”ފުދިއްޖެ، ފުނޑިއްޖެ“ ނަމުގައި ބޮޑު ޖަލްސާ މާދަމާރޭ އާޓިފިޝަލް ބިޗްގައި ބޭއްވުމަށް އިދިކޮޅު މައި ޕާޓީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން އިއުލާނުކޮށްފި އެވެ. މިކަން އިޢުލާނުކޮށްފައިވަނީ އެމްޑީޕީގެ ރަސްމީ ”އެކްސް“ އެކައުންޓުން ކުރި ޕޯސްޓެއްގައެވެ. އެފޯސްޓުގައި ބަޔާންކޮށްފައިވަނީ ”ފުދިއްޖެ، ފުނޑިއްޖެ“ ގެ ނަމުގައި ބާއްވާ ޖަލްސާ އޮންނާނީ މާދަމާ 12 ނޮވެންބަރު 2024 (އަންގާރަ) ދުވަހުގެރޭ 8:30 ގައި އާޓިފިޝަލް ބީޗް ސަރަހައްދުގައި ކަމަށެވެ. އެކްސްގައި ކޮށްފައިވާ ފޯސްޓުގައި، ޖަލްސާގައި ބައިވެރިވުމަށް ރައްޔިތުންނަށް ވަނީ ދައުވަތު ދީފަ އެވެ.
އޮގަސްޓު މަހުގައި ބޭއްވި އެމްޑީޕީގެ ގައުމީ މަޖިލިހުގެ ޖަލްސާގައި ވަނީ ސީދާ ހަރަކާތަށް ނިކުންނަން ގަރާރެއް ފާސްކޮށްފަ އެވެ. އެޖަލްސާގައި ފާހަގަކޮށްފައިވާ ކަންތަކުގެ ތެރޭގައި ސަރުކާރުން ނިޒާމުތަކަށް ގެންނަން މަސައްކަތްކުރާ ބަދަލުތައް ކަމުނުދާ ކަންފާހަގަކޮށްފައިއެވެ. އަދި އެއްވެސް އިންސާފެއް ނެތި ވަޒީފާއިން މީހުން ވަކިކުރަމުންދާ ކަމަށާއި ބޯހިޔާވަހިކަމާއި އަދި ގާނޫނުތަކަށް ގެންނަން ހުށަހަޅާފައިވާ އިސްލާހުތަކާ ގުޅިގެން ކަންބޮޑުވުން ފާޅުކޮށް ވަނީ އަޑުއުފުލާފަ އެވެ.
މިފަހުން ރައްޔިތުންގެ މަޖިލިސް ސަރަހައްދަށް އެމްޑީޕީއަށް ތާއީދުކުރާ އެކަށިގެންވާ އަދަދެއްގެ ސަޕޯޓަރުން އެއްވެ ވަނީ މުޒާހަރާވެސްކޮށްފަ އެވެ. މިއެއްވުމުގައި ލާމަރުކަޒީ ނިޒާމަށް އަސަރުކުރާ ގޮތަށް އަދި މިނިވަން މުއައްސަސާތަކަށް ރައީސްގެ ބާރާއި ނުފޫޒު ފޯރުވޭހެން މަސައްކަތް ކުރަމުންދާ ކަމަށް ބުނެ އެކަމާ ދެކޮޅަށް ވަނީ އަޑުއުފުލާފައެވެ.
މިއީ މިފަހުން އެމްޑީޕީން ބާއްވާ މިފަދަ ބޮޑު ޖަލްސާކަން ފާހަގަކޮށްލެވެ އެވެ. ނަމަވެސް ސިލްސިލާކޮށް ހަރުގެ ޖަލްސާތައް ބާއްވަމުންގެންދެ އެވެ.
