ފިތުނަ ފެތުރުމަށް ކުރީގެ ރައީސް، އަބްދުﷲ ޔާމީން އަބްދުލް ގައްޔޫމް، ވެލިދޫ ދާއިރާގެ މެމްބަރު، މުހައްމަދު އައްބާސްއަށް ތިން މިލިއަން ރުފިޔާ ދީފައިވާ ކަމަށް ޕީއެންސީގެ ޕާލަމެންޓްރީ ގްރޫޕްގެ ލީޑަރު އަދި އިނގުރައިދޫ ދާއިރާގެ މެމްބަރު އިބްރާހިމް ފަލާހް ވިދާޅުވެއްޖެއެވެ.
ފަލާހް މިފަދައިން ވިދާޅުވީ، ޕީއެންސީއަށް ނިސްބަތްވެވަޑައިގަންނަވާ މަޖިލީހުގެ 13 ނުވަތަ 14 މެމްބަރަކު، މަޖިލީހުގެ ގޮނޑި ގެއްލުނަސް ހެޔޮ ކަމަށް ގައުމާއި ރައްޔިތުންގެ ހައްގުގައި ޕާޓީ ދޫކޮށްލައި ރައްޔިތުންގެ ފަޅިއަށް އަރާނެ ކަމަށް ބުނެ އައްބާސް ދެއްކެވި ވާހަކަތަކަށް ރައްދު ދެއްވާ ފަލާޙު އެކްސްްގައި ކުރެއްވި ޕޯސްޓެއްގައެވެ.
އެގޮތުން ފަލާހް ވިދާޅުވީ، ޕީއެންސީ ޕީޖީ ގްރޫޕް ރޫޅާލެވިދާނެ ކަމަށް ހީކޮށް އެފަދަ ބުހްތާން ދޮގު ވާހަކަ ފެތުރުމަކީ ވަރަށްބޮޑުކުށްހީއެއް ކަމަށާއި މެމްބަރު އައްބާހަށް ވަނީ އެފަދަ ފިތުނަ ފަތުރައިދޭ މަތިން ޔާމީނު ދާދިފަހުން އެގެއަށް ގެންގޮސް 3 މިލިއަން ރުފިޔާ ދީފައިވާ ކަމަށް މިދެކެވޭ ވާހަކަތަކަށް އައްބާސްގެ މެސެޖުން ބާރު ލިބޭ ކަމަށެވެ. ”ޕީއެންސީ ޕީޖީގްރޫޕް އޮތީ އެކަތިގަނޑެށްގޮތަށް ރައީސް މުއިއްޒުގެ ފަހަތްޕުޅުގައި ވަރަށް ސާބިތުކޮށް ކިތައްމެ ނުބައި ޕްލޭންތަކެށް ރާވާ މިފަދަ މޮޔައިން ލަށްވާ މިފަދަ މެސެޖު ކުރުވިއަސް އިންޝާ ﷲ ކާމިޔާބެއް ނުވާނެ، ޤާނޫނު އަސާސީގެ 73 މާއްދާގެ (ހ) ގައި ބުނާ ރައްޔިތުންގެ މަޖިލީހުގެ މެމްބަރެއްގެ ކިބައިގައި ހުންނަންޖެހޭ ބުއްދި ސަލާމަތުން ހުންނަންޖެހޭ ކަމަށް ބުނާ އެންމެ މުހިއްމު ޝަރުތު، ވެލިދޫ ދާއިރާގެ މެމްބަރުގެ ކިބައިގައި ހުރިކަމާމެދު މިހާރު ޝައްކުވާ ހިސާބަށްގޮސްފި“ ފަލާހް ވިދާޅުވިއެވެ.
ފަލާހް ވިދާޅުވީ މިފަދަ ފިތުނަވެރި ނުބައި ވާހަކަތަށް ފެތުރުމަކީ ތިމާގެ ސިޔާސީ ހުނަރުވެރިކަން ހާމަކޮށްދޭކަމެއްކަމުގައި ދެކުމަކީ ވަރައްބޮޑު ކުށްހީއެއް ކަމަށެވެ. ”އެކަމުން އަންގައިދެނީ ތިމާއަކީ އެއްވެސް އަޚްލާގެއްނެތް ބުއްދިގޯސް މޮޔައެއްކަން.“ ފަލާހް ވިދާޅުވިއެވެ. ރައްޔިތުންގެ މަޖިލީހުގެ ރައީސް، އަބްދުއްރަހީމް އަބްދުﷲ ވެސް ވެލިދޫ ދާއިރާގެ މެމްބަރ އައްބާސްގެ ވާހަކަތައް ދޮގު ކުރައްވާފައި ވެއެވެ.
