މިދިޔަ އެމްޑީޕީ ސަރުކާރުގެ ފަސް އަހަރަކީ ތަޢުލީމީ ދާއިރާއަށް ވަރަށް އަނިޔާވެރިވި ފަސް އަހަރުކަމަށާއި އެގޮތުން ރާއްޖޭގެ 40 އަކަށް ސްކޫލުގެ ޕްރިންސިލަޕުލުން އެމީހުން މަސައްކަތް ކުރަމުންދިޔަ ރަށް ނޫން އެހެން ރަށްރަށަށް ފޮނުވާލާފައިވާކަމަށް ތަޢުލީމީ ވަޒީރު ޑރ. އިސްމާޢީލް ޝަފީޢު ވިދާޅުވެއްޖެއެވެ.
”ހަފްތާ 52“ ޕެނަލް ޑިސްކަޝަންގައި ވާހަކަ ދައްކަވަމުން ވަޒީރު ޝަފީޢު ވިދާޅުވިގޮތުގައި، ނިމިދިޔަ ސަރުކާރުގައި 40 އެއްހާ ޕްރިންސިޕަލުން އެ ބޭފުޅުން ވަޒީފާ އަދާކުރަމުންދިޔަ ރަށް ނޫން އެހެން ރަށް ރަށަށް ވަނީ ބަދަލުކޮށްފައެއެވެ. އަދި ޓީޗަރުންނަށްވެސް ވަނީ އެކި ގޮތް ގޮތުން ބިރުދައްކައި، އަނިޔާވެރިވެފައި ކަމަށް ވަޒީރު ވިދާޅުވިއެވެ.
މިއާއެކު ވަޒީރު ވިދާޅުވީ، ޓީޗަރުންނަކީ ދަރިވަރުންނަށް ކިޔަވައި ދިނުމުގެ އެންމެ މުހިންމު ޒިންމާ ކޮނޑުގައި އެޅިފައި ތިބޭ ފަރާތްތައް ކަމަށާ، އެހެން ކަމުން، ބިރުވެރި ކަމެއްގައި ތިބެގެން އެ ޒިންމާ އަދާނުކުރެވޭނެ ކަމަށާ، އަދި 40 ޕްރިންސިޕަލުން އެހެން ރަށްރަށަށް ބަދަލުކުރުމުން، ދެންތިބި ބޭފުޅުންނަށްވެސް ވާނެ ގޮތަކާމެދު އެ ބޭފުޅުން ވިސްނައި ނުތަނަވަސްވާނެ ކަމަށެވެ.
ކަންމިހެން ހުރުމުން، ވަޒީރު ކަމާއި ހަވާލުވެވަޑައިގެންނެވުމަށްފަހު، އެ 40 ޕްރިންސިޕަލުންނަށް އިންސާފް ހޯއްދަވައިދެއްވާފައިވާނެ ކަމަށް ވަޒީރު ވިދާޅުވުއެވެ. އަދި ޕްރިންސިޕަލުން ތިއްބަވަންޖެހޭ ތަނަށް ބަދަލުކުރެވުފައި ވާނެ ކަމަށް ވިދާޅުވިއެވެ.
އަދި އޭގެ އިތުރުން، މުވައްޒަފުންނަކީ ގަދަރުވެރި ބަޔަކަށް ހެދުމަށް، ފާއިތުވެދިޔަ މުއްދަތުގެ ތެރޭގައި އެއްވެސް މުދައްރިސަކަށް ބިރުދައްކާފައި ނުވަތަ އިންޒާރުދީފައި ނުވާނެ ކަމަށްވެސް ޝަފީޢު ވިދާޅުވިއެވެ.
