އަންނަ މަހުގެ ޑިސެންބަރު 10 ވަނަ ދުވަހު އިދިކޮޅު މައި ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ބޮޑު ޖަލްސާއެއް ބާއްވަން ނިންމައި، އެ ޖަލްސާގައި ބައިވެރިވާން މުޅި ރާއްޖެއަށް ދައުވަތު ދީފި އެވެ. މިޖަލްސާ ބޭއްވުމަށް ނިންމިކަން އިއުލާން ކޮށްފައިވަނީ ރޭ އެމްޑީޕީގެ ހަރުގޭގައި ބޭއްވި ޖަލްސާގައި އެ ޕާޓީގެ ޑެޕިއުޓީ ޗެއާޕާސަން އިބްރާހިމް ވަހީދު އެވެ. އަދި މިކަން އެޕާޓީގެ ރަސްމީ އެކްސް އެކައުންޓުން ކުރި ފޯސްޓެއްގައި ވެސްވަނީ ހިއްސާކޮށްފައެވެ.
”ގާނޫނުއަސާސީގެ ދިފާއުގައި ރައްޔިތުން“ ގެ ނަމުގައި ކާނިވާ ސަރަހައްދުގައި ޑިސެންބަރު 10 ގައި ބޭއްވުމަށް ނިންމާފައިވާ ޖަލްސާބާއްވާކަން އާންމުކުރެއްވި ޖަލްސާގައި ކުރި އިއުލާނުގައި ބުނީ ރައްޔިތުންގެ އަސާސީ ހައްގުތަކާއި ހިޔާލު ފާޅުކުރުމާއި ނޫސްވެރިކަމުގެ މިނިވަންކަން ހަނިކުރުން ފަދަ ކަންކަން މިހާރު ކުރަމުންދާ ކަމަށެވެ. އަދި ވާދަވެރި ސިޔާސީ ނިޒާމެއްގެ ތެރެއިން ސީދާ ރައްޔިތުން ކަނޑައަޅާ ބަޔަކު ރައްޔިތުންގެ ކަންކަން ނިންމުމަށް ހަމަޖައްސާފައި ވަނިކޮށް، އެކަން ދައުލަތުގެ އިސްވެރިން ކުރާ ގޮތަށް ހަމަޖެއްސުމަކީ ކަންބޮޑުވާ ކަމެއް ކަމަށެވެ.
އިތުރަށް ހާމަކޮށްފައިވަނީ ގާނޫނު އަސާސީއަކީ، މަލްޓިޕާޓީ ނިޒާމާއި މިނިވަން އިންސާފުވެރި އިންތިހާބުތައް ހޯދުމަށް ވަރަށް ގިނަ ބަޔަކު އެތަކެއް ވޭނަކާއި އަނިޔާ ލިބިގެން ކުރި ބުރަ މަސައްކަތެއްގެ ނަތީޖާ ކަމަށް ބުނެފައުވެއެވެ. އެމްޑީޕީ އިން ބުނެފައި ވަނީ މި ސަރުކާރުން އެއްވެސް ބެލުމެއް ނެތި، ރައްޔިތުންގެ ހިޔާލާ މަޝްވަރާ ހޯދުމެއް ނެތި ގާނޫނު އަސާސީއަށް ބަދަލުތައް ގެންނަމުންދާ ކަމަށެވެ. ސަރުކާރަށް މާލީ ކަންކަން ބަލަހައްޓަން ނޭނގުމުގެ ސަބަބުން ގައުމުގެ މާލީ ހާލަތު ދަނީ ދަށަށްކަންވެސް ވަނީ ހިއްސާކޮށްފައެވެ.
އަދި އިތުރަށް ހިއްސާކޮށްފައިވަނީ، ސަރުކާރުން ގެންގުޅެމުންދާ ”ދޯހަޅި“ ސިޔާސަތުގެ ސަބަބުން ރައްޔިތުންގެ ދިރިއުޅުމުގެ ހާލަތު ދަނީ ދުވަހެއް ދުވަހަކަށް ދަށަށް ކަމަށެވެ. އަދި މަސްވެރިކަމާއި ފަތުރުވެރިކަމުގެ ސިނާއަތް ހީނަރުވެ، އެ ސިނާއަތްތައް މުޅިން އުވިދާނެ ކަމުގެ ބިރު އެބައޮތް ކަމަށްވެސް ހިއްސާކުރިއެވެ.
ސަރުކާރުން ގެންގުޅެމުންދާ ސިޔާސަތުތަކުގެ ސަބަބުން ރައްޔިތުންގެ ޝަކުވާ ލިބެމުންދާކަން ފާހަގަކޮށް އެމްޑީޕީން ބުނެފައިވަނީ ގައުމުގެ މިސްރާބު ހަމަމަގަށް އެޅުވުމުގެ އަމާޒުގައި އެ ޕާޓީން ކުރިއަށްދާނެ ކަމަށެވެ. އަންނަ މަހު ބާއްވާ ބޮޑު ޖަލްސާއަކީ، ގައުމުގެ މިސްރާބު ހަމަމަގަށް އެޅުވުމަށް ކުރިއަށް ގެންދިއުމަށް ރާވާފައިވާ ހަރަކާތެއް ކަމުގައި ވެސް ފާހަގަކުރި އެވެ.
މި ޖަލްސާވެގެންދާނީ ރިޔާސީ އިންތިހާބަށް ފަހު އިދިކޮޅު މައިޕާޓީ އެމްޑީޕީން ބާއްވާ އެންމެ ބޮޑު ޖަލްސާއަށެވެ. އެ ޕާޓީން މި ނޮވެންބަރު 12 ވަނަ ދުވަހުގެ ރޭ އާޓިފިޝަލް ބީޗް ސަރަހައްދުގައި ޖަލްސާއެއް ބޭއްވި އެވެ. އެޖަލްސާއަށް ވެސް ގިނައަދަދެއްގެ ސަޕޯޓަރުންނާއި ޕާޓީގެ އިސްވެރިންނާއި އާންމު މެންބަރުން ބައިވެރިވެފައިވާކަން ފާހަގަކޮށްލެވެއެވެ.
