ޓޫރިޒަމް އެސްޓެބްލިޝްމަންޓްތަކަށް ބޭރު ފައިސާއިން ލިބޭ އާމްދަނީ މާރުކުރުމަށް ސަރުކާރާއި މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އެކަށައަޅާފައިވާ ބޭރު ފައިސާއާބެހޭ ގަވާއިދަށް އަމަލު ކުރުން މިހާރުން މިހާރަށް މަޑުޖައްސައިލުމަށް ދަ ޑިމޮކްރެޓްސް އިން ގޮވައިފި އެވެ.
ޑިމޮކްރެޓްސް އިން ބުރާސްފަތި ދުވަހުގެ ރޭ ނެރުުނު ނޫސް ބަޔާނެއްގައި ބުނީ ބޭރު ފައިސާއާ ބެހޭ ގަވާއިދުގައި މިހާރު އޮތްގޮތަށް ޓޫރިޒަމް ވިޔަފާރި ހިނގާ ގޮތުގެ އާންމު ހަގީގަތަށް ރިއާޔަތްކުރުމެއް ނެތި އެއް އަދަދެއް ހުރިހާ ޓޫރިޒަމް އެސްޓެބްލިޝްމަންޓަކުން މާރުކޮށްގެން ބަޖެޓް އަދި މިޑްމާކެޓް ގިނަ ހޮޓާ، ރިޒޯޓް އަދި ގެސްޓްހައުސްތަކެއްގެ ވިޔަފާރި ހަލާކުވެ ބަންދުކުރަން ޖެހިދާނެ ކަމަށެވެ.
ޓޫރިޒަމް ސިނާއަތުގައި މަސައްކަތްކުރާ އެތައް ހާސް މުވައްޒަފުންތަކެއްގެ މުސާރައަށް ނޭދެވޭ އަސަރުތަކެއްކޮށް އަދި އެތައް ބައެއްގެ ދިރިއުޅުން އޭގެ މައްޗަށް ބިނާވެފައިއޮތް ވަޒީފާތެކެއް ގެއްލި ހިނގައިދާނެކަމުގެ ބިރު ވެސް އޮތް ކަމަށް އެ ޕާޓީން ބުންޏެވެ.
މިހާރުން މިހާރަށް މި ގަވާއިދަށް އަމަލުކުރުން މަޑުޖައްސާލައި، މި މައްސަލައިގައި އަމަލުކުރެވޭނެ ސަބަބުވެރި ހައްލުތަކެއް ހޯދުމަށް ޓޫރިޒަމް އެސްޓެބްލިޝްމަންޓްތައް ތަމްސީލުކުރާ ގައުމީ ޖަމިއްޔާތައްކަމަށްވާ މަޓީ އާއި، އެންއެޗްގޭމް އާއި މޯލްޑިވްސް ބޯޓިން އެސޯސިއޭޝަން ހިމެނޭނެހެން މި ދާއިރާގެ މަސްލަހަތުވެރިންނާއެކު ވީ އެންމެ އަވަހަކަށް މަޝްވަރާއަށް ސަރުކާރަށް ގޮވާލާކަމަށް ޑިމޮކްރެޓްސް އިން ބުންޏެވެ.
ޓޫރިޒަމް ވިޔަފާރީގެ އެއްވެސް މަސްލަހަތުވެރިއެއްގެ ހިޔާލެއް މަޝްވަރާއެއް ނެތި ސަރުކާރާއި މަރުކަޒީ ބޭންކުން އެކަށައަޅާފައިވާ ބޭރު ފައިސާއާ ބެހޭ ގަވާއިދު މިހާރު އޮތްގޮތުގެ ސަބަބުން އެ ސިނާއަތުގައި ހަރަކާތްތެރިވާ ވިޔަފާރިތަކަށާއި، ދިވެހި ޓޫރިޒަމް ބްރޭންޑަށާއި އަދި ޖުމްލަ ގޮތެއްގައި މުޅި ރާއްޖެއަށް އެކަމުގެ ސަބަބުން ގެއްލުންވާނެތީ ޑިމޮކްރެޓްސްއިން ވަނީ ކަންބޮޑުވުން ފާޅުކޮށްފަ އެވެ.
އޭގެއިތުރުން ޑިމޮކްރެޓްސްއިން ބުނީ ދިވެހި ޓޫރިޒަމް ސިނާއަތުގެ ފައުންޑަރުންކަމަށްވާ ކޮލިގޭ މުހައްމަދު އުމަރު މަނިކު (އެމްޔޫ މަނިކު) އާއި، ޗަންޕާ މުޙައްމަދު މޫސާ އާއި، އަދި މީގެ އިތުރުން ރައީސް ޑރ. މުހައްމަދު މުއިއްޒުގެ އެޑްވައިޒާ ޓު ދަ ޕްރެޒިޑެންޓް އޮން ޓޫރިޒަމް ޑިވެލޮޕްމަންޓް މުހައްމަދު ހަލީލްގެ އިތުރުން ގިނަ ޓޫރިޒަމް ވިޔަފާރިއަކުން އެ ގަވާއިދަށް އަމަލު ކުރެވެން ނެތް ކަމަށް ހާމަކޮށްފައިވާކަން ޑިމޮކްރެޓްސް އިން ފާހަގަކުރި އެވެ.
