އަންނަ އަހަރަށް ލަފާކުރާ ބަޖެޓުގައި އެންމެ އިސްކަމެއްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންފައިވާ ވަޢުދުތައް ފުއްދުމަށްކަމަށް މާލީ ވުޒާރާއިން ވިދާޅުވެއްޖެއެވެ.
މާލީ ވަޒީރުގެ ނައިބު އަޙްމަދު ސާޢިދު މުސްޠަފާ ވިދާޅުވީ އަންނަ އަހަރަށް ލަފާކުރާ ބަޖެޓުގައި އެންމެ އިސްކަމެއްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންފައިވާ ވަޢުދުތައް ފުއްދުމަށްކަމަށާއި ޚާއްޞަކޮށް ޢުމްރާނީ ގިނަ މަޝްރޫޢުތަކެއް ފެށޭތަން ފެންނާނެކަމަށެވެ.
އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށައަޅަފައިވަނީ 56.6 ބިލިޔަން ރުފިޔާގެ ބަޖެޓެކެވެ. މިބަޖެޓުގައި ޕަބްލިކް ސެކްޓަރ އިއިންވެސްޓްމަންޓް ޕްރޮގްރާމް، ޕީއެސްއައިޕީ ނުވަތަ ޢުމްރާނީ މަޝްރޫޢުތައް ހިންގުމަށް 12.4 ބިލިޔަން ރުފިޔާވަނީ ހިމަނާފައިވެއެވެ. މިއީ މިހާތަނަށް ޕީއެސްއައިޕީއަށް މިހާ ބޮޑު ޢަދަދެއް ހިމެނި ފުރަތަމަ ފަހަރެވެ.
މާލީ ވަޒީރުގެ ނައިބު އަޙްމަދު ސާޢިދު ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމަށް ވަޑައިގަތީ ވަރަށް ގިނަ ވަޢުދުތަކާއެކުކަމަށާއި ޚާއްޞަކޮށް ބޯހިޔާވަހިކަން ކަށަވަރުކޮށްދިނުމަށް އެމަނިކުފާނު ވެވަޑައިގެންފައިވާ ވަޢުދު ހިމްނޭކަމަށެވެ.
މިކަމަށް އިޝާރަތްކުރައްވާ ސާއިދު ވިދާޅުވީ، އަންނަ އަހަރުގެ ބަޖެޓަކީ މިސަރުކާރުން އެކުލަވާލި ފުރަތަމަ ބަޖެޓުކަމަށްވުމާއެކު، ބަޖެޓު ތައްޔާރުކުރިއިރުވެސް އެންމެ ބޮޑު ފޯކަސްއެއް ހުރީ ރައީސުލްޖުމްހޫރިއްޔާގެ ވަޢުދުތަކަށްކަމަށެވެ. އަދި ހިނގަމުންދާ އަހަރުގެ ބަޖެޓުގައި ޕީއެސްއައިޕީ ހިމަނާފައިހުރީ ޤައުމުގެ މާލިއްޔަތަށް ގެއްލުންވާގޮތަށްކަމަށް ވެސް އޭނާ ވިދާޅުވިއެވެ.
ސާޢިދު ވިދާޅުވީ މިއަހަރަށް ކަނޑައަޅާފައިވާ ބައެއް މަޝްރޫޢުތައް ހުރީ އެވޯޑުކޮށް ކޮންޓްރެކްޓްކުރެވި އެޑްވާންސް ފައިސާދީ އިތުރަށް އެއްވެސް ކަމެއް ނުހިނގާނެފަދަ ގޮތަށްކަމަށާއި އެހެންކަމުން މިސަރުކާރުން މިއަހަރަށް ރޭވި ކަންކަމުގެ ތެރެއިން އެންމެ މުހިންމު އެއްކަންތައް ކުރެވިފައިވާކަމަށެވެ. އަދި އެއީ ވާރުތަވި ޕީއެސްއައިޕީ ރަނގަޅަށް ލާވާލައި ތަރުތީބުކޮށް، އެންމެ އަވަހަށް ނިންމާލެވޭނެ މަޝްރޫޢުތައް ހޯދުންކަމަށް މާލީ ވަޒީރު ނައިބު ވިދާޅުވިއެވެ.
އެކަންކަން ކުރިއަށް ގެންދިއުމަށް އެކަށީގެންވާ ބަޖެޓު އަންނަ އަހަރަށް ލަފާކުރާ ބަޖެޓުގައި އެކުލަވާލާފައިވާނެކަމަށާއި ޚާއްޞަކޮށް ވެލާނާ އިންޓަރނޭޝަނަލް އެއަރޕޯޓު ތަރައްޤީކުރުމުގެ މަޝްރޫޢުއާއި، ތިލަމާލެ ބްރިޖުގެ މަޝްރޫޢު ވިހާވެސް އަވަހަށް ނިންމުމަށް އަހަމިއްޔަތުކަން ދީފައިވާކަން ސާޢިދު ފާހަގަކުރެއްވިއެވެ. އެ މަޝްރޫޢުއަށް ސަޕްލިމަންޓްރީ ބަޖެޓުގައިވެސް އިސްކަން ދީފައިވާކަމުގައި އޭނާ ވިދާޅުވިއެވެ.
ސާއިދު ވަނީ އަންނަ އަހަރުގެ ބަޖެޓުގައި ބޯހިޔާވަހިކަމަށް ރައީސުލްޖުމްހޫރިއްޔާ އިސްކަންދެއްވާ މިންވަރު ފެނަންކަމަށްވެސް ވިދާޅުވެފައެވެ. ސަރުކާރުން މި ބަޖެޓު ސިފަކުރަނީ، ގެދޮރުވެރިކުރުމުގެ ރަން ޒަމާނަށް ދިވެހިރާއްޖެ ގެންދިއުމުގެ ފެށުމުގެ ގޮތުގައެވެ. އެގޮތުން ގެދޮރުވެރިކުރުމާ ގުޅޭ މަޝްރޫޢުތަކަށް 3 ބިލިޔަނަށްވުރެ ބޮޑު ހޭދައެއް ކުރުމަށް ވަނީ ހިމަނާފައެވެ.
ސާއިދު ވިދާޅުވީ އަންނަ އަހަރުގެ ބަޖެޓުގައި ހިނގަމުންދާ ޕީއެސްއައިޕީ މަޝްރޫޢުތަށް އަވަހަށް ނިންމުމަށް ހާއްސަ އިސްކަމެއް ދީފައިވާނެ ކަމަށެވެ.
