ގޭންގުތައް ހިންގުމަށާއި، މަސްތުވާތަކެތީގެ އައްޑާތަކުގެ ގޮތުގައި ބޭނުންކުރާ ތަންތަން ދަޢުލަތަށް ނެގޭނެގޮތަށް ޤާނޫނަށް ބަދަލުގެންނަވާނެކަމަށް ދާޚިލީ ސަލާމަތާ ފަންނިއްޔާތާ ބެހޭ ވަޒީރު ޢަލީ އިޙުސާން ވިދާޅުވެއްޖެއެވެ.
ވަޒީރު މިހެން ވިދާޅުވީ، ހުޅުމާލެ ދެވަނަ ފިޔަވަހި ހިޔާ ފްލެޓެއްގައި ރަހީނުކޮށްފައިވާ މީހަކު ސަލާމަތްކުރުމަށް ފުލުހުން ކުރިއަށްގެންދިޔަ ކާމިޔާބު އޮޕަރޭޝަނަށްފަހު މީޑިއާއަށް ދެއްވި އިންޓަވިއުއެއްގައެވެ.
ދާޚިލީ ވަޒީރު ޢަލީ އިޙުސާނު ވިދާޅުވީ ސަރުކާރު ހަވާލުވިއިރު، ރާއްޖޭގައި ގޭންގު ކުށްތަކާއި، މަސްތުވާތަކެތި ވިއްކުމާއި ބޭނުންކުރުމުގެ މައްސަލަ އޮތީ އިންތިހާއަށް އިތުރުވެފައިކަމަށެވެ. އެހެންކަމުން ރައީސުލްޖުމްހޫރިއްޔާގެ ޢަމާޒަކަށްވީ މި ދަޢުރުގެ ތެރޭގައި މި މައްސަލައަށް ދާއިމީ ޙައްލެއް ހޯދުންކަމަށް ވަޒީރު ވިދާޅުވިއެވެ.
އަދި އެކަމަށްޓަކައި ބައެއް ޤާނޫނުތަކަށް އިޞްލާހު ގެނަންޖެހޭކަން ފާހަގަކުރައްވަމުން ވަޒީރު ވިދާޅުވީ ފުލުހުންގެ ޚިދުމަތުގައި ގޭންގު ކުށްތަކަށް ޚާއްސަ ޔުނިޓެއް ޤާއިމުކޮށް، އޭގެދަށުން ވަރަށް ގިނަ މަސައްކަތްތަކެއްކޮށް، މިހާތަނަށްވެސް ބޮޑެތި ކާމިޔާބީޔައް ހޯދާފައިވާކަމަށެވެ.
އިޙްސާން ވިދާޅުވީ ސަރުކާރުން ގެންނަ ބަދަލުތަކުގައި ގޭންގު ކުށްތައް ކުރާ މީހުންނާމެދު ޤަނޫނުން އެންމެ ހަރުކަށު ފިޔަވަޅު އަޅާނެކަމަށާއި އެންމެ މުހިންމީ އާންމު ރައްޔިތުންގެ ރައްކާތެރިކަން ކަމަށެވެ. އަދި އެކަމަށް ހުރަސްއެޅޭ އެއްވެސް ކަމަކަށް ސަރުކާރުން ފުރުޞަތު ނުދެއްވާނެކަމަށް ދާޚިލީ ވަޒީރު ވިދާޅުވިއެވެ.
