ސަރުކާރުން ހުށަހަޅާފައިވާ 2025 ވަނަ އަހަރުގެ ބަޖެޓުގެ ކަންކަން ރައްޔިތުންގެ މަންދޫބުންނަށް ނޭންގުމަކީ ގޯހެއްކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.
އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން އަމީރު ވިދާޅުވީ ބަޖެޓު ކޮށްފައިވާ ކަންކަން ރައްޔިތުންގެ މަންދޫބުންނަށް ނޭގުމަކީ ގޯހެއް ކަމަށާއި އަދި ބަޖެޓުގައި މަޝްރޫއުތައް ނެތުމަކީ ކަސިޔާރު ސިޔާސަތެއްގެ ފެށުން ކަމަށެވެ.
ތަރައްގީ މަޝްރޫއުތަކަށް ކަނޑައަޅާފައިވާ 12 ބިލިއަން ހަރަދު ކުރަނީ ކޮން ރަށެއްގެ ކޮން މަޝްރޫއުއަކަށްކަން އެނގެން ނެތްކަން ފާހަގަކުރައްވައި އަމީރު ވިދާޅުވީ މީގެ ސަބަބުން ރައްޔިތުންނަށާއި، ރައްޔިތުންގެ މަންދޫބުންނަށް ސަރުކާރު ޖަވާބުދާރީ ކުރުވުމަށް ހުރަސްއެޅޭ ކަމަށެވެ. އަދި ވައްކަމާއި ފަސާދައަށް މި ބަޖެޓު ހުޅުވިގެންދާ ކަމަށެވެ.
އަމީރު ވިދާޅުވީ މިސަރުކާރުން ރައްޔިތުންގެ އުންމީދުތަކުގައި ކުލަ ޖައްސައިދޭނެ ޕްލޭނެއް ނެތް ކަމަށާއި، ސަރުކާރު ދަނީ ރައްޔިތުންނާ ދުރަށް ކަމަށެވެ.
ކައުންސިލުތަކުގެ ބްލޮކް ގްރާންޓުން 1 ބިލިއަން ރުފިޔާ އުނިކޮށްފައިވާތީ އެކަން ފާހަގަކުރައްވައި އަމީރު ވިދާޅުވީ ކައުންސިލުތަކުގެ ބްލޮކް ގްރާންޓަށް ކަނޑައަޅާފައިވަނީ 1.4 ބިލިއަން ރުފިޔާ ކަމަށެވެ. މިއީ 2024 އަށްވުރެ 765 މިލިއަން ރުފިޔާ މަދު އަދަދެއް ކަމަށާއި، މިއަދަދުން ކައުންސިލްތަކުގެ ރިކަރެންޓް ހަރަދުވެސް ފޫނުބެއްދޭ ކަމަށް އޭނާ ވިދާޅުވިއެވެ.
އަމީރު ވިދާޅުވީ އަމްދަނީގެ 5 ޕަސެންޓްގެ ބަދަލުގައި ސަރުކާރުން ދީފައިވަނީ 2.5 ޕަސެންޓް ކަމަށާއި، މިއީ ގާނޫނާ ގަވާއިދާ ހިލާފަށް ކައުންސިލްތަކަށް ކުރި މަލާމާތެއް ކަމަށެވެ.
މީގެ އިތުރުން އަމީރު ވިދާޅުވީ 2024 އަށް ވުރެ އާމްދަނީ ބޮޑުވާއިރު، ކައުންސިލްތަކުގެ ބްލޮކް ގްރާންޓް 2025 ވަނަ އަހަރު މަދުވެގެން 2.4 ބިލިއަން ރުފިޔާއަށްވުރެ ބޮޑުވާނެ ކަމަށެވެ.
ގާނޫނާ ހިލާފުވެއްޖެކަން ފިނޭންސް މިނިސްޓަރު މަޖިލީހަށް ސިޓީއަކުން އިއުތިރާފްވެފައިވާކަން ފާހަގަކުރައްވައި އަމީރު ވިދާޅުވީ އިތުރުކުރަން އެދުނީ 700 މިލިއަން ކަމަށެވެ. 2.1 ބިލިއަން ރުފިޔާއަށް ބްލޮކްގްރާންޓް ބޮޑުވެގެންދާއިރު، މިއީ 2024ށް ވުރެ މަދު އަދަދެއް ކަމަށް އޭނާ ވިދާޅުވިއެވެ. އަދި އާމްދަނީ ބޮޑުވެފައި ބްލޮކް ގްރާންޓް ކުޑަވުމަކީ އަރަތެއް ކަމަށް އަމީރު ވިދާޅުވިއެވެ.
