުހޯދައި އެދަތުރުކޮށްފައިވާތީ ފިޔަވަޅު އަޅަން ޖެހޭ ކަމަށް އޮޑިޓް ރިޕޯޓުގައި ބުނި ނަމަވެސް، ފިނޭންސްއިން އެގޮތަށް އަމަލުކުރަން ޖެހޭ ކަމަށް ނެރުނު ސާކިއުލާގައި ކައުންސިލްތައް ނުހިމެނޭ ކަމަށާއި ސާކިއުލާގެ ދަށުން، ކައުންސިލްތަކުން ހުއްދަ ހޯދަން ނުޖެހޭކަން އޮޑިޓް އޮފީހަށް އެނގިފައި ނެތުމަކީ އޮޑިޓާ ޖެނެރަލްގެ ޒިންމާދާރުކަމާއި ގާބިލްކަމާ މެދު ސުވާލު އުފެދޭ ކަމެއް ކަމަށް ވިދާޅުވެ ކައުންސިލުން ނެރުނު ބަޔާނުގައި އޯޑިޓަރ ޖެނަރަލް ފާޑުވިދާޅުވެފައި ވެއެވެ.
