އެންމެ ކުޑަކޮށް ތަރައްޤީ ވެފައިވާ ޤައުމުތަކާއި ތަރައްޤީވަމުން އަންނަ ކުދި ޖަޒީރާ ޤައުމުތަކަށް އަމާޒުކޮށްގެން އިންސާނީ ހައްޤުތަކާބެހޭ ތަމްރީނާއި ފަންނީ އެހީތެރިކަމުގެ ފުރުޞަތުތައް ފަހިކޮށްދިނުމުގެ ގޮތުން ތިން ދުވަހުގެ ވޯކްޝޮޕެއް މިއަދު އިފްތިތާޙު ކޮށްފިއެވެ.
ޚާރިޖި ވުޒާރާއިން ބުނީ، މިވޯކްޝޮޕަކީ އ.ދ. ގެ އޮފީސް އޮފް ދަ ހައިކޮމިޝަނަރ ފޮރ ހިއުމަން ރައިޓްސް (އޯ.އެޗް.ސީ.އެޗް.އާރް.) އިން ޤާއިމުކޮށްފައިވާ ވޮލަންޓްރީ ޓެކްނިކަލް އެސިސްޓަންސް ޓްރަސްޓް ފަންޑް (އެލް.ޑީ.ސީ/ސިޑްސް ޓްރަސްޓް ފަންޑް) އިން ރީޖަނަލް ވަރކްޝޮޕް ފޮރ އޭޝިއާ ރީޖަން އިން ކުރިއަށްގެންދާ ވޯކްޝޮޕެއްކަމެވެ.
އ.ދ. ގެ އިންސާނީ ޙައްޤުތަކާބެހޭ މަޖިލީހުގައި 2012 ވަނަ އަހަރު ފާސްކޮށްފައިވާ 19/26 އަދި 2022 ވަނަ އަހަރު ފާސްކޮށްފައިވާ 49/32 ޤަރާރުގެ ދަށުން ހިންގާ މި ވޯކްޝޮޕްގެ މައިގަނޑު މަޤްޞަދަކީ އޭޝިއާ ބައްރަށް ނިސްބަތްވާ ތަރައްޤީ ވަމުން އަންނަ ކުދި ޖަޒީރާ ޤައުމުތަކާއި އެންމެ ކުޑަކޮށް ތަރައްޤީ ވެފައިވާ ޤައުމުތަކަށް އިންސާނީ ޙައްޤުތައް ކުރިއަރުވައި ޙިމާޔަތްކުރުމުގައި ބޭނުންވާ ފަންނީ އެހީތެރިކަމާއި ތަމްރީނުގެ ފުރުޞަތު ފަހިކޮށްދިނުމުގެ އިތުރުން ބައިވެރިވާ ޤައުމުތަކުގެ ސިޔާސަތުތަކާއި ލިބިފައިވާ ކުރިއެރުންތަކާއި ތަޖުރިބާ ޙިއްސާކުރުމުގެ ފުރުޞަތު ތަނަވަސްކޮށްދިނުމެވެ.
މި ވޯކްޝޮޕް އިފްތިތާޙްކުރުމުގެ ރަސްމިއްޔާތު ޝަރަފުވެރިކޮށްދެއްވީ ސެކްރެޓަރީ، ބައިލެޓަރަލް ޑރ. ހާލާ ޙަމީދު އަދި އިންސާނީ ޙައްޤުތަކާބެހޭ މަޖިލީހުގެ ރައީސް އަދި ޖެނީވާގައި ހުންނަ އ.ދ. ގެ މަރުކަޒުތަކަށް، މޮރޮކޯއިން ކަނޑައަޅުއްވާފައި ހުންނަވާ ދާއިމީ މަންދޫބު އެމްބަސަޑަރ އޮމާރް ޒިނީބަރ އެވެ.
މިރަސްމިއްޔާތުގައި ޖެނީވާގައި ހުންނަ އ.ދ. ގެ މަރުކަޒުތަކަށް، ދިވެހިރާއްޖެއިން ކަނޑައަޅުއްވާފައި ހުންނަވާ ދާއިމީ މަންދޫބު ޑރ. ސަލްމާ ރަޝީދު އާއި، އޯ.އެޗް.ސީ.އެޗް.އާރްގެ ހިއުމަން ރައިޓްސް ކައުންސިލް އެންޑް ޓްރީޓީ އެންޑް މެކޭނިޒަމްސް ޑިވިޜަންގެ ޑިރެކްޓަރ މރ. މަހަމާން ސީސޭ-ގޫރޯ އާއި، އޯ.އެޗް.ސީ އެޗް.އާރް އާއި އ.ދ. އިން ދިވެހިރާއްޖޭގައި ހުންނަ އދ.ގެ އޮފީހުގެ މަންދޫބުން ބައިވެރިވަޑައިގެންނެވިއެވެ.
ރަސްމިއްޔާތުގައި ސެކްރެޓަރީ، ބައިލެޓަރަލް، ޑރ. ހާލާ ޙަމީދުގެ ވާހަކަފުޅުގައި ތަރައްޤީވަމުން އަންނަ ކުދި ޖަޒީރާ ޤައުމުތަކާއި އެންމެ ކުޑަކޮށް ތަރައްޤީ ވެފައިވާ ޤައުމުތަކަށް އެޤައުމުތަކުގެ އަޑު އުފުލައި ބައިނަލްއަޤްވާމީ މައިދާނުގައި ބާރުވެރިކުރުމާއި އިންސާނީ ޙައްޤުތަކާ ބެހޭގޮތުން ވަކާލާތުކުރުމަށް މަގުފަހިކުރުމުގައި މި ވޯކްޝޮޕްގެ މުހިންމުކަން ފާހަގަ ކުރެއްވިއެވެ. އަދި ވޯކްޝޮޕްގައި އުނގަންނައިދޭ ފިލާވަޅުތަކުން ވޯކްޝޮޕްގެ ބައިވެރިންގެ ހުނަރު އިތުރަށް ތަރައްޤީކޮށް ކުރިއެރުވުމަށް މަގުފަހިވެ، ވޯކްޝޮޕްގެ ސަބަބުން ދެމެހެއްޓެނެވި ފައިދާތަކެއް ކުރާނެކަމަށް އުންމީދުކުރައްވާކަން އެކަމަނާ ފާހަގަކުރެއްވިއެވެ.
މި ވޯކްޝޮޕްގައި ބަންގްލަދޭޝް، ކެމްބޯޑިއާ، ލާއޯ ޕީޕަލްސް ޑިމޮކްރެޓިކް ރިޕަބްލިކް، ދަ ގެމްބިއާ، ނޭޕާލް އަދި ޓިމޯރު ލެސްޓް އަށް ނިސްބަތްވާ 15 ބައިވެރިންގެ އިތުރުން އެލް.ޑީ.ސީސް ސިޑްސް ޓްރަސްޓް ފަންޑްގެ ފަންނީ އެހީތެރިކަން ލިބިފައިވާ ރާއްޖޭގެ 6 ފަރާތަކުން ބައިވެރިވެއެވެ.
