ރައީސުލްޖުމްޙޫރިއްޔާގެ ވާދަވެރިޔަކީ އެއީ ސިޔާސީ ވާދަވެރިޔަކަށް ވީތީ އެމީހަކު ހިފާ ޔައްރަުކޮށް، ގެންގޮސް ޖަލަށްލާތަނެއް ނުފެންނާނޭ ކަމަށް ރައީސުލްޖުމްޙޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ.
އާދިއްތަ ދުވަހުގެ ރޭ ބޭއްވި ޖުމްހޫރީ ދުވަހުގެ ރަސްމީ ޖަލްސާގައި ވާހަކަފުޅުދައްކަވަމުން ރައީސް މުއިއްޒު ވިދާޅުވީ ރިޔާސީ އިންތިޚާބުގެ ކެންޕޭންގެ ތެރޭގައި ރައްޔިތުންނަށް ވެވަޑައިގެންނެވި ވައުދާ އެއްގޮތަށް މަސައްކަތް ކުރަމުންދާ ކަމަށާއި، މިގައުމުން ބަދަލު ހިފުމުގެ ރޫހު މިހާރު ނައްތާލާފައިވާ ކަމަށެވެ.
އަދި ސިޔާސީ ވާދަވެރިއަކަށްވީތީ ގެންގޮސް ހިފާ ހައްޔަރުކޮށް ޖަލަށްލާތަނެއް ނުފެންނާނެކަން ފާހަގަކުރައްވައި ރައީސް މުއިއްޒު ވިދާޅުވީ ސިޔާސީ މީހުންގެ ފަހަތުން ނުދުވާނެ ކަމަށާއި، ކުރިއަށް އޮތްތަނުގައި ވެސް އެމަންޒަރު ނުފެންނާނެ ކަމަށެވެ. އަދި ވިދާޅުވީ ގައުމުގެ ހަމަނުޖެހުން ނަގާނުލާނެ ކަމަށެވެ.
މީގެ އިތުރުން ރައީސް މުއިއްޒު ވިދާޅުވީ މިސަރުކާރުގައި ރިޔާސީ ކޮމިޝަންތައް ނުހަދާނެ ކަމަށާއި، ސިޔާސީ ގޮތުން ކަންކަން ނުކުރާނެ ކަމަށެވެ. ނަމަވެސް ވައްކަން ކޮށްފިކަމަށްވާނަމަ ނުވަތަ ގައުމުގެ މުދާ ނުހައްގުން ހޯދާފައިވާނަމަ އެކަންކަން ބަލާނެ ކަމަށް އެމަނިކުފާނު ވިދާޅުވިއެވެ.
”ސިޔާސީ ވާދަވެރިޔަކަށް ވީތީ އަޅުގަނޑުގެ ވާދަވެރިޔާ އެއީ ސިޔާސީ ވާދަވެރިއަކަށްވީތީ ގެންގޮސް ހިފާ ހައްޔަރުކޮށް ޖަލަށްލާތަނެއް ނުފެންނާނެ. މިދިޔާ އެއް އަހަރު ތެރޭ ނުފެންނާނެ. ކުރިއަށް އޮތްތާނގަވެސް ނުފެންނާނެ އެކަމެއް. އެއީ އަޅުގަނޑު ގަބޫލުކުރާ ގޮތަކީ. މީގެ ކުރީގައި ކޮންމެވެސް ވަރަކަށް އެކަން އޮތީ ފެނިފަ. އެކި ގޮތްގޮތުން ފްރޭމްކޮށްގެން ވިޔަސް އެނޫން ގޮތަކުން ވިޔަސް އެކަން އޮތީފެނިފަ އަނިޔާވެރިކަމާއެކީގަ. ސިޔާސީ ވާދަވެރިން ގެންގޮސް ޖަލަށްލާ އަނިޔާކޮށްފަވޭ.“ ރައީސް ވިދާޅުވިއެވެ.
ރައީސް މުއިއްޒު ވިދާޅުވީ ރައްޔިތުންގެ ހައްގުގައި މަސައްކަތް ކުރާނެ ކަމަށާއި، ރައްޔިތު މީހާގެ ހައްގަށް އަރާގެނެފައިވާނަމަ އުސޫލުގެ ތެރެއިން ބަލާނެ ކަމަށެވެ. މި ގައުމުގައި މިމިނިވަން މުއައްސަސާތަކާއި، ދުސްތޫރީ ނިޒާމު އަދި ޝަރުއީ ނިޒާމެއް އެބައޮތް ކަމަށާއި، ނިޒާމުގެ ތެރެއިން ކަންކަން ކުރިއަށްދާނެ ކަމަށް ވެސް ރައީސް ވިދާޅުވިއެވެ.
