މިހާރުގެ ރައީސް ޑރ. މުޙައްމަދު މުޢިއްޒުގެ ސިޔާސަތުތައް ދުނިޔެ އިން ވެސް ބަލައިގަނެފައިވާ ކަމަށް ނައިބު ރައީސް ހުސައިން މުޙައްމަދު ލަޠީފް ވިދާޅުވެއްޖެ އެވެ.
ސަރުކާރަށް މިއަދު އެއް އަހަރު ފުރުމާ ގުޅިގެން ދައުލަތުގެ މީޑިއާއިން ގެނެސްދެމުން އަންނަ ”ހަފުތާ 52“ ލައިވް ކަވަރޭޖްގައި ނައިބު ރައީސް ވިދާޅުވީ މި ސަރުކާރު ވެރިކަމާ ހަވާލުވި އިރު، ރާއްޖެ އޮތް ހާލަތުން އަރައިގަތުމަށް ވަރަށް ގިނަ މަސައްކަތްތަކެއްކޮށްފައިވާ ކަމަށވެެ.
އަދި ސަރުކާރުގެ ހުރިހާ މަސައްކަތްތަކެއް ވެސް ބައްޓަންވެފައި އޮތީ ރައްޔިތުންގެ ލާބަ އާއި މަންފާއަށް ކަމަށް ވިދާޅުވި އެވެ.
ނައިބު ރައީސް ވިދާޅުވީ އެންމެ ބޮޑު ގޮންޖެހުމަކަށްވީ ދައުލަތުގެ ހިންގުމަށް ދަތިވާ މިންވަރަށް ކުރީގެ ސަރުކާރުން ދަރަނި ނަގާފައި އޮތުން ކަމަށެވެ.
އެ މަނިކުފާނު ވިދާޅުވީ ރައީސް މުޢިއްޒުގެ އެންމެ ފާހަގަކޮށްލެވޭ ސިފަފުޅަކީ، ކަންކަމާ މަޝްވަރާކުރެއްވުމާއި ކަމާ ގުޅުން ހުރި ފަރާތްތަކުގެ ޚިޔާލު ހޯއްދެވުން ކަމަށެވެ.
އެ މަނިކުފާނު ވިދާޅުވީ ކުރިއަށް އޮތް ދުވަސްތަކުގައި ރާއްޖޭގެ އެކި ހިސާބުތަކުގައި ގިނަ މަޝްރޫޢުތަކެއް ފެށިގެން ދާނެ ކަމަށެވެ. ހާއްސަކޮށް ބޯހިޔާވަހިކަމުގެ މަޝްރޫއުތައް ހިމެނޭ ކަމަށް ވިދާޅުވި އެވެ.
ބޯހިޔާވަހިކަމުގެ މަޝްރޫޢުތައް ފެށި، ރައްޔިތުންނަށް ބޮޑު ހައްލެއް ލިބިގެންދާނެކަމަށް ނައިބު ވިދާޅުވި އެވެ. އަދި ބަޖެޓުގެ ބޮޑު ބައި އޮތީ އެކަމަށް ހައްލު ހޯދުމަށްކަމަށް ވެސް ނައިބު ރައީސް ވިދާޅުވިއެވެ.
