ދިވެހި ޤައުމަށް ވަފާތެރިވުމަށްވުރެ ބޮޑު އުފަލެއް އެމަނިކުފާނަށް ނެތްކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ ޖުމްހޫރީ ދުވަހުގެ މުނާސަބަތުގައި ބޭއްވި ރަސްމީ ޖަލްސާގައި ޤައުމާއި މުހާތަބްކުރައްވާ ދެއްކެވި ވާހަކަފުޅުގައެވެ.
ޖުމްހޫރީ ދުވަހުގެ މުނާސަބަތުގައި ބޭއްވި ރަސްމީ ޖަލްސާގައި ޤައުމާއި މުހާތަބްކުރައްވާ ދެއްކެވި ވާހަކަފުޅުގައި ރައީސުލްޖުމްހޫރިއްޔާ ވަނީ ޖުމްހޫރީ ދުވަސް ފާހަގަކުރުމާއި ޖުމްހޫރީ ވެރިކަމެއްގެ މުހިއްމުކަމުގެ މައްޗަށް އަލިއަޅުއްވާލެއްވިއެވެ. އެގޮތުން ވެރިކަމަކީ އެއްވެސް ޙާލެއްގައި ލިބޭ މާބޮޑު މޮޅެއް ނޫންކަމަށާއި އަދި އެއީ ލިބޭ މުދާ ގަނޑެއްވެސް ނޫންކަމަށް ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ ދިވެހި ޤައުމަށް ވަފާތެރިވުމަށްވުރެ ބޮޑު އުފަލެއް އެމަނިކުފާނަށް ނެތްކަމަށެވެ. އަދި ވެރިކަމާއި ހަވާލުވެވަޑައިގަތުމަށްފަހު މިވޭތުވެދިޔަ 52 ހަފްތާތެރޭގައި އެކަން ފަޚުރުވެރިކަމާއެކު ސާބިތުކޮށްދެއްވާފައިކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި ވެރިކަމާއި ވެރިންގެ މަސްއޫލިއްޔަތާ ގުޅޭގޮތުން އެމަނިކުފާނުގެ ބައްޕާފުޅު އަލްމަރުހޫމް އައްޝައިހް ހުސައިން އަބްދުއްރަޙްމާނު ލިޔުއްވާފައިވާ ”ދައުލަތާއި ވެރިންނާއި މަސްއޫލިއްޔަތުގެ މަފުހޫމް“ ފޮތަށްވެސް އަލިއަޅުވައިލެއްވިއެވެ. އަދި އެއީ ވެރިންނަށް އިންތިޚާބުކުރުމުގައި ބަލަންވީ ކަންކަން އޮޅުންފިލުވުމަށް ކިޔާލަން މުހިންމު ފޮތެއްކަމަށްވެސް ރައީސް ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ ވެރިކަމާއި ހަވާލުވެވަޑައިގަތުމަށްފަހު މިވީ އެއް އަހަރެއްހާ ދުވަހުގެ ތެރޭގައި މަސައްކަތްކުރެއްވީ ރައްޔިތުންގެ ފަޅީގައި ހުރެގެން، ރައްޔިތުންގެ ފަރާތުން ހެޔޮވެރިކަމެއްކުރުމަށްކަމަށެވެ. އެގޮތުން މީގެކުރީ ސަރުކާރުތަކުން އަޅާނުލާ ހުރި ބޮޑެތި މައްސަލަތައް ހައްލުކުރުމަށް މަސައްކަތްކުރައްވަނީވެސް ރައްޔިތުންނަށްޓަކައިކަންވެސް އެމަނިކުފާނު ފާހަގަކުރެއްވިއެވެ.
”މި މަސައްކަތުގައި ރައްޔިތުންގެ އެއްބާރުލުން ލިބޭނެކަމަށް އުއްމީދުކުރަން. ރައްޔިތުންގެ އެއްބާރުލުން ލިބިއްޖެނަމަ އެކަންކަން ހައްލުވެގެންދާނެ“ ރައީސް ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ ވެރިކަމާއި ހަވާލުވެވަޑައިގަންނަވަމުން ވެވަޑައިގެންނެވި ވައުދުތައް ފުއްދެވުމަށް މަސައްކަތްކުރައްވަމުން ގެންދަވާކަމަށެވެ. އެގޮތުން ސިޔާސީގޮތުން މީހުންނަށް އަދަބު ދިނުމާއި ޖުޑީޝަރީއަށް ނުފޫޒު ނުފޯރުވާނޭކަމަށް ވިދާޅުވެ، ވެވަޑައިގެންނެވި ވައުދުގެ މަތީގައި ހުންނެވިކަން ރައީސުލްޖުމްހޫރިއްޔާ ވިދާޅުވިއެވެ. އަދި ދިފާޢީގޮތުންނާއި ޚާރިޖީގޮތުން ޤައުމު ވަރުގަދަކުރެއްވުމަށް ވެވަޑައިގެންނެވި ވައުދު ފުއްދެވުމަށް ކުރައްވާ މަސައްކަތްތަކުގެ މައްޗަށްވެސް ރައީސުލްޖުމްހޫރިއްޔާގެ ވާހަކަފުޅުގައި އަލިއަޅުއްވާލެއްވިއެވެ.
