ޓޫރިޒަމް ދާއިރާގެ ވިޔަފާރިތަކުން ޑޮލަރު މާރުކުރަންޖެހޭ ގޮތަށް މަރުކަޒީ ބޭންކް، އެމްއެމްއޭއިން ހެދި ގަވާއިދާ ގުޅިގެން ރައީސް ޑރ. މުހައްމަދު މުއިއްޒު ދައްކަވަނީ އެ މަނިކުފާނުގެ އިސްކޮޅަށްވުރެ ބޮޑެތި ވާހަކަފުޅުތައް ކަމަށް ކުރީގެ ރައީސް އަބްދުﷲ ޔާމީން އަބްދުލް ގައްޔޫމް ވިދާޅުވެއްޖެއެވެ.
ޔާމީން މިހެން ވިދާޅުވީ ހޯމަދުވަހުގެ ރޭ ޕީއެންއެފުން ކުރިޔަށް ގެންދިޔަ ޖަލްސާގައި ވާހަކަ ދައްކަވަމުންނެވެ. ޔާމީންގެ ވާހަކަފުޅުގައި ވަނީ ސަރުކާރަށް އަހަރު ފުރުމުގެ މުނާސަބަތުގައި ރޭ ބޭއްވި ޖަލްސާގައި، ޓޫރިޒަމް ދާއިރާގެ ވިޔަފާރިތަކުން ޑޮލަރު މާރުކުރަން މަޖުބޫރުވާ ގޮތަށް އޮތް ގަވާއިދު ބަދަލުނުކުރާނެ ކަމަށް ރައީސް ވިދާޅުވި ވާހަކަފުޅަށް އަލިއަޅުއްވާލައްވައިފައެވެ.
އެ ގޮތުން އެމްއެމްއޭގެ ގަވާއިދުތައް ބަދަލުކުރުމާ ނުކުރުމަކީ ރައީސުލްޖުމްހޫރިއްޔާއާ ސީދާ ކޮން ގުޅުމެއް އޮތް ކަމެއްތޯ ޔާމީން ސުވާލު އުފެއްދެވިއެވެ. އެމްއެމްއޭއަކީ މުސްތަގިއްލު ވަކި ގާނޫނީ ޝަޚުސެއްކަން ފާހަގަ ކުރައްވައި ޔާމީން ވިދާޅުވީ ރައީސް މުއިއްޒު ދެއްކެވީ އެ މަނިކުފާނަށް ސީދާ ބާރުނުލިބޭ ކަމެއްގެ ތެރެއަށް ”އަތްބާނާ“ ވާހަކަފުޅު ކަމަށެވެ. އޭގެ ބަދަލުގައި އެމްއެމްއޭގެ ގަވަރުނަރާ މަޝްވަރާ ކުރައްވައިގެން ކުރިޔަށް ވަޑައިގަތުމަށް ޔާމީން ގޮވައިލެއްވިއެވެ.
ޔާމީން ވިދާޅުވި ގޮތުގައި ޑޮލަރުގެ ކަޅު ބާޒާރެއް އުފެދި، ޑޮލަރުގެ ދަތިކަން ކުރިމަތިވެފައި އޮތީ ސަރުކާރުން ބޭކާރު ޚަރަދުތައް ކުރާތީއެވެ. އެ ގޮތުން ސަރުކާރުގެ ރަސްމީ ދަތުރުތަކަށް ބޮޑެތި ވަފުދުތަކާއެކު ބޭރު ގައުމުތަކަށް ވަޑައިގަތުމަށް ކުރައްވަމުންގެންދަވާ ޚަރަދުތަކާ ގުޅިގެން ޔާމީންވަނީ ކަންބޮޑުވުން ފާޅުކުރައްވައިފައެވެ. މި ކަންކަމާ ގުޅިގެން އެމްއެމްއޭގެ ގަވަރުނަރަށް ސަރުކާރަށް މާލީ އިރުޝާދުތައް ދެއްވަން ކެރިވަޑައިނުގަންނަވާ ކަމަށް ވިދާޅުވެ، ޔާމީން ވަނީ އެ ކަން އެ ގޮތަށް ދިމާވަނީ ކީއްވެގެންތޯ ސުވާލު ކުރައްވައިފައެވެ.
މި ކަން މިހެން އޮތްއިރު، ރައްޔިތުންގެ ކަންކަން ނުކުރެވިގެން އުޅެނީ ޓޫރިޒަމް އިންޑަސްޓްރީން ފައިސާ ނުލިބިގެން ކަމަށް ސަރުކާރުން ދައްކަން އުޅެނީ ކީއްވެގެންތޯ ވެސް ޔާމީން ސުވާލު ކުރެއްވިއެވެ.
އެމްއެމްއޭގެ ގަވާއިދުގެ ދަށުން ޓޫރިސްޓު ރިސޯޓުތަކުން ކޮންމެ މަހެއްގެ ތެރޭ އަންނަ ކޮންމެ ޓޫރިސްޓަކަށް 500 އެމެރިކާ ޑޮލަރުގެ ރޭޓުން އެ މަހެއްގައި އައިސްފައިވާ ޖުމުލަ ފަތުރުވެރިންނަށް ޖެހޭ އަދަދު މާރުކުރަން މަޖުބޫރުވާނެއެވެ.
އަދި ގެސްޓު ހައުސްތަކަށް އަންނަ ކޮންމެ ފަތުރުވެރިއަަކަށް 25 ޑޮލަރު މާރުކުރަންޖެހޭނެއެވެ.
ބޭރުފައިސާއާ ބެހޭ ގަވާއިދުގެ ދަށުން ރާއްޖޭގައި އޮޕަރޭޓްކުރާ އެއް ރިސޯޓު ފިޔަވައި އެހެން ހުރިހާ ރިސޯޓަކުން ރަޖިސްޓަރީ ވެފައިވާ ކަމަށް އެމްއެމްއޭއިން މީގެ ކުރިން ބުނެފައިވެއެވެ.
މި ގަވާއިދާ ގުޅިގެން ޓޫރިޒަމް ދާއިރާގެ ވިޔަފާރިވެރިން ކަންބޮޑުވުން ފާޅުކުރައްވާފައިވަނިކޮށް، ރޭ ރައީސް ޑރ. މުހައްމަދު މުއިއްޒުވަނީ އެ ގަވާއިދު ބަދަލު ނުކުރައްވާނެ ކަމަށް ތަކުރާރުކޮށް ވިދާޅުވެފައެވެ.
