މޫސުމަށް އަންނަ ބަދަލުތަކުގެ މުއާހަދާގެ 29 ވަނަ ކޮންފަރެންސް އޮފް ދަ ޕާޓީސް (ކޮޕް 29) ގައި ބައިވެރިވެވަޑައިގަތުމަށް ރައިސުލްޖުމްހޫރިއްޔާ ޑރ. މުހައްމަދު މުއިއްޒު އަޒަރުބައިޖާނަށް ފުރާވަޑައިގެންފި އެވެ.
ނޮވެމްބަރު މަހުގެ 11 އިން 22 އަށް އަޒަރްބައިޖާންގެ ވެރިރަށް ބަކޫގެ، ބަކޫ ސްޓޭޑިއަމްގައި ކުރިއަށް ދާ މި ސަމިޓުގައި ބައިވެރިވެވަޑައިގެން ރައީސް ރާއްޖޭގެ ފަރާތުން އިއްވަވާ ހާއްސަ ގައުމީ ބަޔާން އިށްވަވައި، މަތީ ފަންތީގެ އެކިއެކި އިވެންޓްތަކާއި މަޝްވަރާތަކުގައި ބައިވެރިވެވަޑައިގަތުމުގެ އިތުރުން ބައެއް ގައުމުތަކުގެ ވެރިންނާ ބައްދަލުކުރެއްވުމަށް ވަނީ ހަމަޖެހިފަ އެވެ.
ކޮޕް 29 ގައި ކްލައިމެޓް ފައިނޭންސްގެ އާ ލަނޑުދަނޑިތައް އެކަށައެޅުމާއި ކާބަން މާކެޓް އޮޕަރޭޝަނަލައިޒް ކުރުމާބެހޭ ގޮތުން މަޝްވަރާ ކުރުމާއި އެއްބާރުލުން އިތުރުކުރުމާއި އެންޑީސީ ތަރައްގީކުރުމަށް ހުރި ހުރަސްތައް ނައްތާލުމާ ބެހޭ ގޮތުން މަޝްވަރާ ކުރުމަށްވެސް ބައްދަލުވުމުގައި ހަމަޖެހިފައިވެ އެވެ.
އޭގެ އިތުރުން މަތީ ފަންތީގެ އެކިއެކި މަޝްވަރާތަކުގައި ރައީސް ބައިވެރިވެވަޑައިގަންނަވަން ހަމަޖެހިފައިވާއިރު، ރައީސް އަކީ ސްމޯލް އައިލެންޑް ޑިވެލޮޕިން ސްޓޭޓްސް (ސިޑްސް) އަށް ދިމާވާ ތަފާތު ގޮންޖެހުންތަކަށް ވަރަށް ބޮޑަށް ވަކާލާތު ކުރައްވާ ބޭފުޅެކެވެ.
އެ ދަތުރުފުޅުގައި ރައީސްގެ އަރިހުގައި ސަރުކާރުގެ މަތީ ފަންތީގެ ވަފުދެއް ބައިވެރިވެ ވަޑައިގަންނަވަ އެވެ.
އަޒަރުބައިޖާނަށް ރައީސް ފުރާވަޑައިގަތީ، ދެ ހަރަމްފުޅުގެ ހާދިމް އަދި ސައޫދި އަރަބިއްޔާގެ ރަސްގެފާނު ސަލްމާން ބިން އަބްދުލްއަޒީޒްގެ ދައުވަތަކަށް، ޖޮއިންޓް އަރަބް-އިސްލާމިކް ސަމިޓުގައި ބައިވެރިވެވަޑައިގަތުމަށް ސައޫދި- އަރަބިއްޔާއަށް ކުރެއްވި ރަސްމީ ދަތުރުފުޅު ނިންމަވާލެއްވުމަށް ފަހުގަ އެވެ.
