ޔަހޫދީ އިޒްރޭލުން ފަލަސްތީނުގައި ކުރަމުންދާ ހަނދުރާމައާ އެކު ވެސް، ފަސްޖެހުމެއް ނެތި ފަލަސްތީނުގެ ގައުމީ ފުޓުބޯޅަ ޓީމުގެ އެންމެ ބޮޑު އަމާޒަކީ 2026 ވަނަ އަހަރު ބާއްވާ ފީފާ ވޯލްޑް ކަޕަށް ކޮލިފައި ވުން ކަމަށް އެގައުމުގެ ފުޓްބޯޅަ އެސޯސިއޭޝަންގެ ރައީސް ޖިބްރީލް ރަޖޫބް ވިދާޅުވެއްޖެ އެވެ.
އެމެރިކާ އާއި ކެނެޑާ އަދި މެކްސިކޯގައި 2026 ވަނަ އަހަރު ބާއްވާ ވޯލްޑް ކަޕް ކޮލިފިކޭޝަންގެ ތިންވަނަ ބުރުގެ ގުރޫޕް ސްޓޭޖުގައި، ފަލަސްތީން ވަނީ ފުރަތަމަ ހަތަރު މެޗުގެ ތެރެއިން، ދެކުނު ކޮރެއާ އާއި ކުވެއިތާ ވާދަކުރި މެޗުތަކުން ދެ ޕޮއިންޓް ހޯދައިފަ އެވެ.
“ އަހަރެމެން މިތިބީ އިޒްރޭލުގެ ފިޑި ހަމަލަތަކުގެ ސަބަބުން ގޮތްހުސްވެފަ. އަހަރެމެންނަށް ޖެހުނީ ގައުމީ ލީގު ހިމެނޭހެން ހުރިހާ ހަރަކާތްތަކެއް ހުއްޓާލަން. މި ހުރިހާ ކަމަކާ އެކު ވެސް އަހަރެމެން މި އަންނަނީ ވޯލްޑް ކަޕް ކޮލިފިކޭޝަން ހިމެނޭހެން ހުރިހާ މުބާރާތްތަކެއްގައި ވެސް ވާދަ ކުރަން ހުރިހާ މަސައްކަތެއް ކުރަމުން.“ ފަލަސްތީނުގެ ކޯޗު ޖިބްރީލް ވިދާޅުވިއެވެ.
މިހާތަނަށް ކުޅުނު ހަތަރު މެޗުން ދެ ޕޮއިންޓް ހޯދާފައި ވީ ނަމަވެސް ގަދަ ހަތަރެއްގައި ހިމެނިގެން ކުރިއަށް ދިޔުމުގެ ފުރުސަތު އަދި ފަލަސްތީނަށް އެބަ އޮތެވެ. މި ބުރުގައި ގުރޫޕްގެ ކޮންމެ ޓީމަކަށް ވެސް ބާކީ ހަ މެޗު އެބަ އޮތްއިރު، ގުރޫޕްގެ އެއްވަނަ އަދި ދެވަނަ ޓީމަށް ވޯލްޑް ކަޕުން ފުރުސަތު ލިބޭނެއެވެ. އަދި ތިންވަނަ އަދި ހަތަރުވަނަ ޓީމު، ކޮލިފިކޭޝަންގެ ހަތަރުވަނަ ބުރުގައި ކުޅޭނެ އެވެ.
ފަލަސްތީނު އެފްއޭގެ ރައީސް ވިދާޅުވީ، ޣައްޒާގައި ތިބި ކުޅުންތެރިން ނުގެނެވުމަކީ ހިތާމަކުރާ ކަމެއް ކަމަށާއި ހަނގުރާމައިގެ ތެރޭގައި 10 ކުޅުންތެރިއެއްގެ ފުރާނަ ގެއްލިފައިވާ ކަމަށެވެ. ހަމަ އެއާއެކު ޣައްޒާގެ ހުރިހާ ކުޅިވަރު ދަނޑުތަކާއި ވަސީލަތްތަކެއް ވެސް ސުންނާފަތިކޮށްލާފައި ވާއިރު، ލީގެއް ނެތުމުގެ ކަންބޮޑުވުން ވެސް ފާޅުކުރި އެވެ.
މީގެ އިތުރުން އަމިއްލަ ފަސްގަނޑުގައި މެޗު ކުޅެވޭނެ މާހައުލެއް ނެތުމުގެ ކަންބޮޑުވުން ވެސް އޭނާ ފާހަގަ ކުރި އެވެ. ފަލަސްތީނުގެ ހޯމް މެޗެއް އެ ގައުމުގައި ބޭއްވިތާ ފަސް އަހަރަށް ވުރެ ގިނަ ދުވަސް ވެފައި ވާއިރު، ކޮލިފިކޭޝަންގައި ކުރިއަށް އޮތް ހޯމް މެޗުގައި ދެކުނު ކޮރެއާއާ ބައްދަލުކުރާނީ ޖޯޑަންގަ އެވެ.
އޭނާ ދެކެނީ މި ހާލަތްތަކުގެ ތެރެއިން ވެސް ޓީމުގެ ތާރީހުގައި ކޮލިފައިންގެ ތިންވަނަ ބުރަށް އާދެވުމަކީ ވެސް ކުޅުންތެރިންނަށް ލިބޭނެ ހިތްވަރެކެވެ.
