ބޭރުފައިސާއާ ބެހޭ ގަވާއިދުގެ ދަށުން މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގައި ރާއްޖޭގައި އޮޕަރޭޓްކުރާ އެއް ރިސޯޓު ފިޔަވައި އެހެން ހުރިހާ ރިސޯޓަކުން ރަޖިސްޓަރީ ވެއްޖެ ކަމަށް މަރުކަޒީ ބޭންކުން ބުނެފިއެވެ.
ޓޫރިސްޓު ރިސޯޓުތަކުން ކޮންމެ މަހެއްގެ ތެރޭ އަންނަ ކޮންމެ ޓޫރިސްޓަކަށް 500 އެމެރިކާ ޑޮލަރުގެ ރޭޓުން އެ މަހެއްގައި އައިސްފައިވާ ޖުމުލަ ފަތުރުވެރިންނަށް ޖެހޭ އަދަދު މާރުކުރަން މަޖުބޫރުކުރުމަށް މިދިޔަ މަހުގެ އެކެއްގައި އެމްއެމްއޭއިން ވަނީ ގަވައިދެއް ގެޒެޓުކޮށްފައެވެ.
އެ ގަވައިދަށް އަމަލުކުރަން ފެށީ ހަމަ އެ ދުވަހު ކަމަށްވާއިރު، އެމްއެމްއޭއިން ބުނީ ރާއްޖޭގައި މިހާރު ހިންގަމުން އަންނަ 174 ރިޒޯޓުގެ ތެރެއިން 173 ރިޒޯޓު އެ ގަވައިދުގެ ދަށުން ރެޖިސްޓާވެފައިވާ ކަމަށެވެ.
އެ ގަވައިދަށް އަމަލުކުރަން ފެށި ދުވަހުން ފެށިގެން ޓީޖީއެސްޓީއަށް ރަޖިސްޓަރީވާ ފަރާތެއްނަމަ، އެ ފަރާތްތަކަށް ވެސް ރަޖިސްޓަރީ ވުމަށް 30 ދުވަހުގެ މުއްދަތެއް ލިބޭ ކަމަށް އެމްއެމްއޭއިން ބުންޏެވެ.
އެ ގަވައިދަށް ރެޖިސްޓާ ނުވާ ރިޒޯޓާ ގުޅޭ މައުލޫމާތެއް އެ ބޭންކުން ހާމައެއް ނުކުރެއެވެ.
އެމްއެމްއޭއިން ބޭރު ފައިސާއާ ބެހޭ ގަވާއިދު އެކުލަވައިލީ މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ)ގެ ހުށަހެޅުންތަކަށް އިޖާބަ ނުދީ ކަމަށް ބުނެ އެ ޖަމިއްޔާއިން މީގެ ކުރިން ކަންބޮޑުވުން ފާޅުކޮށްފައިވެއެވެ.
ރާއްޖޭގެ ފަތުރުވެރިކަމުގެ ބާނީން ހިމެނޭ މަޓީން ބުނެފައި ވަނީ އެ ގަވައިދު އެކުލަވާލުމާ ގުޅޭ ގޮތުން އެމްއެމްއޭގެ އެދުމަށް މަޓީން އެ އޮތޯރިޓީއާ ބައްދަލު ކުރި ކަމަށާއި ނަމަވެސް ބޭރު ފައިސާއާ ބެހޭ އައު ގަވައިދުގައި ހިމެނުމަށް އެމްއެމްއޭއިން ހުށަހެޅި ހުށަހެޅުންތަކަކީ އެ ޖަމިއްޔާއަށް އެއްބަސްވެވޭނެ ކަންތައްތަކެއް ނޫންކަން އެންގި ކަމަށެވެ.
އެ ގަވައިދުގެ ދަށުން ގެސްޓު ހައުސްތަކަށް އަންނަ ކޮންމެ ފަތުރުވެރިއަަކަށް 25 ޑޮލަރު މާރުކުރަންޖެހޭއިރު، ޗަމްޕާ ބްރަދާޒްގެ ޗެއާމަން މުޙައްމަދު މޫސާ (އުއްޗު) އާއި ޗަމްޕާ ކްރައުންގެ ޗެއާމަން ހުސައިން އަފީފް ވެސް އެ ގަވައިދާ ގުޅޭ ކަންބޮޑުވުންތައް ހިއްސާކުރައްވައިފައިވެއެވެ.
