ތައުލީމީ ދާއިރާ އަށް ހާއްސަކޮށްގެން އަންނަ އަހަރު ”އެޑިޔުކޭޝަން ސެންޓަ ފޯ އެކްސެލެންސް“ ގެ ނަމުގައި ސެންޓަރުތަކެއް ގާއިމު ކުރަން ނިންމައިފި އެވެ.
ދައުލަތުގެ މީޑިއާ، ޕީއެސްއެމްގައި އެޑިއުކޭޝަން މިނިސްޓަރު ޑރ. އިސްމާއީލް ޝަފީއު ވިދާޅުވީ އަންނަ އަހަރަށް ފާސްކުރި 56.6 ބިލިޔަން ރުފިޔާގެ ބަޖެޓްގައި ތަޢުލީމީ ދާއިރާއަށް 6.1 ބިލިޔަން ރުފިޔާގެ ބަޖެޓެއް ވެސް ވަނީ ކަނޑައަޅާފައިވާ ކަމަށެވެ.
އެގޮތުން އަންނަ އަހަރު އެންމެ ބޮޑު އިސްކަމެއް ދޭން ނިންމާފައި ވަނީ ޓީޗަރުންގެ ފަންނީ ޤާބިލުކަން އިތުރު ކުރަން ކަމަށާއި އެކަމަށް ރާއްޖޭގެ އެކި ސަރަޙައްދުތަކުގައި ”އެޑިޔުކޭޝަން ސެންޓަ ފޯ އެކްސެލެންސް“ ގެ ނަމުގައި ސެންޓަރުތައް ގާއިމުކުރާނެ ކަމަށް މިނިސްޓަރު ވިދާޅުވި އެވެ.
”މިތަނުން މުދައްރިސުންނަށް ބޭނުންވާ ޕްރޮފެޝަނަލް ޑިވެލޮޕްމަންޓާއި ޕްރިންސިޕަލުންނަށް ބޭނުންވާ ޕްރޮފެޝަނަލް ޑިވެލޮޕްމަންޓް ފޯރުކޮށް ދޭނެ،“ އޭނަ ވިދާޅުވި އެވެ. ”އަދި ސްކޫލް އިވެލުއޭޝަންގެ މަސައްކަތްތައް މިއަށްވުރެ ހަރުދަނާވެގެން ދާނެ.“
މިނިސްޓަރު ވިދާޅުވި ގޮތުގައި ޓީޗަރުންގެ ފަންނީ ގާބިލޔކަން އިތުރުކުރުމަށް މަސައްކަތް ކުރުމުގެ އިތުރަށް މިހާރު ބޭނުންކ ކުރަމުން އަންނަ ”މީމިސް“ ގެ ބަދަލުގައި އާ އެޑިއުކޭޝަން މެނޭޖްމަންޓް އިންފޮމޭޝަން ސިސްޓަމެއް ވެސް އަންނަ އަހަރު ޤާއިމު ކުރާނެ އެވެ.
