އަދުގެ ސަރުކާރުގެ މިޝްރާބު މިއަދު ހުރީ ބާރުތަށް މުށުތެރެއަށް ލައިގެން 2028 ވަނަ އަހަރުގެ ރިޔާސީ އިންތިހާބު ފޭރިގަންނަން ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
އެމްޑީޕީން ބޭއްވި ”ފުދިއްޖެ ފުނޑިއްޖެ“ ޖަލްސާގައި ވާހަކަދައްކަވަމުން ރައީސް ސޯލިހު ވިދާޅުވީ، އަދުގެ ސަރުކާރުގެ މިޝްރާބު މިއަދު ހުރީ ބާރުތަށް މުށުތެރެއަށް ލައިގެން 2028 ވަނަ އަހަރުގެ ރިޔާސީ އިންތިހާބު ފޭރިގަންނަން ކަމަށާއި މިކަންކުރަން މި ސަރުކާރަށް ފުރުސަތު ނުދީ އެކަމާ ދެކޮޅަށް އެންމެން ތެދުވަން ޖެހޭކަން ރައީސް ޞާލިހު ވިދާޅުވިއެވެ.
ޞާލިހު ވިދާޅުވީ މިއަދު ޤައުމު ސަލާމަތުން މިއޮތީ ކޮވިޑާއި ގުޅިގެން އެމްޑީޕީ ސަރުކާރުން އެޅި ފިޔަވަޅުތަކުގެ ސަބަބުންކަމަށާއި އެމްޑީޕީ ސަރުކާރުން ލޯނުތައް ނެގި ވާހަކަ ދައްކާއިރު، އެކަން ކުރަންޖެހުނު ސަބަބާއި މިއަދު ހާލަތު އޮތްގޮތާއި އަޅާކިޔަން ޖެހޭ ކަމަށެވެ. އަދި ކޮވިޑް ތެރޭގައި ކަންވެގެން ދިޔަގޮތުން ދުނިޔެ ދެކެފައިނުވާވަރުގެ އާލަމީ ވަބާއެއް ކުރިމަތިވެގެން ދިޔަކަމަށާއި އެކަމުގެ ސަބަބުން ދައުލަތަށް ލިބެމުން އައި އާމްދަނީ ހުއްޓުމަކަށް އައިކަމަށެވެ.
ދައުލަތުގެ ރިޒާވްފައި އޭރު ފައިސާނެތްކަން ފާހަގަކުރައްވަމުން ރައީސް ސޯލިހު ވިދާޅުވީ، ރައީސް ޔާމީނު ވެރިކަން ނިމިގެންދިޔައިރު ދައުލަތުގެ ރިޒާވްގައި އެއް ބިލިއަން ޑޮލަރު ހުންނާނޭކަމަށް ވިދާޅުވަމުންދިޔަ ނަމަވެސް އެއީ ކަނޑައެޅިގެން ބުހުތާނު ދޮގެއް ކަމަށެވެ.
ރައީސް ސޯލިހު ވިދާޅުވީ، ރައީސް ޔާމީނުގެ ވެރިކަމުގެ ދައުރު ނިމުނުއިރު، ދައުލަތުގެ ރިޒާވްގައި ހުރީ 572 މިލިއަން ޑޮލަރު ކަމަށެވެ. އަދި ބޭނުން ކުރެވޭ ރިޒާވްގައި 200 މިލިއަން ޑޮލަރުވެސް ނެތްކަމަށެވެ. ދައުލަތުގެ ރިޒާވްގައި އެއްޗެއް ހުރިނަމަ ހުރީ ޖީއެމްއާރަށްދީ ނިންމާފައިކަން ރައީސް ފާހަގަކުރެއްވިއެވެ.
ދައުލަތެއްގެ އެ އޮންނަ ވެރިކަމެއްގެ ބޭނުމަކީ ރައްޔިތުންނަށް ޖެހޭ ދަތި އުނދަގޫ ދަނޑިވަޅުތަކުގައި އެހީތެރިވެ ދިނުން ކަމަށާއި މިގޮތުން ކުރިމަތިވި ކޮވިޑްގެ އާލަމީ ވަބާގެ ތެރޭގައި މުސާރަބަރާބަރަށް ދެވުނުއިރު، ވަޒީފާއިން އެއްވެސް މީހަކު ވަކިކޮށްފައި ނުވާއިރު، ރިސޯތްތަކުގެ ކުލިވެސް ފަސްކޮށްދެވުނު ކަމަށެވެ.
މީގެ އިތުރުން ވިޔަފާރިތަކަށް ލޯނާއި އެހީތެރިކަންވެސް ދީފައިވާނޭކަން ފާހަގަކުރައްވަމުން ރައީސް ސޯލިހު ވިދާޅުވީ މިއަދު މިހާލަތުގައި ޤައުމު ފެންނަން މިއޮތީ އޭރު އެޅި ފިޔަވަޅުތަކުގެ ސަބަބުންކަމަށް ރައީސް ވިދާޅުވިއެވެ.
ރައީސް ސޯލިހު ވިދާޅުވީ މިއަދު މިފެންނަނީ އިގްތިސާދު ހުއްޓިފައި އޮތްތަން ކަމަށާއި ދުނިޔެއަށް އިގްތިސާދީ ގޮތުން ލޮޅުމެއް ނައިސް ރާއްޖޭގެ މާލީ ހާލަތު މިހާ ދަށަށް މިދިޔައީ ހިންގަން ނޭނގުނުކަމުން ކަމަށެވެ.
